Saturday, November 25, 2017

ஆழ்ந்து அகன்ற நுண்ணியனே ...!!!



பிரபஞ்ச நாயகனே ..!! விஸ்வேஸ்வரனே ..!!! விரிந்து விரிந்து சென்றுகொண்டேயிருக்கும் வெட்டவெளியோனே..!!! காரிருளே !!! கரும்கும்மிருட்டே ..!!! யாவற்றையும் சூழ்ந்து சூழ்ந்து ஈர்க்கும் ஈர்ப்பு விசைக்கு மூலமான ஆதியே ..!!! அங்கிங்கெனாதபடி எங்கும், எங்கெங்கும் வியாபித்திருக்கும், ஆயிரம் ஆயிரம் கோடி சூரிய ஜோதியே ...!!! எப்படி நின் தன்மை உரைப்போம்..எம்பெருமானே ..!! யாவற்றுள்ளும் பிண்ணி பிணைந்து ஊடுறுவி ,யாவற்றுக்கும் அருள் ஆட்சி நடத்தும் அண்டபேரண்ட நாயகனே ..!!!மனம் போன போக்கில் திரிந்து ,கண்களை மூடிக்கொண்டு இவை எல்லாம் நீ கவனிக்க போகிறாயா ? என்று தெரிந்தும் தெரியாமலும் செய்யும் செயல்கள் யாவற்றுக்கும் மூல காரணமான இருந்துகொண்டு ,இம்மிகூட பிசகாமல் ,பலன்களை வாரிவழங்கும் எம் நாயகனே ..!!! எம் பெருமானே ..!!! பேரொளியே ..!!! உள்ளும் புறமும் நீ ..!! எம் உணர்வும் நீ !! உடலும் நீ ..!!! உள்ஒளியும் நீ ..!!நீயே அனைத்தையும் ஆள்கிறாய் ..!! எதுவும் நினது ஆட்சிபுலத்தை விட்டு விலகுவதில்லை.நின்னை அறிந்திடல் கடினம் ,நின்னை அன்பெனும் தன்மையால்  உணர்ந்திடல் எளிது.அன்பாய் எளிதாய் ஆத்மரூபமாய் இருக்கிறாய்.நுணுகி நுணுகி நுண்ணிய பொருளிலும் நீ ..!!! விரிந்து விரிந்து இருக்கும் அகண்டாகார நிலையிலும் நீ. இந்த சூட்சும வித்தை நின் ஒருவனுக்கு மட்டுமே உரித்தான அறிய இயலா அற்புத கலை.!!


மனதால் நினை கற்பனை செய்து  பழக பழக அன்பெனும் ஈர்ப்பை  உள்ளம் பெறுகிறது.அன்பெனும் தன்மை நிறைந்து நிறைந்து ,பெருக  பெருக ,கருணை தானாகவே சூழ்கிறது.இந்த அன்பும் கருணையும் நின் ஒரு துளியே .நிந்தன் தன்மையின் ஒரு வெளிப்பாடே.நின்னை முழுவதும்  இந்த ஈன பிறவியில் அறிய இயலோம்.ஆனால் நிந்தன் அன்பெனும் தன்மை கிடைக்கபெற்றோம்,அதன் வழியே நின்னை சிக்கென பிடிக்க முயல்கிறோம்.நின் தன்மை பிடிப்பதும் விடுவதும் என மாறி மாறி காலமெனும் நினது இன்னுமொரு புரியஇயலா ஆற்றல்  எம்மை இயக்குகிறது .பிறவி சுழல் மாறினாலும் என்றாவது ஒரு நாள் நின் அலைபிடித்து ,நின் பொற்பாத நிழல் அடைவோம்..!!எம் பெருமானே ..!!! ஈசனே ..!!! புரிய இயலா விந்தை புரியும் ஆழ்ந்து அகன்ற நுண்ணியனே !!! நின் பொற்பாதங்களில்  சரணாகதி ..!!! சரணாகதி ..!!! சரணாகதி ..!!! சரணாகதி ..!!!



இமைபொழுதும் நின் திருவருள் இன்றி பிரபஞ்சத்தில் எந்த ஒரு ஜீவராசியும் வாழஇயலாது.இந்த எழுத்தும் நினது கருணையாலே ,நின் நுண்ணிய ஆளுமை இன்றி எதுவுமே இல்லை. விழிகள் காணும் இந்த  உலகத்திலும் , விழி காண இயலாத கோடான கோடி கோள்கள் கொண்ட இந்த பிரபஞ்சத்திலும் நின் அருள்ஆட்சியே. அன்பால் கசிந்துருகி ,விழிகள் நீர் சுரந்து ,நெஞ்சம் நிறைந்து,கருணை முற்றிலும் ஆக்கிரமித்து ,நின் பெருமை உணர்ந்து  தொழுததால், எம் நெஞ்சம் ஆனந்தம் அடைந்தது ஒரு சுகம். எல்லாம் நீயே எம் தந்தையே ,எதுவும் இந்த அற்ப பதராகிய மானுட எம் அறிவை கொண்டு இயற்றுதல் என்பது இங்கே ஒன்றுமே இல்லை ஐயனே ,எல்லாம் நீ போட்ட  பிச்சையே,எல்லாம் நினது திருவருளே என எண்ணும் நிலை வரும் போது எமது நெஞ்சமெல்லாம் நீக்கமற சூழ்ந்து கொள்ளும் ,நினது அளவிட முடியா வீரியமிக்க   அன்பெனும் ஈர்ப்புவிசையின் ஒரு துளி உணரும் வாய்ப்புகிட்டுகிறது.இந்த அன்பின் ஒரு துளியிலே ஆயிரம் ஆயிரம் மகான்கள் சித்தர்கள் தவமாய் தவமிருந்து ,சொல்ல இயலா தனமைகளை கிடைத்த வார்த்தை கொண்டு கவிதையாய்,பாசுரமாய்,ஸ்லோகமாய்,இன்னும் என்னற்ற வடிவங்களில் புலம்பியும் அழுதும் விம்மியும் ஆழ்ந்தும் ஆனந்தம் அடைந்தும் எழுதிவைத்துச்சென்றிருக்கிறார்கள் .





ஆழ்ந்து அகன்ற நுண்ணியனே ..எனும் மாணிக்கவாசக பெருமானின் ஒரு வரிக்கு எம்மால் நூறுபக்கங்களுக்கு மேல் விளக்கம் எழுத இயலும்.அந்த அளவுக்கு இந்த வார்த்தை எம்மை இறைநிலை நோக்கி இழுக்கிறது.எவ்வளவு பெரிய அற்புத உண்மை, முற்றிலும்  உணர்ந்த மகான் மாணிக்கவாசகர் என்பது இந்த ஒரு வரியிலேயே உணர்ந்துகொள்ளமுடிகிறது.ஆழ்ந்து அகன்ற நுண்ணியனை அவனின் ஆற்றலை  ஒரே  ஒரு துளி ,இந்த உள்ளத்தில் கொண்டுவந்துவிட்டாலே ,துள்ளிகுதித்து ஆடும் இந்த மனம்.இறை ஆற்றலை உள்ளத்தில் நிரப்பி உப்பிபெருத்து ஆனந்ததாண்டவம் ஆடும் இந்த மனம்.கர்மவினையெல்லாம் மூழ்கிவிடும் இந்த தாண்டவத்தில்.



கேட்பாரற்று சோ...வென கிடக்கும் பிரபஞ்சம் .. வெட்டவெளி வெறும் வெளி...தாய்இல்லை ,தந்தை இல்லை அண்ணன் இல்லை தம்பி இல்லை ,எந்த சொந்தபந்த உறவும் இல்லை ,உழைப்பு இல்லை,உறக்கம் இல்லை எதுவும் இல்லை இங்கே.எதுவுவே இல்லாத  அனாதி ...ஆதி இந்த வெளி ,அகன்று  அகன்று விரிந்துகொண்டே செல்கிறது..அமைதி பேரமைதி  இங்கே குடிகொண்டிருக்கிறது. இதற்கு எங்கே ஒரு முடிவு இருக்கும்  என இது வரை யாரும் கண்டதில்லை ,உணர்ந்ததில்லை.உணர முற்பட்ட ஞானிகள், மகான்கள் எல்லாம் அவர் தத் தம் நிலையிலே இன்னும் மூழ்கிகிடக்கின்றார்கள்.ஆழ்ந்து ஆழ்ந்து, அகன்று அகன்று, செல்லும் இந்த பிரபஞ்சம் தாண்டிய வெளியை ,உங்களால் கற்பனை தான் செய்ய இயலுமா ..? முயன்று பாருங்கள் பிரபஞ்ச இரகசியம் எல்லாம் இங்கே பொதிந்துகிடக்கிறது...

இந்த நுண்ணியனை உணர முற்படும் போதே , அன்பால்  உள்ளம் நிறைந்து ,கருணை ததும்பி வழிகிறது.எந்த உணவும் இன்றி இந்த உடல் ஆற்றல் கிடைக்கபெற்று,அமைதி நிரம்பி ,இறைவெளி நோக்கி பயணம் செய்கிறது. இந்த நுண்ணியனே பிரிக்க முடியாத முதல் அணுவாக மாற்றம் பெறுகிறது.பிறகு அது ஒன்றோடு ஒன்று சேர்ந்து இரண்டாகி ,பல ஆகி ,பரிணாம மாற்றத்திற்கு வித்திடுகிறது.கொஞ்சம் குறிப்பிட்ட அணுக்கள் சேர்ந்தது விண் என்ற மாற்றம் பெறுகிறது.இன்னும் கொஞ்சம் மாறுதல் பெற்று அடர்ந்த காற்றாகிறது.மேலும் மேலும் இறைவெளியின் வெட்டவெளியின் அழுத்தத்தால் வெப்ப காற்றாகி,நெருப்பாக புதிய வடிவம் பெறுகிறது.இன்னும் இன்னும் மோதி அழுத்தும் இறைவெளியால் ,நீராகி பிறகு மண்ணாகும் மாற்றம் பெறுகிறது.ஆக ஒன்றுமில்லா ஒன்றான வெளியில் அதுவே அதன் பயணத்தின் சுழற்சியில் தற்பொழுது விண்ணாகி ,காற்றாகி,நெருப்பாகி,நீராகி,நிலம் ஆகி, மாபெரும் பூதமாகிய பஞ்சபூதமெனும் பெயர்பெறுகிறது.

அதாவது
எனும் நிலமாகி ,(நமது உடலில் மூலாதாரம்)
எனும் நீராகி,(நமது உடலில் ஸ்வாதிஷ்டானம்)
சி எனும் நெருப்பாகி,(நமது உடலில் மணி பூரகம்)
எனும் காற்றாகி, (நமது உடலில் அனாகதம்)
எனும் விண்ணாகி , (நமது உடலில் விசுத்தி)

ஆக நமசிவய மாகி இருக்கிறது.எல்லாம் பஞ்ச பூத கலவையே.நமது கண்ணால் பார்க்கும் தூரம் வரை ,காதால் கேட்கும் ஒலி வரை ,நாவால் சுவைக்கும் சுவை வரை,என  எல்லாமே பஞ்ச பூத கலவையே. ஓரளவிற்கு இந்த ஸ்தூல கருவிகொண்டு உணரலாம்.ஆனால் ஸ்தூலத்தால் உணரஇயலா எண்ணில் அடங்கா வியத்தகு ஆற்றல் இன்னும் விரிந்து கிடப்பது ஏராளம் ஏராளம்.இந்த பஞ்சபூத (நமசிவய) கலவையே ஓர் அறிவு உள்ள உயிராகி ,பிறகு அதுவே இரண்டு,மூன்று ,நான்கு,ஐந்து,ஆறு என  ஆரறிவு உள்ள இந்த இதழ் வாசிக்கும் மானுட ஜீவன் வரை  பரிணாமமாற்றம் பெற்று வந்திருக்கிறது.

இப்பொழுது கொஞ்சம் பின்னோக்கி இந்த பயணத்தை,அதாவது அது கடந்துவந்த பாதையை உணர முற்படுங்கள்,அதாவது ஆரறரிவிலிருந்து ஐந்து ,நான்கு,மூன்று,இரண்டு ,ஒன்று ,பஞ்சபூதம் ,பல அணு ,ஓர் அணு ,அதனுள்ளே இன்னும் உள்செல்ல வெளி ,வெறும் வெட்டவெளி,சுத்த சூன்யம்.....ஆனால் எல்லாம் இந்த சூன்யத்துள்ளே...எல்லாம் இந்த வெளியுள்ளே.... ஆழ்ந்தும் அகன்றதும் இதுவே ...நுணுகி நுணுகி நுண்ணிய மானதுவும் இதுவே.இது இல்லாத பொருள் இல்லை உயிர் இல்லை,ஜடம் இல்லை ,எதுவும் இல்லை, எல்லாவற்றுள்ளும் நீக்கமற நிறைந்திருக்கிறது.

இப்பொழுது
நமசிவாய வாழ்க..!!! ..நாதன் தாள் வாழ்க...!!
இமைப்பொழுதும் என் நெஞ்சில் நீங்காதான் வாழ்க ..!!!  எனும் மாணிக்கவாசக பெருமானின் பாடலை படியுங்கள் .உள்ளம் உணர்ந்து நெஞ்சம் நிறைந்து, நம் நெஞ்சத்துள்ளே , நீக்கமற பஞ்ச பூதமாய் நிறைந்திருக்கும் இறைவனை ,நாமே இறைவனின் ஒரு துளி என்பதை உணர்ந்தும்,நாதனாகிய இறையே எம் உடம்பில் உயிரில் பஞ்சபூதமாய் இருக்கிறது ,அப்படி இருக்கும் இறையே நின் தாள் வாழ்க ..!! என உணர்ந்து சொல்லும் போது ,இந்த மொத்த ஸ்தூலமும் மனமும் உயிரும் எல்லாம் ஒட்டுமொத்தமாக ,இது நான் இல்லை ,இந்த உயிர் நான் இல்லை,எல்லாம் இறையே . எல்லாம் நின் ஒரு துளியே ..!! எம்முள் இந்த பஞ்சபூதமாய் இருக்கும்  இறைவனே நீ வாழ்க ..நின் தாள் வாழ்க ..!! என்று  இறைபெருமை  போற்றி ,ஆனந்ததாண்டவம் ஆடும் அவன்  திருவடிஅருகில் அலைத்துச்செல்லும்.இந்த மாபெரும் ருத்ர சக்தி நம்முள்ளும், வெளியும், உள்ளும், புறமும், மண்ணும், மரமும், பொன்னும், பொருளும், பார்க்கும்,கேட்கும், தொடும் ,நினைக்கும்  என எல்லாமுமாய்  இருந்துகொண்டும் ,நம்மையும் ஆண்டுகொண்டும்,எல்லா அணு முதல் பேரண்டம் வரை  யாவற்றையும் ஆண்டுகொண்டும், இருக்கும் இந்த தத்துவத்தை நீ அறிந்தால் நீ பெரியோன் ,இதனை மறந்தால் நீ சிறியோன்.

இந்த வெட்டவெளி நாயகனின் ஒரு துளி வெளியில்,அந்த  வெட்டவெளியில் இருக்கும் அளவிடமுடியா ஈர்ப்பு அலையாகிய அன்பின் ஒரு துளியை, நாம் பார்க்கும் யாவற்றுள்ளும் ,சூட்சுமமாய்  மிளிரும் இந்த பஞ்சாட்சர தன்மை உணர்ந்து ,வாழ்த்தி ,அதன் பெருமை போற்றி மகிழ்வோம் என ஆழ்ந்து அகன்ற நுண்ணியனின் ஆற்றல் அலைகளோடு அகத்திய உள்ளங்களை  வேறு ஒரு நிகழ்வில் சந்திக்கிறோம்,
வாழ்க வளமுடன்

ஒம்  அகத்தீஸ்வராய நமஹா ..!!!
ஒம்  அகத்தீஸ்வராய நமஹா ..!!!
ஒம்  அகத்தீஸ்வராய நமஹா ..!!!



Thursday, October 26, 2017

ஸ்ரீ மச்சமுனி சித்தர் அய்யா - திருப்பரங்குன்றம்-II




சித்தன் அழைத்தால் தான் சித்தனை பற்றிய அருள் அலைகளை உணரமுடியும்.என்னதான் மனம் விரும்பி வலுகட்டாயமாக சென்றாலும் சித்தன் அழைக்கவில்லை எனில் சித்தரின் தரிசனம் கிடைக்காது.அதிகாலை நேரம் ஒரு கனவு. அதில் ஒரு பெரிய மரம் அதன் அருகே ஒரு மூலிகை செடி அருகே ஒரு பெரிய மலைபாறை ,அதில் அழகிய சித்தர் உருவம் படமாக மிக அழகாக வரையப்பட்டுள்ளது.சித்தரின் பெயர் தெரியவில்லை.அருகிலேயே இருக்கும் மூலிகை அற்புதமான நறுமணம் கமழ்கிறது.சட்டென எழுந்துவிட்டோம் .இன்று ஏதோ ஒரு சித்தரின் அல்லது மகானின் தரிசனம் கிடைக்க போகிறது என்பது மட்டும் தெரிந்தது.

ஏதேனும் ஒரு கோவிலுக்கு செல்லலாம் என முடிவுஎடுத்து திருப்பரங்குன்றம் மலை உச்சியில் இருக்கும் காசிவிஸ்வநாதர் கோவிலுக்கு செல்ல ஆயத்தமாகி கிட்டதட்ட ஒரு  மாலை நான்கு மணிக்கு மெதுவாக மலை அடிவாரம் வந்தோம் .சரியான கூட்டம் ,ஏன் என விசாரித்த  போது ,இன்று சஷ்டி ஆரம்பம் ,இன்று முதல் நாள்  ஆதலால் இதோ  இங்கே தெரிகிறதே சரவணபொய்கை அங்கே குளித்து முருகனை தரிசித்து காப்பு காட்டி விரதம் அனுஷ்டிப்பார்கள் என்றனர்.மெதுவாக கடந்து மேல் செல்ல ஆயத்தமானோம்.மலை எங்கும் அதிக அளவில் பாறைகள் தென்பட்டாலும் ஆங்காங்கே இருக்கும் செடிகொடிகள்,மரங்கள் ,பச்சைபசேலென வளர்ந்த புற்கள் மிக அழகாக பார்க்கவே மிக ரம்மியமாக இருந்தது.நகரஎல்லை வரை மாசுகாற்றை சுவாசித்துவிட்டு ,இதோ இங்கே வீசும் மூலிகை கலந்த காற்றை சுவாசிக்கும் போதே வித்தியாசம் உணரமுடிகிறது.தெள்ளிய மெல்லிய அடர்வு லேசான மாசற்ற காற்று, நன்கு இழுத்து சுவாசிப்பதே ஒரு சுகம். ஒரு ஆரோக்கியம்.மனசும் லேசாகிறது.என்னதான் படி ஏறி மேல் செல்வது கடினமாக இருந்தாலும் ,இந்த தென்றல் ,ஆரோக்கியமான காற்று ,எல்லாத்தையும் மிக சுலபமாக்கிவிடுகிறது,




ஒரு வழியாக மேலே வந்து காசி விஸ்வநாதர் தரிசனம்,கூட்டமே இல்லை இங்கே .அருகிலேயே ஒரு சுனை,சுனையின் அருகிலேயே அய்யாவின்  பக்தர்கள் ,மீனாக  சுனையின் உள்ளே வாழ்ந்துகொண்டிருக்கும் ஸ்ரீ மச்சமுனி அய்யாவை காண சுனையின் அருகிலேயே அமர்ந்து தியானத்தில் இருக்கிறார்கள்,,இரண்டு மூன்று பெரிய மீன்கள் ஆங்கொன்றும் இங்கொன்றுமாக நீரை விட்டு மேலே வருவதும் செல்வதுமாக இருக்கிறது.
வாங்கி வந்த பிஸ்கட் எடுத்து தண்ணீரில் போட மிக அழகாக வந்து சாப்பிடுகிறது.நல்ல பெரிய தாடையும் மீசையும் உள்ள இரண்டு மூன்று மீன்கள் வருவதும் செல்வதுமாக இருக்கிறது.இவற்றுள் சுத்தவெண்மையான நிறம் கொண்ட ஒரு பெரியமீன் இருக்கிறது .அதுவே  ஸ்ரீ மச்சமுனி சித்தர் அய்யா என்கிறார்கள்.







அங்கே ஒரு அன்பர் மஞ்சள் நிறவேஷ்டியுடன் வந்தார் ,கொஞ்சம் தாடிவைத்திருக்கிறார்.நல்ல அன்புள்ளம் நிறைந்தவர் ,அவரையும் எல்லோரும் சாமி என்றழைக்கிறார்கள்.வந்தார் ஒரு வாளி நிறைய தண்ணீர் சுனையிலிருந்து மோந்துவந்து வெளியே வைத்து குளிக்கிறார்.சென்றமுறை வந்தபோது குளிக்கஇயவில்லை.இந்த முறையாவது குளித்தால் நன்றாக இருக்கும் ஆனால் துண்டு எதுவும் எடுத்து வரவில்லையே என எண்ணிக்கொண்டிருக்கும் போதே அந்த சாமி சொல்கிறார்.சும்மா நீங்களும் குளியுங்கள் .துண்டு இல்லையே என கவலைவேண்டாம்.நீங்கள் இங்கிருந்து கீழே செல்வதற்குள் காய்ந்துவிடும் என்றார்,உடனே யாமும்  அங்குள்ள வாளியில் அந்த காசிக்கு நிகரான தீர்த்தத்தை எடுத்து தலையில் ஊற்ற ,மிக அற்புதமாக இருந்தது.

பிறகு அந்த சாமி தாம் வாங்கிவந்த பால்கோவாவை ,சுனை நீரை ஒரு வட்ட மிட்டு அதிலே வைக்க ,பெரிய பெரிய மீன்கள் மேல் சொன்னது போல் இருக்கும் பெரிய நீண்ட மீசைஉள்ள  மீன்கள் ,மிக அழகாக வாங்கி சாப்பிடுகிறது.இவை யாவற்றையும் வீடியோ எடுத்தோம் ஆனால் அவை பதிவாகவில்லை .ஏன் என தெரியவில்லை .மீனை பார்க்கும் ஆர்வத்தில் ஒழுங்காக பதிவுசெய்யாமலும் இருந்திருக்களாம்.

அந்த சாமி அருகிலேயே இருக்கும் சுனையின் மேல் உள்ள பாறையில் அமர்ந்து தியானத்தில் அமர்ந்துவிட்டார்.சிறிது நேரத்தில் அந்த அழகான வெண்மையான  நிறம் உள்ள பெரிய மீன் வந்து வட்டமிட,அங்கே உள்ள யாவரும் ஒம் நமசிவாய எனும் மந்திரம் உச்சரிக்க ,ஒரு வித பரவசநிலை தென்பட்டது.ஸ்ரீ மச்சமுனி அய்யாவே இங்கே மீனாக இருக்கிறார் .ஆக
ஸ்ரீ மச்சமுனி அய்யா தரிசனம் கிடைத்ததால் ஒரு உள்ளம் பூரிப்பு.அற்புதமான காசிக்கு நிகரான கங்கை தீர்த்தம் .இங்குள்ள லிங்கத்தை வழிபட்டாலே அது காசிலிங்கத்தை வழிபட்டதற்கு சமம் என்கிறார்கள்.இந்த தீர்த்தம் பார்க்க பச்சைநிறத்தில் இருக்கிறது.ஆனால் அதன் சுவை மிக அற்புதமாக உள்ளது.மலை பாறையும் ,மூலிகை காற்றும் ,கங்கை தீர்த்தமும்,
அய்யாவின் அருள் அலைகளும் இருப்பதால் இடமே மிக அற்புதமாக இருக்கிறது.நேரம் செல்வதே தெரியவில்லை.அந்த அய்யா சொன்னார் நேற்று அமாவாசை இந்த  இடம் முழுவதும் நல்ல சாம்பிராணி வாசம் வந்தது என்றார். அங்கே அந்த அய்யாவுடன் அருகிலேயே அமர்ந்து ஸ்ரீ லலிதாசகஸ்ரநாமம் பாராயணம் மனதிற்குள்ளே சொல்லிக்கொண்டிருந்தோம் .



நேரம் மாலை ஆறு மணி ஆக அங்கிருந்து அனைவரும் மெதுவாக கீழே இறங்க ஆயத்தமானோம்.அந்த அய்யாவும் கைகளில் ஒரு சில சாக்கு பைகளில் உள்ள காரட்டை அங்குள்ள குரங்குகளுக்கு அள்ளி கொடுத்துக்கொண்டேவந்தார்.கூட்டம் கூட்டமாக குரங்குகள் ,அய்யாவிடம் காரட்டை வாங்கி அழகாக கடித்து உண்ணுகிறது.அய்யாவுடன் யாமும் மெதுவாக கீழே ஒவ்வொரு படியாக இறங்கிக்கொண்டே,"இப்படி ஒரு எண்ணம் எப்படி உங்களுக்கு உதித்தது அய்யா " என கேட்க,

 "இங்கு அடிக்கடி வரும் போது இந்த குரங்குகள் ,வருவோர் செல்வோர் என அனைவரிடமும் ,உணவிற்காக ,பக்தர்கள் கொண்டுவரும் யாவற்றையும் பறிக்கும் செயலில் ஈடுபட்டு ,வருபவர்களுக்கு சிரமத்தை உண்டுபண்ணுகிறது.அதனால் என்ன செய்யலாம் என யோசிக்கும் போது ,ஒவ்வொரு ஞாயிற்றுகிழமையும் இங்கு வரும் ஒரு பக்தர் ,நிறைய காரட் கொண்டுவந்து ,இங்கிருக்கும் குரங்குகளுக்கெல்லாம் கொடுத்தார், அது போல நாமும் தினந்தோறும் செய்தால் என்ன என்று தோணியது ,அன்று எடுத்த மூடிவு .இன்று வரை கிட்டதட்ட நூறு நாட்களுக்கு மேல் ,செய்கிறேன்.அய்யாவின் அருளால் தொடர்ந்துசெய்கிறேன்.அன்றைய மார்க்கெட்டில் என்ன கிடைக்கிறதோ,காரட்,வெள்ளரி,உருளைகிழங்கு என ,ஒவ்வொரு நாளும் நாற்பது கிலோவுக்கு மேல் கொண்டுவந்து ,இங்குள்ள குரங்குகளுக்கெல்லாம் கொடுக்கிறேன்.இதோ இங்கே என்னுடன் வருகிறார்களே ,இவர்கள் கீழேயிருந்து மேல் வரை எம்முடனே வந்து ,இந்த சாக்குபைகளை சுமந்து ,உதவிசெய்கிறார்கள்.ஒரு சில நாளில் நாற்பது கிலோவும் நானே சுமந்து செல்வேன் .எல்லாம் அய்யாவின் அருளாலே ,நாற்பது கிலோவை இவ்வளவு தூரம் அதுவும் மலை உச்சிவரை சுமந்து செல்வது சாதரண விசயமில்லையே.." என்றார்.

தமது சொந்த செலவில் இதை செய்கிறார். இதற்காக யாரிடமும்வசூல் செய்வதில்லை இது ஒரு மிகபெரிய சேவை இது.எம்மால் பாராட்டாமல் இருக்க முடியவில்லை.எல்லாருக்கும் இது போன்ற எண்ணம் வருவதில்லை.வந்தாலும் அதை செயல்படுத்துவதில் இருக்கும் சிரமத்தில் விட்டுவிடுகிறோம்.கருணையும் அன்பும் இருக்கும் உள்ளத்தில் மட்டுமே ,இது போன்ற சேவை நிகழ்கிறது.இவர்களுக்கு சித்தர் அருள் ஆசிகள் எவ்வாறு கிடைக்காமல் இருக்கும்.தன்னலமற்ற சேவை,வாழ்கவளமுடன் .இறைஅருள் துணை நிற்கட்டும் என்று  மனதார வாழ்த்தி விட்டோம்.


இந்த அய்யாவோடு பேசிக்கொண்டே கீழ்நோக்கி இறங்கிக்கொண்டிருக்கிறோம்.இருட்டு சூழ்ந்துகொண்டிருக்கிறது.இறங்கி வரும் ஒரு இடத்தில் ஜவ்வாது வாசம் வந்தது .இது எம்முடன் வரும் அய்யா ஏதேனும் இது  போன்ற நறுமமண திரவியத்தை பூசிஇருப்பார் என விட்டுவிட்டோம்.மீண்டும் கொஞ்சம் படி இறங்க மறுபடியும் ஜவ்வாது வாசம்," அய்யா நீங்கள் எதுவும் ஜவ்வாது பூசிஇருக்கிறீர்களா என கேட்க, .." நீங்கள் தான் நான் சுனையில் குளித்து அய்யாவின் அருகில் தியானம் செய்ததை பார்த்தீர்களே ,எந்த வாசனை திரவியமும் பயன்படுத்தவில்லை.மேலும் தொடர்ந்தார் இங்கு சித்தர் அய்யா வரும் பொழுது ,இது போன்ற ஜவ்வாது ,விபூதி,மூலிகை போன்ற பல நறுமண வாசம் மாறி மாறி வரும் என்பதை பல முறை இங்கே உணர்ந்திருக்கிறேன்.இன்று நீங்களும் உணர்கிறீர்கள் .." என்றார்.அப்படியே பேசிக்கொண்டே  .இந்த மலை முழுவதும் ஆங்காங்கே சித்தர்கள் உலாவருவார்கள் .அவர்கள் வருவதால் ஒரு வித நறுமணம் மேல் சொன்னது போல ,ஜவ்வாது,மூலிகை,துளசி,நறுமணம் மிகுந்த விபூதி போன்றவை மாறி மாறி வரும். என்றார். ஒரு  சதுரமான பரப்பு வந்ததும் ,இங்கு தான் பைரவபெருமான் எமக்கு காட்சி கொடுத்தார் ,என அங்குள்ள பாறையோடு பாறையில் அழகாக பைரவ பெருமானின் நாய் வாகனம் ,இயற்கையிலே இரு காதுகளோடு பாறையிலே இருக்கிறது என்பதை எங்களுக்கு காண்பித்தார்.மேலும் இங்கே ஒரு பத்துநிமிடம் கண்ணை மூடி தியானம் செய்ய ஒரு முனிவர் வந்து ஆசீர்வாதம் செய்வார் என்றார்.இது  இங்கு வரும் நிறைய அன்பர்களுக்கு தெரியவாய்ப்பில்லை.யாரேனும் ஒருவர் விளக்கினால் மட்டுமே எளிதில் உணரமுடியும்.



இருள் கொஞ்சம் கொஞ்சமாக நிறைய ஆக்கிரமிக்க ,இன்னும் கொஞ்சம் கீழே இறங்க ஒரு இடம் வந்ததும் ,எம்முடன் வந்த அய்யா அருகில் அமர்ந்து ,இது அம்பாள் சன்னதி .இங்கு அம்பாள் இருக்கிறாள்.இதோ இதன் எதிரில் அங்கே இருப்பது சப்தகன்னியர் சன்னதி .அம்பாளின் நேர் பின்புறம் துர்க்கை அம்மன் சன்னதி என சொல்லிவிட்டு ,அய்யா தியானத்தில் ஆழ்ந்தார்.எம்முடன் வந்த ஒரு அன்பர்\ ,நீங்கள்  மச்சமுனி அய்யாவின் சுனையில் என்ன மந்திரம் சொன்னிர்கள் என ,கேட்க ,யாமும் ஸ்ரீ லலிதா சகஸ்ர நாமம் பாராயணம் சுருக்கமாக ,விளக்கிக் கொண்டிருந்தேன்..அப்போது ஒரு அற்புத நறுமணம் வீச தொடங்கியது.சுத்தமான பசுவின் நெய் உருக்கினால் என்ன நறுமணம் வருமோ ,அதைவிட நறுமணம் மிகுந்து அம்பாள் இருக்கிறாள் என்று சொன்னாரே அந்த இடம் முழுவதும் ஆக்கிரமித்தது.மச்ச முனி அய்யாவே இங்கே இருக்கிறார் என்பதை யூகிக்க முடிகிறது ..இங்கு தான் இருக்கிறார் அனால் ஸ்தூல கண்களால் காணஇயலவில்லை.அதுவும் அம்பாளின் சன்னதி அருகே,அய்யா வந்து இந்த நறுமணமிக்க நெய்கொண்டு அம்பாளை வழிபாடுசெய்கிறார் என்பது போலவே தோணியது.




இது நாள் வரை சித்தர் அய்யா வந்தால் ஒரு வித நறுமணம் வரும் என்று செவிவழியே கேள்விப்பட்டிருக்கிறோம்.ஆனால் ஸ்தூலத்தால் உணர்ந்து அறிந்தது இதுவே முதல் முறை. அதுவும் அம்பாளின் முன்னே .மிக அற்புதமாக இருந்தது.இந்த நறுமணமும் அம்பாளின் அருள் அலையும் ,சித்தர் அய்யாவின் வருகையும் ,எம்மை எம் உள்ளதை வெகு இலவாக இலவம் பஞ்சைவிட மிக மெல்லியதாக நொடியில் மாற்றியது.எப்படிப்பட்ட நிலையில் மனம் இருந்தாலும் ,இங்கே எல்லாம் தவிடுபொடியாகிவிடுகிறது,அன்பும் கருணையும் நிறைந்திருப்பதால் அதன் வழியே வருவோர்' செல்வோர்' அனைவருக்கும் அதன் தன்மை கிடைக்கிறது.சித்தனின் ஆசி கடல் போல ,யாவருக்கும் பொதுவாய் ,எத்தகைய கடின கரடு முரடான கர்மவினை உடையவரின் மனதினையும் ,அன்பால் ஈர்த்து,ஒரு அற்புதமான அரவணைப்பு தருகிறது.ஒரு சுகம் .ஒரு தெளிவு மனதில், ஒரு அமைதி,ஒரு நிறைவு  ஒரு முழுமை என சொல்ல இயலாத ஒரு சில ஆற்றலை மனது அது தானாகவே பெறுகிறது.இவை யாவும்  இங்குள்ள சித்தனின் நொடிபொழுதில் மாற்றும் ஒரு அற்புதம்.சித்தர் இங்கு தான் இருக்கிறார் .அதனால் ஒரு நறுமணம் என என்னும் போதே நொடியில் மனம் இறை நோக்கிசெல்கிறது.எல்லாம் நொடியிலேயே இருக்கிறது.இது போன்ற நொடிகளில் அப்படியே வாழ்ந்துவிடவேண்டும்.இது போன்று தருணம் இனி என்று வருமோ ,என எண்ணி கண்கள் மூட ,நெஞ்சம் நிறைந்த அன்பு,ஆனந்தம் ஊற்றெடுக்கிறது.எல்லாம் இறையின் செயல் .எல்லாம் இறைவனின் ஆட்சிபுலத்தில் .இதை இந்த மனம் அடிக்கடி மறந்து ,அகங்காரம் சூழ்ந்து ,தனிமையில் சிக்கிக்கொள்கிறது.இது போன்ற தருணங்களில் அது மீண்டும் தமது நீண்ட நெடிய தொடர்பை பெற்றவுடன் துள்ளிகுதித்து ஆனந்தத்தில் திளைக்கிறது.

அய்யா தியானம் முடித்து எழுந்து "இங்கு வந்த சுத்தமான நெய்யின் நறுமணம் நீங்கள் யாவரும் உணர்ந்திருப்பீர்கள் .அய்யாவே நம்முடன் வருகிறார் .மேலும் இது  அம்பாள் வாசம் செய்யும் இடம்.எல்லாம் இங்கே சக்தியின் ஆட்சியே மலை முழுவதும் நடக்கிறது. ஒரு அமாவாசை அன்று நிகழ்ந்த அன்னதானத்திற்கு பிறகு ,ஒரு சில அன்பர்கள் மேலே உள்ள சுனை நீரில் பாத்திரங்களை கழுவிவிட்டார்கள்.அதனால் சுனை நீர் முழுவதும் கலங்கி தன்மை மாறிவிட்டது .இப்படி மாறிவிட்டதே என அய்யாவிடம் வேண்ட,அய்யா அதனை மூன்றே நாளில் சுனை நீர் முழுவதையும் அற்புதமாக மீண்டும் பழைய நிலைக்கு மாற்றிவிட்டார்கள்.,நீங்கள் எல்லாம் மதுரையில் வரலாறு காணாத வெள்ளம் என செய்திகேள்விப்பட்டிருப்பீர்கள் ஒரு சில வாரங்களுக்கு முன்பு, அந்த மலை வெளுத்து வாங்கியதன் முதற்காரணம் இதுவே,அம்பாளின் அருளால் அய்யா சுத்தமாக மாற்றிவிட்டார்  சுனை நீரை" என்றார்.
பிறகு மெதுவாக படியிறங்கி கீழே வந்துவிட்டோம்.அங்கே கடைசி படியின் அருகே ,நுழைபாதையின் அருகில் ஒரு அய்யா அதுவும் இந்த இருளில் ,வெள்ளை வேஷ்டி கொஞ்சம் தாடிஉடன் அமர்ந்திருந்தார்.எம்மோடு வந்த அய்யா ,அவரை பார்த்து " ..சாமி போயிட்டு வர்றேன்...என இரண்டு மூன்று முறை சொல்ல ,அவர் இதை கவனிக்காமல் சிந்தனை வேறு எங்கோ உள்ளவர் போல் இருந்தார்.மீண்டும் இவர் சாமி போயிட்டு வரேன் ..என்று சொல்ல ,கடைசியில் .." ம்ம்ம் .." என்றார்.

அய்யா இவர் யார் என விசாரிக்க "...,சாமி இங்கிருக்கும் சாமி .." என சுருக்கமாக முடித்துக்கொண்டார் .பிறகு அங்கிருந்து விடை பெற்று சென்றுவிட்டார்.ஏற்கனவே நிறைய நிகழ்வுகள் போதும் போதும் என்று சொல்லும் அளவிற்கு ,இறை அலைகள் ,இறை தந்த மாற்றங்கள் ,சித்தர் பெருமானின் அற்புதங்கள் ,அம்பாளின் அருள் அலைகள் என ,உள்ளம் நிறைந்ததால் ,இங்கு உட்காந்திருக்கும் அய்யா பற்றி எண்ணம் இல்லை.

மச்சமுனி சித்தர் அய்யாவின் ஆசி அலைகளோடும் ,அம்பாளின் அருள் அலைகளோடும் ,அகத்திய உள்ளங்களை வேறு ஒரு நிகழ்வில் சந்திக்கிறோம்.

ஒம் அகத்தீஸ்வராய நமஹா ..!!!
ஒம் அகத்தீஸ்வராய நமஹா ...!!!
ஒம் அகத்தீஸ்வராய நமஹா ...!!!



Friday, September 29, 2017

காருண்யவாராம் ...!!!





மதுரையின் centre of attraction ஸ்ரீ மீனாட்சி அம்மன் திருக்கோவில்.வருடம் 365 நாளும் திருவிழா காணும் ஒரே இடம் மதுரை ஸ்ரீ மீனாட்சி அம்மன் திருக்கோவிலே.ஒவ்வொரு மாதமும் ஒரு திருவிழா.ஒவ்வொரு நாளும் ஒரு அழகான நிகழ்வுகள்,நிகழ்ச்சிகள்  என அம்பாளின் அருள் கருணையால் இவை யாவும்  தொடர்ந்தவண்ணம் இருந்துகொண்டு வருவோர் செல்வோர் என அனைவரையும் வியப்பில் ஆழ்த்துகிறது.மதுரையில் இருப்பவர்களே எத்தனை முறை அம்பாளை தரிசனம் செய்யும் வாய்ப்பு கிட்டியது என எண்ணி பாருங்கள்.தினந்தோறும் கிடைத்தால் தலை எழுத்தே மாறிவிடும்.காருண்ய வாராம் நிதிம்.. கருணை கடல்....எல்லையே இல்லாத கருணை நிறைந்தவள்...மீனாட்சி அம்பாளின் தரிசனம் கிடைப்பது  என்பது மிக பெரிய பாக்கியம் அதுவும் அவள் நம்மை அவள் கருணை மழையில் நனையவைத்துவிட்டால் என்றால் அந்த நாள் மிக புனித நாளே அது ஒரு பூர்வ ஜென்ம புண்ணியமே.அம்பாளின் அருள் அலைகள் சூழ்ந்து கருவறையே மிக அற்புதமாக ஜொலிக்கிறது.

கிட்டதட்ட இங்கு வருவோரின்  ஒரு சராசரி மனநிலை என்னவென்றால் அம்பாள் பார்த்து,சுந்தரேசுவரர் பார்த்து,பொற்தாமரை குளம் பார்த்து ,வல்லப சித்தர் ஜீவசமாதி பார்த்து என பல இடங்களை பார்த்து அனைத்தையும் ஒரே நாளில் முடித்துவிட்டு ஊர் திரும்பவேண்டும் என்பதே.ஒரு வித வேகமான மன ஓட்டத்துடன்  இருந்துகொண்டு இருக்கும் அமைதியை துவம்சம் செய்து ,ஒரு சாதரண மனிதர்களின் மன அலையையும்  அவர் அறியாமலே அவரையும் ஒரு வேகமான சூழலில் தள்ளும் நிலைக்கு , சூழலை உருவாக்கிவிடுகிறார்கள்.தாமும் அமைதியை உணராமல் அடுத்தவரையும் அமைதியை உணரமுடியா  நிலை தான் .ஆகா இதிலிருந்து தப்பிக்க நாம் நம்மை சுற்றிலும் ஒரு அருள்காப்பு புலத்தை உருவாக்கிகொள்ளவேண்டும் ,ஒரு வித ஸ்லோகமோ அல்லது  ஏதேனும் ஒரு வித நாமத்தையோ உச்சரித்து நம்மை சுற்றிலும் ஒரு வித அதிர்வு புலத்தை உருவாக்குவது அவசியமாகிறது.


அம்பாளின் தரிசனம் (பொது) என்பது கிட்டத்தட்ட ஒரு அரை மணிநேரம் வரிசையில் நின்று பிறகே கிடைக்கிறது.VIP தரிசனம் ,டிக்கெட் வாங்கி  பார்க்கும் தரிசனம் போன்ற தரிசனங்களில் எமக்கு  பெரிய உடன்பாடு இல்லை. மிக அதிக கூட்டம் இருந்தால் கருவறையின்  அருகில் இருக்கும் ஏதேனும் ஒரு பக்கத்தில் உட்கார்ந்து அருள் அலைகளை உணர்ந்து வருவது சாலசிறந்தது.ஒரளவிற்கு கூட்டம் இருந்தால்  முடிந்தவரை வரிசையில் நின்று இருக்கும் நமது மன அலைசுழல்களை குறைத்துக்கொண்டு ,கொஞ்சம் கொஞ்சமாக அங்கே தவழும் அலைகளை உள்வாங்கி ,கருணையின்  மூலம் நோக்கி செல்வதே உன்னதமானது,அம்பாளின் அருள் கடாட்சம் கிடைத்தால் தான் ,மகான்கள் ,சித்தர்கள் அருள் ஆசி தருகிறார்கள்.அம்பாளின் அருள் கடாட்சம் கிடைத்தால் தான் மழை பொழிகிறது.ஒருமுறை சதுரகிரியில் தந்தை அகத்தியர் அய்யாவின் சீடர் ,ஒரு இளம் சாது அவர் சொன்னார் " இங்கே சதுரகிரியில் மரம் செடி கொடி எல்லாம் மழையின்றி வாடிவிட்டது.நாங்கள் யாவரும் அம்பாளிடம் சென்று முறையிட்டு ,இதோ இங்கே பெய்கிறதே இந்த மழையை வரவழைத்தோம் என்றார்.அவர் சொன்னது போலவே  சுட்டெரிக்கும் வெயில் காலத்தில் அழகிய ஓடை ததும்பி செல்லும் அழகை எம் ஸ்தூல கண்களால் பார்த்தோம். அம்பாளின் அருள் கடாட்சம் இல்லை என்றால் சுபிக்க்ஷம் நிலவாது.அம்பாளின் அருள் கடாட்சம் இல்லைஎன்றால் எல்லாம் சூன்யமே .இயக்கு சக்தி இல்லை என்றால் எதுவுமே இல்லை.



கருணையே வடிவானவள்,அன்பின் நாயகி,,மிக இளமையான தோற்றம் கொண்டவள்.அம்பாளின் அருள் அலைகள் கருவறையில் மட்டும் தானா உள்ளது இங்கே இருக்காதா என என்னும் பொழுதே மிக அழகாக நம் அருகில் வந்து தவழ்கிறது.கருணையோடு இருப்பது என்பது மிக பெரும் பாக்கியம்.ஒரு சிறு துளி போன்ற கருணைஅலையை வைத்துக்கொள்ள இந்த இதயம் போதவில்லை',ஒரு துளியால் நிரம்பி வழிகிறது.இதே இந்த கருணையை கடல் போல் என்றும் வைத்திருக்கிறாளே இவள் இதயம் எத்தகைய வலிமையும் அன்பும் நிறைந்தது.கோடான கோடி ஜீவன்களையும் ஈர்த்து இழுக்கும் அன்பும் கருணையும் நிறைந்த, இவள் தன்மை எப்படியிருக்கும் என்று கற்பனைதான் செய்து பார்க்கமுடியுமா ? இப்படி இந்த கற்பனை, இந்த எண்ணம் தோன்றிய உடனே அம்பாளின் அருள் அலைகள் கொஞ்சம் கொஞ்சமாக நம்மை ,நம் இதயத்தை அவளின் அருள் அலையால் நனையவைத்துவிடுகிறது. கருணை எண்ணத்திலே கொஞ்சம் கொஞ்சமாக வரிசையில் நகர்ந்து அம்பாளின் கருவறை தெரிய ,அவள் முகம் பார்க்க ,கண்கள் எல்லாம் அது தாமாகவே கண்ணீர் மழ்கிறது.இன்று ஏனோ எம்மை இந்த அளவிற்கு எம்மில் கருணையை நிரப்பி இதயத்தை கருணையால் நனையவைத்து அருள்மழை பொலிந்துஎம்மை ஆனந்தகண்ணீரில் மிதக்கவைத்துவிட்டாள்.



ஒரு சிறுதுளிக்கே இத்தகைய மாற்றமா ?அப்படியெனில் என்றுமே கருணையோடு சிலர் இருக்கிறார்களே அவர்கள் எத்தனை அழகு நிறைந்தவர்கள் ,எத்தகைய பாக்கியம் பெற்றவர்கள்.இறைவனின் அருள் அலைகளை கருணை அன்பு எனும் அலைகளால் என்றும் உணர்ந்துகொண்டு ,இறையின் தன்மையை ,எண்ணி வியந்து ,அதை சொல்ல இயலாது கருணையால் எதையும்  பார்ப்பவர்கள்.அன்பு மட்டுமே இவர்களை ஈர்க்க வைக்கிறது.ஏனெனில் இறையே அன்பாக இவர்களிடம் தவழ்கிறது. கருணை நிரம்பிய உள்ளங்கள் எங்கிருந்தாலும் அவர்கள் என்றும் இளமையானவர்கள் .அன்பின் அலைகள் நிரம்பியவர்கள்.இவர்களுக்கு என்ன தேவையோ அதை இயற்கை அருட்பிரசாதமாக வழங்குகிறது.கோவிலில் நுழையும் போது சுத்தமான தாழம்பு குங்குமம் கிடைத்தால் நன்றாக இருக்கும்   எங்கு வாங்கலாம் என எண்ணிக்கொண்டே சென்றதால் என்னவோ ,ஒரு அன்பர் அவர் தாமாகவே வந்து சொல்கிறார்,நான் இங்கு சேலத்திலிருந்து வருகிறேன் ,பதினைந்து நாளுக்கு ஒருமுறை அம்பாளை தரிசிக்க வந்துவிடுவேன்,இங்கே மேல மாசி வீதியில் ஒரு பிராமின் சுத்தமான மஞ்சளில் தாழம்பு குங்குமம் பண்னுறார் .அதே கொஞ்சம் அர்ச்சனை செய்து தினந்தோறும் இட்டுகொள்கிறேன்.மனதிற்கு ஒரு திருப்தியாக இருக்கிறது.அதோடு அதை வாங்கி இட்டுகொண்டால் முகத்தில் எந்தவித அரிப்பு அலர்ஜி இல்லாமல் இருக்கும் என்று சொல்லிவிட்டு சென்றுவிட்டார்.இவர் சொன்னது ஏதோ காதில் வாங்கிகொண்டே யாமும் தொடர,எமது எண்ணமெல்லாம் அம்பாளின் அருள் கருணை பற்றியே இருந்தது வெகு நேரம்.பேச நா எழவில்லை ,ஒரு வித அமைதியை மட்டுமே நாடி அதனுள்ளே மனம் இருக்க ,மெதுவாக வல்லப சித்தர் அருகே வந்து அமர்ந்துவிட்டோம் வெகுநேரம். .எவ்வளவு கூட்டமும் எம்மை துளி கூட பொருட்படுத்தவில்லை,அந்த அளவிற்கு கருணை துளி அதன் வீர்யம் அதன் சக்தி நன்கு வியாபித்துஇருந்தது. அன்று என்ன நமக்கு கிடைக்கிறதோ அதுவே இறைவனின் ஆணை என எடுத்துக்கொண்டு முன்செல்ல ,அன்று நமக்கு எது உணரத்த பட வேண்டுமோ அது மிக அழகாக நடந்தேறுகிறது.



 கொஞ்சம் ஆழ்ந்து உட்செல்ல ,கருணை அலைகள் இங்கிருத்து வியாபிக்கிறது,வியாபித்து விரிந்து விரிந்து செல்கிறது.அம்பாள் கருணையின் கடல்,அவள் ஒரு துளி கருணையை ஒருவர் உணரும் வண்ணம் ஒரே ஒரு துளி கொடுக்க,எவ்வளவு மகிழ்ச்சியாய் சட்டென மாறுகிறது.எவ்வளவு ஆனந்தமாய் நொடியில் திளைக்கிறது இந்த மனம்.மனதிற்கு  ஒரு ஸ்திரத்தன்மையை  கொடுத்து,அன்பும் கருணையும் பெருக்கெடுக்கவைக்கிறது.

ஸ்ரீ மீனாட்சி அம்பாளின் புகழ் பாடும் ஸ்ரீ ஆதிசங்கரர் இயற்றிய ஸ்ரீ மீனாட்சி பஞ்சரத்னம்  கீழே கொடுத்துள்ளோம்.யாவரும் ஒருமுறையேனும் படித்து பின்பு ஸ்ரீ மீனாட்சி  அம்பாள் தரிசனம் செல்ல முற்படுங்கள் ,அம்பாளின் அருள் அலைகள் உணரும் வாய்ப்பு விரைவில் கிட்டும் .

உத்யத்பானு சஹஸ்ரகோடி ஸத்ருசாம் கேயூர ஹாரோஜ்ஜவலாம்
பிம்போஷ்டீம் ஸ்மிததங்க்த பங்க்தி ருசிராம் பீதாம்பராலங்க்ருதாம்
விஷ்ணு ப்ரஹ்ம சுரேந்த்ர ஸேவித பதாம் தத்வ ஸ்வரூபாம் சிவாம்
மீனாக்ஷீம் ப்ரணதோஸ்மி ஸந்ததம் அஹம் காருண்யவாராம் நிதிம்

முக்தாஹார லஸத் கிரீடருசிராம் பூர்ணேந்து வக்த்ர ப்ரபாம்
சிஞ்சந் நூபுர கிண்கிணீ மணிதராம் பத்மப்ரபா பாஸுராம்
ஸர்வாபீஷ்ட பலப்ரதாம் கிரிஸுதாம் வாணீ ரமா ஸேவிதாம்
மீனாக்ஷீம் ப்ரணதோஸ்மி ஸந்ததம் அஹம் காருண்யவாராம் நிதிம் 

ஸ்ரீவித்யாம் சிவவாமபாகநிலயாம் ஹ்ரீம்கார மந்த்ரோஜ்வலாம்
ஸ்ரீசக்ராங்கித பிந்து மத்ய வஸதீம் ஸ்ரீமத் சபாநாயகீம்
ஸ்ரீமத் ஷண்முக விக்னராஜ ஜனனீம் ஸ்ரீமத் ஜகன்மோஹினீம்
மீனாக்ஷீம் ப்ரணதோஸ்மி ஸந்ததம் அஹம் காருண்யவாராம் நிதிம்

ஸ்ரீமத் சுந்தரநாயிகாம் பயஹராம் ஞானப்ரதாம் நிர்மலாம்
ச்யாமாபாம் கமலாசனார்ச்சிதபதாம் நாராயணஸ்யானுஜாம்
வீணா வேணு ம்ருதங்க வாத்ய ரசிகாம் நானாவிதாமம்பிகாம்
மீனாக்ஷீம் ப்ரணதோஸ்மி ஸந்ததம் அஹம் காருண்யவாராம் நிதிம்

நாநா யோகி முநீந்த்ர ஹ்ருந் நிவஸதீம் நாநார்த்த சித்திப்ரதாம்
நாநா புஷ்ப விராஜிதாங்க்ரியுகளாம் நாராயணேனார்ச்சிதாம்
நாதப்ரஹ்மமயீம் பராத்பரதராம் நாநார்த்த தத்வாத்மிகாம்
மீனாக்ஷீம் ப்ரணதோஸ்மி ஸந்ததம் அஹம் காருண்யவாராம் நிதிம்

இந்த சிறிய கட்டுரையோடு மீண்டும் அகத்திய உள்ளங்களை வேறு ஒரு நிகழ்வில் சந்திக்கிறோம்.

ஒம் அகத்தீஸ்வராய நமஹா..!!!
ஒம் அகத்தீஸ்வராய நமஹா..!!!
ஒம் அகத்தீஸ்வராய நமஹா ..!!!

  

Wednesday, August 30, 2017

ஸ்ரீ ராமமுனி அய்யா !!! - மதுரை.



விஷ்வரூபமாகி மகா விஷ்வரூபமாகி விரிந்து விரிந்து   எங்கும்  எங்கெங்கும் வியாபித்திருக்கும்  அகண்டாகார  பேரொளி நாயகனே !! தாங்கள் ஒருவனே என்றும் இருக்கிறீர்கள் .தாங்கள் ஒருவனே காலத்தின் நாயகன் .கண்ணயர்ந்து தூங்கியது போல கடந்து சென்ற எமது  கடந்த கால தலைவனும் தாங்களே ..!! எமது நினைவு தெரிந்த ஆரம்ப நாள் முதல் யாம் தங்களிடமே ,எமது பல் வேறு  கோரிக்கைகளையும் ,வாழ்வின் பல்வேறு முக்கிய நிகழ்வுகளையும் அவைகளை எதிர்கொள்ள இயலாது துவன்றும், அழுதும்,வீழ்ந்தும் , விம்மியும் விழி பிதுங்கியும்  இருந்தோம் அப்போது தாங்களே எமக்கு தமது அருள் தந்து ,எம்மை தாங்கொணா துயரத்திலிருந்து  பல முறை விடுவித்தீர்கள்.

இன்றைய  நாள்  முடிந்தவரை நிம்மதியாக இருக்கவியல்கிறோம்,விதியால் அச்சு பிசகாமல் ,எதை எதைஎல்லாம்  எதிர்கொள்ளவேண்டுமோ அதையெல்லாம் எதிர்கொள்ளச்செய்து,  மிக அற்புதமாக  நிகழ்வை நிகழ்த்தி, இன்பம் துன்பம் பேரின்பம் அமைதி என  எம் மனதினை பல மாற்றங்களுக்கு உட்படுத்திஇருக்கீறீர்கள்.  தாங்களே இவை யாவற்றிற்கும்  காரண கர்த்தா ,தலைவன் என்பதை பலமுறை  மறந்திருக்கிறோம். ! பகவானே !! இனிவரும் காலமும் தாங்களே எமது நாயகன் !! நேற்றும் இன்றும் நாளையும் என எக்காலத்திற்கும் தாங்களே சூட்சுமமாக இருந்து கொண்டு பல்வேறு விந்தைகள் புரிவதும் தாங்களே !! தாங்கள் ஒருவனே  தலைவன்..... என்றும் என்றென்றும்...  தாங்களே தலைவன் ..!!நின் பெருமை உணர்ந்து, நின் ஆற்றல்  உணர்ந்து, நின் வியத்தகு நுட்பம்  உணர்ந்து,நின் கருணை  உணர்ந்து,செய்வதறியாது அன்பால் உள்ளம் மகிழ்ந்து ,நெஞ்சம் நிறைந்து , கண்ணீர் மழ்கி ,நின் திருவடியில் சாஷ்டாங்க நமஸ்காரம் செய்து சரணாகதி அடைகிறோம் .அய்யனே !! நின் திருவருள்  மழை என்றும் தொடரட்டும் ..!!




கண் இமைக்கும் நேரத்தில் கற்பனைகெட்டாத பல ஆயிரம் ஆயிரம் கோள்களை உருவாக்கியும் ,பல ஆயிரம் ஆயிரம் கோள்களை நொடிப்பொழுதில் பஸ்பமாக்கியும் புரிய இயலா விந்தைபுரிகிறீர்கள்.கோடான கோடி ஜீவராசிகளை படைத்தும் , அதில் எண்ணில் அடங்கா குணாதிசயங்களை உருவாக்கியும் ,அனைத்தையும் ,அன்பால் அரவணைத்தும் ,அமுது ஊட்டியும் ,கால மாற்றங்களை ஏற்படுத்தியும் ,படைத்தும் காத்தும்,அழித்தும் கற்பனைக்கு எட்டாத செயல் புரியும் விந்தை நாயகனே எங்கும் எங்கெங்குமாய் வியாபித்திருக்கும் சர்வ வியாபியே !!
 சிற்றெரும்பின்அறிவு போல எமது அறிவு ,இதை வைத்துகொண்டு அகண்டாகார பூத நாயகனின் சர்வவல்லமையை எப்படி ஒரு துளியாவது அறியமுடியும் .ஒரு துளி அன்பால் நின் சர்வேஸ்வர தன்மையை உணர வியல்கிறோம .ஆனால் நின் ஆற்றல் எதிர்கொள் எங்கெனம் என தெரியாது விழி பிதுங்கி நின் அன்பெனும் மாய வலையில் வீழ்ந்து எம்மை யாமே மறந்தோம்  பலமுறை.



ஒரு முறை  மதுரை சென்ற போது  ஸ்ரீ மீனாஷி அம்மன் கோவில் அருகிலே உள்ள கடைகள் நிறைந்த பாதையில் (மேற்கு மாசி வீதியில்) , சரியான போக்குவரத்து நெரிசலில் மாட்டிக்கொண்டோம். முன்னரும் செல்ல முடியவில்லை பின்னேயும் செல்ல இயவில்லை.என்ன செயலாம் என யோசித்த போது ,எமக்கு பக்கவாட்டில் இடதுபுறத்தில் ஒரு வழி மட்டுமே செல்ல முடிந்து ,அங்கு மட்டுமே செல்ல முடியும் .எனவே வேறு வழியின்றி அங்கேயே சென்றுவிட்டோம். அது ஒரு அற்புதமான கோவில் ,ஸ்ரீ மதனகோபால சுவாமி கோவில்.மிக பழமையான கோவில்,இங்கே ஒரு சில முறை வந்திருக்கிறோம் .ஆனால் இப்படி ஒரு போக்குவரத்து நெரிசலில் மாட்டிகொண்டு வேறு வழியின்றி கோவிலுக்கு செல்லசெண்டும் என்று வலுக்கட்டாயமாக செல்வது என்பது  இதுவே முதல் முறை.

வழக்கம் போல ஸ்ரீ பத்மநாம சுவாமியை வணங்கி ,ஸ்ரீ லக்ஷ்மிஹயக்ரீவர், ஸ்ரீ தாயார், ஆஞ்சநேயர் யாவரையும் வணங்கி ,தூண்கள் நிறைந்த ஒரு சிறிய மண்டபத்தில் அமர்ந்தோம். அருகே ஸ்ரீ ராமானுஜர் சிலை இருந்தது.கொஞ்சம் கொஞ்சமாக  நேரம் செல்ல செல்ல இடமே மிக அற்புதமாக யாருமின்றி மிக அமைதியாக இருந்தது.எமது மனமும் அமைதியோடு இருந்தது .எனவே ஸ்ரீ லலிதா சகஸ்ரநாமம் சொல்லலாம் என எண்ணி ,ராமானுஜர் அருகில் உள்ள தூண்களில் ஒரு தூணில் சாய்ந்துகொண்டு அப்படியே அமர்ந்து லலிதாம்பிகையின் அருள் ஒளி வீசும் சொற்களில் மனம் லயித்து ,சொல்லிமுடித்து அங்கேயே  சிறிது நேரம் அமைதியான சூழலில் உள்ள அமைதியையும் அதன் மூல காரணம் யாதுவாக இருக்கும் என எண்ணிக்கொண்டே சிறிதே கண் மூட ,கொஞ்சம் கொஞ்சமாக எமை மறந்தோம்.

ஒரு அமைதியான அலை மிகுந்த இடத்தில் இருப்பதாக உணர்ந்தோம் .யாருமே இல்லை இங்கும் அங்கும் இருக்கும் தூண்கள் அதற்கு இடையே உள்ள வெளி மட்டுமே தெரிகிறது.அப்படியே கவனிக்கிறோம் சட்டென ஒருவர் தூணிற்கு அருகில் நிற்கிறார்.யாருமே இல்லாத நேரத்தில் சட்டென முன்பின் அறிமுகம் இல்லாத ஒருவரை பார்ப்பதால் சற்றே உடம்பில் ஒரு சிலிர்ப்பு .   நீண்ட கருமையான தாடி ,சற்றே கருமையான  தேகம் ,அழுக்கான வேஷ்டி,சட்டை எதுவும் அணியவில்லை,ஓர்அளவிற்கு நீண்ட தலைமுடி,இப்படி இருக்கும் யார் இவர் என ,அவர் கண்களை உற்று நோக்க வியல்கிறோம் ,சுத்தமாக அவர் கண்களை எம்மால் ஈடுகொடுத்து பார்க்க முடியவில்லை ,ஒரு வித அருள் அலைகள் திணிவு பெற்று ,அருள் அலைகளால் தீப்பொறி கிளம்பும் அற்புத ஒளி பொருந்திய கண்கள் .எம்மை அறியாமலேயே கைகூப்பி வணங்க ,அவர் எமது சூட்சும தேகத்தை பார்க்கிறார்.அவ்வளவு தான் அதற்கு மேல் அங்கே என்ன நடந்தது என எமக்கு தெரியவில்லை.கண்விழித்து எழுந்தேன் . ஒரு அன்பர் அங்கே, அவரும் ஒரு அழுக்குவேட்டியுடன் கோவிலை வலம் வருகிறார்..எமது அருகே வந்து பிறகு அங்கிருந்து மீண்டும் கோவில் புறகாரம் வருகிறார்.ஒரு சாதாரண மனிதர் போலவே இருந்தார் .ஒரு பாதி புறகாரதிற்கு யாமும் அவர் பின்னே செல்ல நேர்ந்தது .ஏன் என தெரியவில்லை .அங்கிருக்கும்  கஜலெட்சுமியை வணங்கினார்.பிறகு அப்படியே ஆண்டாள் தாயார் இருக்கும் இடம் சென்றார் .அதன் அருகிலேயே இருக்கும் இரண்டு தூண்களில் இருக்கும் ஆஞ்சநேயர் மற்றொரு தூணில் இருக்கும் சிற்பம் இவை இரண்டை மட்டும் தூணோடு வலம் வந்து , ஒரு தட்டு தட்டி ,ஏதோ எமக்கு சொல்வது போல இதையும் வணங்கு என்று சொல்லாமல் சொல்லி ,பிறகு அங்கிருந்து கிளம்பி சென்றுவிட்டார் . பிறகு அவர் எங்கே சென்றார் என தெரியவில்லை.




ஆண்டாள் சன்னதிக்கு நேர் எதிரே இருக்கும் ஸ்ரீ ராமமுனி அய்யா ஜீவ சமாதிக்கு வந்தோம்.சாஷ்டாங்க நமஸ்காரம் செய்தோம்.தீப்பொறி ததும்பும் கண்கள் அய்யாவுடையதே என்பதை இங்கே உணர்கிறோம்.அய்யாவின் சூட்சும தேகமே இங்கே அற்புதமாக , இங்கும் அங்கும்  நடமாடி ,வரும் யாவரையும் அவர் தம் உள்ளத்தில் உறங்கும் உண்மையான தேடல்களை  பரிசீலனை செய்து அருள் ஆசி வழங்குகிறார் என்பதை உணர்கிறோம்.அய்யா  ஒரு அம்பாள் உபாசகர் .அம்பாளின் மீது அதிக பக்தி ஈடுபாடு உடையவர் என்பதை உணர்கிறோம்.இக்கோவிலில் அடிஎடுத்து வைக்கும் அனைவரின் எண்ண ஓட்டங்களையும் கவணிக்கிறார் .யார் வரினும் அவரிடம் தொடர்ந்து வருவது அவர் செய்த பாவமும் புண்ணியமே .ஸ்லோகங்கள் ,ஆழ்ந்த இறைவழிபாடு ,பிரதிபலன் பார்க்காமல் செய்த உதவி இவை யாவும்  செய்பவரின் அவர் தம் சூட்சும தேகத்தை  மிக அழகாக மிளிரவைக்கிறது .இந்த மிளிர்வு மகான்களை ஈர்க்கிறது.வாய் திறந்து இதை செய்தேன் அதை செய்தேன் என சொல்ல தேவைஇல்லை இங்கே. எல்லாம் அவரவர் தம் சூட்சும தேகம் சொல்லாமல் சொல்கிறது மகான்கள் முன்னே.அன்பெனும் இறை தன்மை மிகுதியால் இங்கே இறைவனை வணங்க வரும் அன்பர்களின் சூட்சுமம்  கணித்து  துயர் நீக்குகிறார் அய்யா என்பதை உணர்கிறோம்.அற்புதமான அய்யா.இங்கே இருக்கும் சிற்பத்திற்கும் யாம் பார்த்த சூட்சும தரிசனத்திற்கும் நிறைய வேறுபாடு இருக்கிறது.



எம்மை இங்கே  கவர்ந்தது மகான்களின் அலைநீளம் .மகான்களின் அலைநீளம் மிக அற்புதமான விசயம்.ஒன்றோடு ஒன்று தொடர்புடைய நிகழ்வுகள் ஒரே நேர்கோட்டில் இருப்பது போல மிக அழகாக நிறைவேறுகிறது. ஒருவரை அழைப்பதும் அதற்கான கர்மவினை காரணமும் ,அதன் நிவர்த்தியும் எல்லாம் அச்சு பிசகாத நேர்த்தியும் பிரமிக்க வைக்கிறது.அவர்கள் அலைநீளம் சாதாரண மனிதனின் அலை நீளம் போல இல்லை.அவர்கள் சொல்லும் எதுவும் நடைமுறைக்கு வருகிறது.எது சாத்தியமோ எது நிகழுமோ அதை அழகாக வரும் முன்னரே கணித்து சொல்கிறார்கள்.அதை அந்த அலைநீளத்தில் மிக அழகாக சேர்ந்துகொள்கிறது.

உதாரணமாக  கர்மவினை தாக்கத்தால் நன்கு அடிபட்டு ,நல்ல சம்மட்டி அடி வாங்கி,எங்கே வழி இதிலிருந்து தப்பித்து பிழைக்க ஏதேனும் ஒரு சிறு வழியாவது கிடைக்காதா எனும் நிலையில் இருக்கும் போது ,யாரோ ஒருவர்  நமக்கு  நன்கு உணரும் வண்ணம் ,இங்கே பாருப்பா ,இதோ இப்படி செல்லப்பா, விரைவில் விடியலை நோக்கி செல்ல இப்படியும் ஒரு வழி இருக்கிறது என்று  பாதையை காண்பிப்பவர்கள் ,சொல்லாமல் சொல்பவர்கள் மகான்கள்.இங்கே அவர்கள்  பணமோ அல்லது பொருளோ எதுவும் தரவில்லை.வெறும் நம்பிக்கையை நம் மனதிலே ஒரு சுழல் போல எழசெய்து மிக அற்புதமாக செயல்படுத்துகிறார்கள்.எந்த மகானும் என்னை வந்து வணங்குப்பா என்று சொல்லவில்லை .கர்மவினை தாக்கம் குறைய நாம் தான் சென்று அவர்கள் ஆசி பெற வணங்க வேண்டும்.அவர்களை வணங்குவதால் நம் மனதில் பிறக்கும் புதிய ஒளி. அதுவே நெஞ்சத்தில் சேர்ந்து ,மனதினை மெல்ல மெல்ல வலுவூட்டி ,விழிப்புறச்செய்து  ஒரு பிரகாசமான வெளிச்சத்தை நோக்கி நம் வாழ்வை பயணிக்க வைக்கும் என்பது உண்மை.

வேலைப்பளு காரணமாக வெயிலில் நன்கு அலைந்து திரிந்து ,நமக்கு தாகம் ஏற்படுகிறபோது யாரேனும் கொஞ்சம் நீர் தந்தால்நன்றாக இருக்கும் என்று  எண்ணிக்கொண்டிருக்கும்போதே ,யாரேனும் ஒருவர் வந்து, கொஞ்சம் தண்ணீர் அருந்துங்களே என தருகிறபோது .அப்பப்பா எத்தனை  ஆனந்தம் கொள்ளும்,தேவையான போது,சரியானநேரத்தில் செய்யும்உதவி.அதுவும் ஒரு உயிருக்கு என்ன உண்மையான தேவையோ அதை கொடுத்து உதவுவது என்பது மிகப்பெரும் புண்ணியம்.கிட்டதட்ட இறையின் தன்மை .!!  இப்படி சரியாகவே செய்துகொண்டிருக்கும்  மிக உன்னதமான செயல் , மகான்களை மானுட முறையிலிருந்து மிக அதீத உயரத்திற்கு உயர்த்துகிறது.

இதற்கு முன்னர் ஒரு  சில முறை வரும் போதெல்லாம் மிக சாதரணமாகவே இக்கோவிலுக்கு வந்து சென்றிருக்கிறோம்.அப்பொழுது இங்கே ஒரு அய்யா இருக்கிறார்கள் என்பதெல்லாம் சுத்தமாக தெரியாது. சாதாரணமாக இருந்ததும் இதே மனம் தான்.இன்று மகானின் அருள் ஆசி பெற்று சற்றே வலுவுடன் இருப்பதும் இதே மனம் தான் .ஒரு அற்புதமான அலைநீளத்தில் அவர்கள் இருக்கிறார்கள்.கொஞ்சம் இங்கே அங்கே என தொட்டும் தொடாமல் ஒரு அலைநீளத்தில் , லலிதா சகஸ்ரநாமம் ,விஷ்ணுசகஸ்ரநாமம்,ருத்ரம் போன்ற ஏதேனும் ஒரு ஸ்லோகம் சொல்லியோ அல்லது தியானம் செய்தோ அல்லது எதுவுமே செய்யாமல் மனதினை ஒரு அற்புதமான அலைநீளத்திற்கு கொண்டுசெல்லும் திறமை இருந்தாலே,மகான்கள் அருள் ஆசி அலைகளை பெறலாம்.அதுவும் அவர்களே அழைத்தால் கண்டிப்பாக அருள் ஆசியோ அல்லது சூட்சும தரிசனமோ பெற முடியும் என்பது  எமது அனுபவம்.


அன்பின் அலைநீளம்  என்பது மிகஅதிர்வு குறைந்த மனஅலை சுழல்களால்  நிரம்பியது.மனதின் அதிர்வை சற்றே குறைத்து,சற்றே உள்நோக்க ,அமைதியின் நுனி நோக்கி செல்லும்,இன்னும் இன்னும் இப்படி சற்றே உள் கடந்து செல்ல செல்ல ,ஒரு மென்மையான மிக தெளிவான transparent ஆக ஒரு நிலைக்கு செல்லும். இங்கே சலனம் சப்தம் எதுவுமின்றி ஒரு ஆழ்ந்த நிலையில் இருக்கும்.இதுவே இன்னும் தொடர ஒரு அமைதி அலைகளை உணர இயலும் .இந்த அமைதி அலைகள் தொடங்கும் இடமே ஒரு  அற்புதமான அலை இயக்கம் நோக்கி  நம்மை செல்ல வைக்கும்.  பார்க்கும், கேட்கும், தொடும், சுவைக்கும், என அணைத்து  ஜடபொருட்களிலும்  மற்றும்  ஜீவன்களிலும் இருக்கும் ஒரு அலை ஓட்டத்தோடு பின்னி பிணைந்து  பிறகு அதுவே  நம்முள்ளும் இருப்பதை  உணரலாம்.ஒரே ஒரு அற்புத  இந்த அன்பெனும்அலை இயக்கம் கோடான கோடி ஜீவன்களிலும் அதை படைத்த பிரம்மாண்ட பேரண்ட நாயகனிடமும்  தவழும்  விந்தை. இதுவே அன்பின்  அலை.ஈர்க்கும் இறைவனின் தன்மை அறிய உதவும் அலை. பசுமையான இலைகளிலும் அதன் நுனியில் இருக்கும் நீர்த்துளியிலும் வியாபித்திருக்கும் ஒரு அலை இயக்கம். மிக மென்மையான அலை இயக்கம்.அடர்ந்து படர்ந்து எங்கும் எங்கெங்கும் வியாபிக்கும் தன்மையுள்ள ஒரு வித ஈர்ப்புஉள்ள ஜீவ அலைகள் நிறைந்த அலை இயக்கம்..உலகமே இதன் தன்மையால் இந்த அன்பெனும் ஈர்ப்பு குறையாமல்  ஒன்றை ஒன்று தள்ளியும் ஒன்றோடு ஒன்று ஈர்த்தும் ஒரு balanced நிலையில் ஆங்காங்கே நிலைநிறுத்தி இயங்கும்  அற்புதமும் அதன் மூல காரணமும்  இந்த அன்பெனும் ஈர்ப்பு அலை பிடித்தால், கண்டிப்பாக உணர இயலும்.அய்யாவின் அருள் ஆசி அலைகளோடு அகத்திய உள்ளங்களை விரைவில் வேறு ஒரு நிகழ்வில் சந்திக்கிறோம்

ஒம் அகத்தீஸ்வராய நமஹா !
ஒம் அகத்தீஸ்வராய நமஹா !
ஒம் அகத்தீஸ்வராய நமஹா !



Monday, July 17, 2017

ஸ்ரீ லலிதம் .!!!





ஸிந்தூராருண-விக்ரஹாம்-த்ரிநயனாம் மாணிக்ய மௌலிஸ்புரத் 
தாரநாயக-சேகராம்  ஸ்மிதமுகீம்-ஆபீன-வக்ஷோருஹாம் 
பாணிப்யாம்-அளிபூர்ண-ரத்ன-சஷகம்-ரக்தோத்பலம் பிப்ரதீம் 
சௌம்யாம் ரத்ன-கடஸ்த-ரக்தசரணாம் த்யாயேத் பராம் அம்பிகாம் .....


லலிதம் என்றால் அழகு. லலிதம் என்றால் சாந்தம். லலிதம் என்றால் மென்மை. லலிதம் என்றால் அன்பு .லலிதம் என்றால்  ஆனந்தம்.லலிதம் என்ற வார்த்தையே அழகு.  அழகே நிறைந்தவள் அழகு மட்டுமா ? அறிவும் நிறைந்தவள் .அறிவு என்றால் நம்மிடம் உள்ள அறிவா இல்லை .ஞானம்,எதையும் கணிக்கும் நுட்பம் ,ஆழ்ந்த அகன்ற நீண்ட நெடிய விசால பார்வை ,எதையும் அதன் நுனி ஆழம் வரை சென்று ,நீ யார் ? உனக்கு என்ன தேவை ? உன் மூலம் என்ன ? உன் சூட்சும உடலில்  உறைந்துகிடக்கும் தன்மை என்ன ? உமது இடரின் மூலகாரணமும் அதன் தீர்வும் ஷன பொழுதில் அறிந்தவள் ! உனக்கும்  உனது நீண்ட நெடிய இறைக்கும் உள்ள ஆதி மூலம்  நோக்கும் திறம் தெரிந்தவள் ! அதிநுட்பம் நிறைந்த  எதையும் கணிக்கும் ஒரு ஞானப்பார்வை உடையவள்! .அன்பால் கருணையால் அகிலத்தையே ஆழ்ந்து ,யாவற்றையும் தம் சூட்சும பார்வையால் ஊடுறுவி அரசாட்சி செய்பவள்.!!! எம்பெருமானின் நாயகி !! எல்லையில்லா கருணை நிறைந்த ஸ்ரீ லலிதா எனும் நாமத்திற்கு சொந்தக்காரி !!


                                   



அண்டசராசர ஜீவன்களையும் ஷன பொழுதில் அதன் நிலை அறியும் தன்மை நிறைந்த ஸ்ரீ மஹாராஜ்ஞீ.அழகே முழுவதும் நிறைந்தவள் .தகதகவென ஜொலிக்கும் செந்தீ பிம்பம் போன்ற தேகம்,  செக்கச்செவேல் என சூரியனை மிஞ்சும் சிவப்பு நிறம் உடைவள்.கண் கூசும் பிரகாசம் உடையவள்,என்றும் அழகிய புன்னகை முகத்துடன் அருள் ஆட்சி செய்பவள் .எந்தவித பாரபட்சமும் இன்றி ,யாவருக்கும் அருள் தந்து,அவர்களுக்கு முக்தி அளிப்பவள்.அழகான முகம் ,அற்புதமான ஒளி நிறைந்த தேகம். புன்னகை என்றும் நிறைந்தவள்.கருணா ஸாகரம் ,கருணை கடல் போல நிறைந்து ,அது  அணு அளவு கூட குறையாமல் ,தம்மை வணங்கும் யாவருக்கும் ,எந்தவித பாரபட்சமும் இன்றி ,அவர் தம் சூட்சும தேகத்துள் உள்நோக்கி ,இன்றைய மானுட ஜென்ம கர்ம வினையை மட்டும் நீக்காமல் ,இன்னும் உட்சென்று அவருக்கு முக்தி அளிப்பவள் ,பிறவா நிலை அருள்பவள். இப்படி ஒரு விக்ரஹம் ,ஒரு ஒளி உருவ தேகம் எப்படி இருக்கும் என கற்பனை செய்து பார்க்க முடியுமா உங்களால் ?  கற்பனை தான் செய்து பாருங்களேன் .அம்பாளின் அருள் அலைகள் கொஞ்சம் கொஞ்சமாக சூழ்ந்து ,மெல்ல மெல்ல ஒரு இனம் புரியா சாந்த அலைகள் நம்மை சூழ்ந்துகொள்ளும் ,இது போன்ற தெய்வீக கற்பனை, முதலில் மனதினை அதன் வெற்றிடங்களை அது தானே சாந்த அலைகளால் நிரப்பி நிறைவு செய்யும், நம்முள் இருக்கும் சின்ன சின்ன இடர் யாவும் ஏதோ எங்கோ மறைந்து  கொஞ்சம் கொஞ்சமாக , அருள் அலைகள் நெஞ்சம் எங்கும் சூழ்ந்து ,ஆழ்ந்து ,இந்த ஆயிரம் ஆயிரம் சூரிய கோடி கதிர் அலைகள் நிறைந்த ஜோதியை நோக்கி அழைத்துச்சென்று அவள் அருள் ஆசிகள் பெற்றுத்தரும் என்பது அசைக்கமுடியா நம்பிக்கை.




ஸ்ரீ லலிதா சகஸ்ரநாமம் என்பது மிகப்பெரிய ஸாகரம். எத்தனையோ கோடி கோடி நுணுக்கங்கள் ,நிகழ்வுகள்,சூட்சுமங்கள் நிறைந்தது .அதன் தாத்பர்யம் உணர்தல் என்பது ஒரு பிறவியில் முடியாது .அம்பாளின் அழகும் ,அவளின் ஒவ்வொரு நாமங்களுக்கு உண்டான அர்த்தங்களும் ,சரியான உச்சரிப்பும் அது  நம் மனதுள் ,உடலுள்,சூட்சும தேகத்துள் ஏற்படுத்தும் அதிர்வுகளும் ,அதன் அற்புதமான விளைவுகளும் விவரிக்க இந்த மானுட ஜென்மம் போதாது.தந்தையின் அருள் ஆசியால் ஸ்ரீ லலிதா சகஸ்ரநாமம் பற்றிய சிந்தனையும்,அதை பாராயணம் செய்யும் பாக்கியமும் எமக்கு கிட்டியது .ஏதோ ஓரிரு முறை மட்டும் சொல்வோம் என ஆரம்பித்து தான் ,ஆனால் இதை இன்றுவரை எம்மால் முடிந்தவரை பாராயணம் செய்துகொண்டிருக்கிறோம்.இதை சொல்வதால் ,எமக்குள் உண்டான மாற்றங்கள் ஏராளம் ஏராளம்.எல்லாம் முக்தியை நோக்கியே அழைத்துச்செல்கிறது.இது வேண்டும் ,இந்த பிரச்சனை சரியாக வேண்டும்,இன்னும் இது போல வேண்டுகோள்  நிறைய இருக்கிறது ,இவை எல்லாம் இந்த ஸ்ரீ லலிதா சகஸ்ரநாமம் சொல்வதால் வெகு விரைவில் அது சரியாக வேண்டும் என்ற எதிர்பார்ப்போடு இதை பாராயணம் செய்பவர்களுக்கு எதுவும் நடக்காது. எந்த பிரச்சனையும் தீர்க்க வரமாட்டாள்.அவர்கள் எல்லாம்  சும்மா பேசாமல் இருப்பது நல்லது.ஏனெனில்  முக்தியை ஏற்க அவ்வளவு எளிதில் யாரும் வர இயலாது,
                                 



எந்த எதிர்பார்ப்பும் இன்றி,என் கடன் பணி செய்து கிடப்பது போல ,பாராயணம் செய்ய  செய்ய ,காரணமே இல்லாமல்,வந்து அருள் ஆசி வழங்குவாள்.தெளிந்த சிந்தனையோடு ஆராய அவளின் ஆசி அலைகள் நம்மை  ஒரு பாதுகாப்பு வளையம் காப்பது போல காத்து,அரவணைத்து அருள் தந்து,நம்மை திவ்யமாக, ஆனந்தமாக வைத்து ,அவள் தம் சூட்சும பார்வையால் நம்மை திக்கு முக்காட செய்துவிடுவாள்.அணு ஷனமும் சிவனை விட்டு பிரியாத சிவாங்கினி .மூவுலகை ஆள்பவள் .தூய அன்பு அலைகள் சூழ்ந்து யாவற்றையும் ஈர்ப்பவள்.அளவிட முடியா சக்தி நிறைந்தவள்.

அடி மட்டநிலையில் ஒருவன் இருக்கிறான் என்றால் அவன் இது போன்ற ஸ்ரீ லலிதா சகஸ்ரநாமங்களை சொல்வானேயானால்  (அர்த்தம்  தெரிந்தோ தெரியாமலோ ) ,சொல்பனின் நிலை அடிமட்ட நிலையிலிருந்து ,அவன் நினைத்துபார்க்க முடியாத அளவிற்கு உயரும்.அந்த அளவிற்கு அருள் அலைகளை தாண்டவம் ஆட செய்து அசரவைத்துவிடுவாள்.

click below link  to download the PDF
  ஸ்ரீ லலிதா சகஸ்ரநாம ஸ்தோத்ரம்





மதுரை மீனாஷி அம்மன் கோவிலும் அதன் சுற்றியுள்ள பகுதியும் என்றும் மக்கள் கூட்டம் நிறைந்தும் ,ஒரு வித பரபரப்புடன் காணப்படும்.ஆனால் இவ்வளவு பரபரப்புக்கு மத்தியிலும் அம்பாளின் அருள் அலை மிக அற்புதமாக அருள் ஆட்சிநடத்திக்கொண்டிருக்கிறது. மகான்களும் சித்தர்களும் ஆங்காங்கே அருள் ஆசிதருகிறார்கள்.ஸ்ரீ மீனாஷி அம்பாளின் தரிசனம் முடித்து வெளியே வந்து பிறகு  சுந்தரேஸ்வரர் தரிசனமும் பெற்று ஒரு நீண்ட வலம்வரளாம் என எண்ணி ,முக்குருணி விநாயர் தரிசனம் பெற்று அதன் வழியே பிரகாரம் தொடர்ந்து   மெதுவாக வந்தோம்.மேலும் அதன் வழியே செல்ல ஒரு மூலையில்  ஒரு சிவலிங்கம் இருக்கிறது.(அது ஒரு ஐயாவின் ஜீவ சமாதி என்கிறார்கள்.) அதன் அருகிலேயே சென்று வணங்கி ,கொஞ்சம் பத்துஅடி தூரத்தில் அமர்ந்துகொண்டோம். ஏனெனில் ஜீவ சமாதி அருகே அய்யாவின் அன்பர்கள் தொடர்ந்து தியானம் செய்கிறார்கள்.எனவே சமாதி நேர் எதிரே கொஞ்ச தூரம் தள்ளி ,சமாதியை பார்த்தவண்ணம் ,யாமும் அமர்ந்து ஸ்ரீ லலிதாசகஸ்ரநாமம் சொல்ல ஆரம்பித்து ,கொஞ்சம் கொஞ்சமாக அம்பாளின் அருள்அலைகளால் ,அதை நாம் உச்சரிப்பதால் உடலில் உள்ளத்தில் ஏற்படுத்தும் மாற்றங்கள் உணர ஆரம்பித்தோம்.ஆயிரத்தெட்டு நாமங்களையும் சொல்லி முடித்து ,சிறிதே கண் மூடி ஆழ்ந்து செல்ல ,ஒரு அதிசயம்  அங்கே நிகழ்ந்தது..சூட்சும தேகத்தில் நிறைய மாற்றங்கள் உணர்ந்திருக்கிறோம். ஸ்தூல கண்களால் பார்த்து பிரமித்தது இதுவே முதல் முறை.எதன் எதிரில் அமர்ந்தேனோ அதிலிருந்து  ,அதாதவது ஜீவசமாதியிலிருந்து ஒரு ஜோதி ஒன்று எழுந்து நேராக எமது நெற்றிக்கு மிக அருகில் நின்று ,யாம் சொல்லும் இந்த ஸ்ரீ லலிதா சகஸ்ரநாமங்களை மிக அற்புதமாக கேட்டுக்கொண்டிருந்தது.ஜோதி என்றால் பார்க்கவே மிக ரம்மியமாக இருக்கிறது.பார்க்க பார்க்க பார்த்துக்கொண்டேயிருக்கலாம்  போலிருந்தது.சாதரண ஒளி சுடர்  எல்லோரும்  பார்த்திருக்கிறோம், அது ஒளி தந்து இருள் அகற்றும். இதுவும் ஜோதி தான் ,ஆனால் உயிர் ஈர்ப்புதன்மை அதிகம் நிறைந்திருக்கிறது.ஒரு வித நீலநிறமும்,சிவப்பு நிறமும்,மஞ்சள் நிறமும் கலந்து ஒரு சின்ன பந்துபோல மிக அற்புதமாக  சுழன்று சுழன்று எம் முன்னே நின்று ,அடியேன் சொல்லும் சகஸ்ரநாமங்களை உன்னிப்பாக சுழன்ற வண்ணம் கவனித்துக்கொண்டிருந்தது.யாம் முழுவதும் சொல்லும் வரை இருந்திருக்கிறது,ஆனால் ஒரு சில வினாடிகள் மட்டுமே எம்மால் உணரமுடிந்தது.இந்த சகஸ்ரநாமங்கள் சொல்வதால் அம்பாள் மகிழ்ச்சி அடைகிறாள்.அத்தகைய சக்திமிக்க அதிர்வு அலைகள் கொண்டது.இதை கேட்க மகான்கள் வருகிறார்கள்.வந்து அம்பாளின் நாமங்களுக்கு salute செய்கிறார்கள்.மகான்களை ஈர்க்கிறது.அருள் ஆசி தருகிறார்கள்.இந்த ஜோதி தரிசனம், அது எம்முள் ஏற்படுத்திய மாற்றம் அதன் ஈர்ப்பு தன்மை ,ஏதோ ஒரு ஜீவ அலை எம்மை சூழ்ந்து ,எம்மை எம் உள்ளத்தை தெய்வீகத்தால் பிசைந்து,அன்றைய  நாள் முழுவதும் ஒரு வித சக்திஅலைகள் நிரப்பி, எம்மை  விட்டு விலகாமல் நாள் முழுவதும், ஆனந்தமாக வைத்திருந்தது.ஒரு மாபெரும் மகான் அவர்.ஒரு சில மகான்களே ஜோதியாக தரிசனம் தரும் பாக்கியம் பெற்றிருக்கிறார்கள்.அப்படி ஜோதிவடிவில் உள்ள ஒரு உன்னத மகான் அய்யா அவர்கள்.சந்தரர் சன்னதி இருக்கும் வெளிப்புறகாரத்தில் (முக்குருணி விநாயகர் சன்னதியிலிருந்து இடப்புறம் செல்லவேண்டும்) ஜீவ சமாதியில் இருக்கிறார்.ஐயா யார் அவர் பெயர் என்ன ? என்பதெல்லாம் எமக்கு தெரியாது  ஏனெனில் இதுவரை எமக்கு கிடைத்த அனுபவத்தில்  எந்த ஒரு மகானும் தான் மகான் என்று கூட சொல்லவிரும்பவில்லை ,அவ்வளவு எளிமையாக இறைநிலையில் ஆழ்ந்து இருக்கிறார்கள் .இந்த ஐயாவும் இறைநிலையில் என்றும் ஆழ்ந்து ,ஜீவ ஜோதியாக இருக்கிறார்கள். கீழே உள்ள படத்தில் உள்ள சிவலிங்கத்தின் அடியில் ஜீவ ஒளியாக ஜீவ சமாதியில்இருக்கிறார் .





 மதுரை  ஸ்ரீமீனாஷி அம்பாள் கோவிலுக்கு வருபவர்கள் இங்கே சென்று ஐயாவையும் வணங்கி அருள் ஆசி பெற்று செல்லுங்கள் என்பது எமது தாழ்மையான வேண்டுகோள்.இதற்கு அருகிலேயே இருக்கும்  இன்னொரு கோவிலில் இருக்கும் ஒரு மகான் ,அவர் ஒரு அம்பாள் உபாசகர் ,இன்றும் ஜீவ சமாதியில் இருந்துகொண்டு ஆசி வழங்குகிறார். அவர் எப்படி எமக்கு காட்சியளித்தார் என்பதை அடுத்த கட்டுரையில்  அகத்திய உள்ளங்களுக்கு விவரிக்கிறோம் ,ஆடி மாதம் என்றாலே அம்பாளின் அருள் அலைகள் வீசும் காலம்,அவள் தாமே ஒரு படி இறங்கி வந்து அருள் ஆசி அலைகளை வீசி செல்வாள் என்பது யாவரும் அறிந்த உண்மை.அற்புதமான இந்த ஆடி மாத பொழுதினை ,சாந்த ஸ்வரூபியான ,ஸ்மிதமுகீயான ,ஸிந்தூர நிறமான ,இளம் சிகப்பு சூரிய கதிர் நிறம் உடையவளை ,ஷன பொழுதும் பெருமானை விட்டு பிரியாத அன்பு நிறைந்தவளை, சம்பகம்,புன்னாகம்,அசோகம்,செங்கழுநீர் பூக்களை தம் கூந்தலில் சூடிய மாபெரும் தெய்வீக மனம் கமழும் சாந்த ஸ்வரூபிணியை ,மனதால் ,தூய அன்பால்  நெஞ்சமெங்கும் நிறைந்து ,அவள் பொற்பாதம் பணிந்து ,தாயவள் அருள் பெறுவோம் என அகத்திய உள்ளங்களை வேறொரு நிகழ்வில் சந்திக்கிறோம்


ஒம் அகத்தீஸ்வராய நமஹா !!
ஒம் அகத்தீஸ்வராய நமஹா !!
ஒம் அகத்தீஸ்வராய நமஹா !!

Thursday, June 29, 2017

மச்சமுனி சித்தர் அய்யா - திருப்பரங்குன்றம்

                                                     

மச்சமுனி சித்தர் அய்யா அவர்களின் பார்வை  ஒருவர் மீது விழுந்தால் அவருக்கு துரியாதீத நிலை உடனே கிட்டிவிடுமாம்.அத்தகைய ஆற்றல் நிறைந்தவர் அய்யா .மச்சமுனி சித்தர் அய்யா அவர்களின் பிறப்பே மிக புனிதமானது. ஒரு முறை நீர் நிறைந்த  ஒரு தடாகத்தின் அருகில் சிவபெருமான் ,  பார்வதிதேவியிடம் உலகின் பிறப்பு இறப்பு ,உயிர்களின் உருவாக்கம் அழித்தல் என பலவற்றை பேசும் பொழுது ,பார்வதி தேவிக்கு உறக்கம் ஏற்பட்டு கண்அயர்ந்து விட்டார்களாம்,ஆனால் அங்கே உள்ள தடாகத்தில் நீந்திகொண்டிருந்த மீன் அதை கேட்க,அந்த  மீனின் வயிற்றில் உள்ள மீன் குஞ்சும் கேட்டு, பாலகனாய் உருமாறி எழுந்து சிவபார்வதியின் காலில் விழுந்து ஆசிவாங்கியதாம்.இப்படி மச்சமாய் இருந்து சிவ உபதேசங்களை கேட்டதால் அதற்கு மச்சேந்திரன் என்ற பெயர் வந்ததாம்.இப்படி மச்சமுனி சித்தர் அய்யா அவர்களின் பிறப்பே மிக சிறப்பானது.




மச்சமுனி சித்தர் மீனாக திருப்பரங்குன்றம் மலை மீது உள்ள சுனையில் வாழ்ந்துகொண்டிருக்கிறார்கள்.திருப்பரங்குன்றம் முருகனை வணங்கிவிட்டு அதன் அருகில் உள்ள மலை மீது ஏறும் பாதையில் மேல் சென்றால் ,கொஞ்சதூரத்தில்ஒரு புறம் தர்காவிற்கு செல்லும் வழி வரும்,அதன் அருகிலேயே மறு புறம்  உள்ள காசி விஸ்வநாதர் சிவன் கோவிலுக்கு செல்லும் வழி வரும்.இது ஒரு வழி. இன்னொரு வழி திருப்பரங்குன்றம் கிழக்கு புறம் ,நீண்ட நெடிய படிகட்டுகள் இருக்கும் ,அதன் வழியே சென்றால் நேரடியாகவே காசி விஸ்வநாதர் கோவிலுக்கு அழைத்துச்சென்றுவிடும்.மிக அழகான காசி விஸ்வநாதரை  சாஷ்டாங்க நமஸ்காரம் செய்து,அதன் அருகிலே உள்ள சுனைக்கு வர ,அந்த இடமே மிக அற்புதமாக உள்ளது.பச்சை நிறத்தில் சுனை முழுவதும் தண்ணீர் நிரம்பி இருக்கிறது.காசிக்கு நிகரான தீர்த்தம் என்கிறார்கள் ,முருகபெருமானால் நக்கீரருக்காக உருவாக்கபட்டது என்கிறார்கள்,சுனையோடு ஒட்டியுள்ள மலையிலே சிவலிங்கம் அருகிலே விநாயகர், முருகன்,மற்றும் பைரவர் சிலை மலையோடு மிக அழகாக ஒட்டிசெதுக்கப்பட்டு காட்சிதருகிறது.சுனையில் மீன் வடிவில் மச்சமுனி சித்தர் ஐயா இன்றும் வாழ்ந்துகொண்டிருக்கிறார்கள்.
வாங்கிவந்த தயிரை மச்சமுனி ஐயாவை ஆழ்ந்து வணங்கி அந்த சுனை நீரில் ஊற்ற ,சிறிது நேரத்தில் தண்ணீரை வட்டமிடும் நீற்குமிழ்கள் தெரிகிறது,இப்படி வந்தாலே மீன் வரப்போவதற்கான அறிகுறி .கண்இமைப்பதற்குள் அங்கே ஒரு அழகான மீன்வருகிறது.வந்து நீரிலே விடப்பட்ட தயிரினை சாப்பிடுகிறது.மீன் வடிவில் இருக்கும்
 மச்சமுனி சித்தர் அய்யா தயிரை சாப்பிட்டார் என்றால், அய்யா நமது கர்மவினை தாக்கத்தை குறைத்து நமக்கு அருள் ஆசி வழங்கிவிட்டார் என்பதே பொருள் என்கிறார்கள்.




சற்றே ஆழ்ந்து உட்செல்ல,இந்த மலை உச்சியில் இருக்கும் இந்த பச்சை நிற சுனையும் ,அருகிலே இருக்கும் மரமும் ,இந்த மலையோடு ஒட்டிஉள்ள பகுதியும் சொல்லாமல் நிறைய விசயங்கள் சொல்கின்றன.இங்கு நிலவும் இந்த சூழல் மிக அற்புதமாக உள்ளது.மாசற்ற காற்றும் ,மனித அடர்த்தி அதிகம் இல்லாததால் இருக்கும் அலைஇயக்கம் எந்தவித குழப்பமும் இல்லாமல் பளிச்சென அதன் தன்மை மிளிர்கிறது.அதோடு ஏதோ ஒன்று இங்கே சூழ்ந்து உள்ளத்தை,நெஞ்சத்தை கவர்ந்து இழுக்கிறது.ஒரு அற்புதமான அலை இயக்கம்.எதனால் இங்கே இப்படி ஒரு அமைதி அலைஇயக்கம் என்ற சிந்தனை வந்தாலே அது அடுத்த கட்டத்திற்கு தானாகவே அலைத்துச்சென்றுவிடும்.சித்தர் பெருமக்களை நேரடியாக பார்க்க இயலவில்லை என்றாலும் ,அவர்களின் அற்புத அலைஇயக்கம் இங்கே இருக்கிறது என்பதை உணரமுடிகிறது.மல்லிகை பூவை மறைத்து வைத்தாலும் பூவை பார்க்காமலே  அதன் வாசம் மட்டும் எவ்வாறு உணர்கிறோமோ அவ்வாறு ,ஒரு சில அலை இயக்கங்கள்  இங்கே நறுமணம் மிகுந்து தவழ்கிறது.அன்பு மட்டும் போதும் ,அன்பால் நிறைந்து ,இமை மூட  அய்யாவின் அருள் அலைகளை உணரலாம்.இங்கே நிலவும் அமைதியில் மூழ்கலாம்.எந்த ஒரு இடத்திலும் இந்த அமைதியும் ,அன்பும் நிறைந்து காணப்பட்டால் அது தெய்வீகம் நோக்கியே அழைத்துச்செல்கிறது.



ஒம்கார தத்துவம் உணர்ந்து கீழ் உள்ள குண்டலினி சக்தியை மேலே ஏற்றி
காயத்தை கற்பமாக ஆக்கும் வித்தையை தினந்தோறும் பழகு .அது விரைவில் உடம்பை கற்பமாக்கி சாக கல்விக்கு அழைத்துசெல்லும் என்கிறார் ஐயா மச்சமுனி சித்தர் அவர்கள்.நாள் தோறும் அதிகாலையில் உடல் சுத்தம் செய்து ,ஒம் நமசிவாய சொல்ல பழகி ,மூலாதாரத்திலே உறைந்துபோய் கிடக்கும் சக்தியை மேலே ஏற்றி ,உச்சியில் கிடைக்கும் ஆனந்தத்தை உணர்ந்துகொள் அதுவே சாகாகலை நோக்கி செல்லவைக்கும் என்கிறார்.உள்ளே இருக்கும் மூச்சை கற்பமாக மாற்றும் வித்தை எளிதில் உணரவைக்கும் என்கிறார்கள்.

மச்சமுனி சித்தர் அய்யா அவர்கள் ஆசிஅலைகளோடு அகத்திய உள்ளங்களை வேறு ஒரு கட்டுரையில் விரைவில் சந்திக்கின்றோம்

ஒம் அகத்தீஸ்வராய நமஹா !!
ஒம் அகத்தீஸ்வராய நமஹா !!
ஒம் அகத்தீஸ்வராய நமஹா !!



Wednesday, May 24, 2017

ஸ்ரீ பைரவ வாகனம் ..!!!


பிரபஞ்ச நாயகனே!! பெம்மானே !! தூசியினும் தூசியாய் இருக்கும் ,எம்மால் எம் கற்பனையால் கூட ,நின் அருள் தாண்டவ அலைகள் நடத்தும் அற்புத அரங்கேற்றம் சிறு  துளி அளவுகூட  புரிந்துகொள்ளஇயலவில்லை.நித்தம் ஒரு புதுமை என எண்ணில் அடங்கா கோள்கள் உருவாக்கும்  பேராற்றல் கொண்ட நாயகனே ..!! கோடான கோடி ஜீவன்களையும் உருவாக்கி,காத்து,அரவணைத்து ,அழித்து ,புரிய இயலாத விந்தைபுரியும் ஆதி அந்தம் இல்லாத ஆயிரம் ஆயிரம் கோடி சூரிய ஜோதியே ...!!தூயோனே ,,!! மறையோனே ..!!   நிறைந்தோனே ..!! நின் பெருமை எண்ணி ,செய்வதறியாது, நெக்குருகி நெஞ்சம் நிறைந்து ,உள்ளம் உறைந்து நின் தாள் பணிந்து போற்றி வீழ்ந்து வணங்குகின்றோம்,!!அருள் புரிவாய் அய்யனே .!! நின் பாதம் சரணாகதி ..!!! சரணாகதி ..!!!சரணாகதி ..!!!சரணாகதி ..!!!சரணாகதி ..!!! சரணாகதி ..!!!சரணாகதி ..!!!

ஏழரைநாட்டு சனியே பாடாய் படுத்தும் .அதுவும் ஏழரைநாட்டு சனியில் ஜென்மசனி ஒருவருக்கு நடந்தால் ,சொல்லவே வேண்டாம்.அது உடம்பில் ஒரு மந்தநிலையை ஏற்படுத்தும்.ஒரு சாதாரண வேலையை கூட செய்யவிடாமல் சுத்த சோம்பேறியாக்கிவிடும்.எதுவும் புரியவிடாது .எங்கே எப்போ வெளிச்சம் வரும் என தெரியாது.எருமை மாட்டில் மழை பெய்வது போல தான் எந்த ஒரு முயற்சியும் ,பொருளாதார மந்த நிலையும் ஏற்படுத்தும்.எந்த ஒரு முயற்சியையும் எடுக்கும் மன நிலையை வெகு எளிதில் நமக்கு கிட்டிவிடாது இது போன்ற காலகட்டத்தில்.மனதை எக்காரணம் கொண்டும் நடந்த நிகழவுகள் பற்றியோ அல்லது நடக்கபோகும் நிகழ்வுகள் பற்றியோ  எண்ணி எண்ணி ,வருத்தமோ குழப்பமோ செய்து ,இருக்கும் மன ஆற்றலை துவம்சம் செய்யகூடாது.அப்படி செய்தால் அது மேலும் சுத்தமாக நமது மன ஆற்றலை தின்றுவிடும்.நம்மிடம் இருப்பது மனம் ஒன்றே, அதை வைத்துக்கொண்டு தான் எல்லாவிதமான சிக்கல்களையும் சரிசெய்யவேண்டும்,ஆக விழிப்புடன் எக்காரணம் கொண்டும் மன ஆற்றலை துவம்சம் செய்ய இடம் தரமாட்டேன் என்று விடாபிடியாக உறுதிமொழி நமக்கு நாமே எடுத்துக்கொள்ளல் வேண்டும்.எது வரினும் எதிர்கொள்வோம். மனதினை எப்பொழுதும் ஆக்கத்துறையிலேயே செயல் படுத்தல் நலம் உருவாக்கும்.மனதின் திடத்தை அதிகரிக்கும்.ஒரு ஸ்திரத்தன்மையை தரும்.



மனம் விரும்பி ஏதேனும் ஒரு ஸ்லோகத்தை சொல்லி அதிர்வு அலைகள் நன்றாக உள்வாங்கிவைத்துகொண்டு உலகவாழ்வாதாரத்தை எதிர்கொள்ளல் அவசியமாகிறது. அல்லது ஏதேனும் ஆகர்ஷன சக்திநிறைந்த ஆலயம்  சென்று மனதினை, நன்கு அதிர்வு அலைகளை நிரப்பி ஸ்திரத் தன்மையை அதிகரித்துக்கொள்ளல் என்பது கட்டாயதேவையாகிறது.  ஸ்ரீ விஷ்ணு சகஸ்ரநாமம் சொல்லி அதிர்வு அலைகளை நன்கு உள்வாங்கலாம் அல்லது ஸ்ரீ லலிதாசகஸ்ரநாமம் சொல்லி நன்கு சக்திமிக்க அலைகளை நிரப்பிக்கொண்டு வாழ்வியலை எதிர்கொள்ளலாம்.அல்லது நமக்கு தெரிந்த வேறு ஏதேனும் ஒரு ஸ்லோகமோ , அல்லது  முயற்சியோ செய்து நல்லஅதிர்வு அலைகளை நிரப்பி எதிர்கொள்ளலாம்.எந்த ஒரு ஸ்லோகமும் மந்திரமும் பைரவபெருமானின் அருள் ஆசி இருந்தால் மட்டுமே அதன் பலன் விரைவில் கிடைக்கும். பைரவரை வணங்கி அவர் ஆசிகள் பெற்றால் தான் சத்தியஉலகத்தின் கதவுகள் திறக்க சாவி (key) கிடைக்கும்.அங்கிருக்கும் அதிர்வு அலைகளை நாம் சொல்லும் அட்சரம்  மூலம் இருக்கும் இந்த உலகத்தில் கொண்டுவந்து நாம் உணரலாம்.



எமது அனுபவத்தை பொறுத்தவரை இது  போன்ற சனிதிசை நம்மை பாடாய் படுத்தும்  காலகட்டங்களில், வெகு எளிதில் உறுதுணையாய் இருப்பது எம்பெருமான் பைரவபெருமானே.உள்ளம் நிறைந்த அன்பால் அழைத்தால், அழைத்த உடனே வருவான்.எமக்கு தெரிந்த மிகச்சிறந்த வழி பைரவரை கண்ணை மூடிக்கொண்டு வழிபடுவதே சரியானதாகும்.பைரவ மந்திர உச்சரிப்பும் ,அதன்அதிர்அலையும் இது போன்ற மந்தநிலையை அடித்து விரட்டி ஓட்டிவிடும்.உடலில் உள்ளத்தில் ஒரு சுறுசுறுப்புத் தன்மையை ஏற்படுத்திவிடும்.அந்த அளவுக்கு powerful .பைரவ அதிர்வு அலைகள் நமது உடலில் உள்ள சனியின் receiverஜ நன்கு சுத்தபடுத்தி இதமான அலைகளை உணரசெய்யும்.செய்த பாவத்திற்கு நடக்கும் இந்த கர்மவினை நிகழ்வுகளை அனுபவிக்க வேண்டியது தான் .ஆனால் அதன் தாக்கத்தை குறைத்துக்கொள்ளலாம் அல்லவா.இதற்கு பைரவபெருமான் உதவிசெய்வார் என்பது அசைக்கமுடியாத நம்பிக்கை.




ஒரு அழகான தூய வெண்ணிறம் கொண்ட பட்டுபோல் மிருதுவான வெண்பஞ்சு போன்ற சூட்சும அலை வடிவில் இருக்கும் ஒரு நாய் எமது அருகே வந்தமருகிறது.யாம் சொல்லும் பைரவ ஸ்லோகங்களால் இது நிகழ்கிறது எனதுணருகிறோம்.இரு கால்களை முன்னால் வைத்துக்கொண்டு ,ஒரு செல்லகுட்டி போல அமர்ந்து மிக அழகாக ,தெள்ளத் தெளிவான அலைஇயக்கத்துடன்அன்பால் எமை ஈர்க்கிறது .கண் திறந்து பார்த்தல் காணவில்லை.கண் மூடி பைரவ ஸ்லோகங்களை சொல்ல மிக அழகாக தெரிகிறது ,எப்படி இங்கே  மிக அற்புதமாக இருக்கிறது இந்த பைரவவாகனம் ,என இந்த சூட்சும தேகத்தில் உள்ள உருவத்தை அறிய முற்பட ஆரம்பிக்கும் போதே , எம்மை மறந்து  யாம்ஆழ்ந்த ஈர்ப்புஅலைஇருக்கும் நோக்கி அழைத்துச்செல்லப்பட்டு,எமது நிலை முற்றிலும் மறக்கிறோம். இதன் பார்வையும்,அதன் அழகும், அது இங்கே இருப்பதால் ஏற்படுத்தும் அலை இயக்கமும், மிக அற்புதமாக சொர்க்கலோகம்போல் இருக்கிறது.பைரவ அதிர்வு அலைகள் உள்ளத்தில் இருக்கும் வரை, இந்த பைரவ சூட்சும வாகனம் எம்முடனே இருக்கிறது .எம்முடனே வருகிறது.யாம் எங்கெல்லாம் செல்கிறோமோ அங்கெல்லாம் ஒரு பாதுகாப்பு கவசம் போல எமக்கு அருகிலேயே இருக்கிறது.அனைத்தையும் மிக அழகாக கவனித்து எதிர்கொள்கிறது.நேரம் செல்லச்செல்ல  அதிர்வு அலைகள் எம்உள்ளத்தில் குறைந்தவுடன் அது எங்கோ சென்றுவிடுகிறது.இந்த பைரவ வாகனமாகிய நாய் ஒரு சாதரண நாய் போல அல்ல.நாய் என்று சொன்னவுடனே நாம் வேறுமாதிரி எண்ணங்களை மனதில்வைத்துள்ளோம்.இது அப்படி அல்ல.இந்த பைரவ வாகனம் புனிதமானது.சூட்சும அலைகளால் தெள்ளத்தெளிவான அப்பளுக்கற்ற தூய நீர் போல் இறைதன்மை மிகுந்து அன்பால் கவர்ந்து இழுக்கிறது.யாருக்கும் இந்த பைரவவாகனம் பார்த்தஉடனே பிடித்துவிடும்.யார் வேண்டுமானாலும் இதை அழைக்கலாம்.உங்கள் உள்ளத்துள்ளே பைரவ அதிர்வு அலை இருந்தால் போதும், அங்கேயே இது இருக்கும்.உங்கள் உடனே பயணம் செய்யும் .எந்த இன்னல்கள் வந்தாலும் எதிர்கொண்டு உங்களை காக்கும் என்பதில் எந்தவித சந்தேகமும் இல்லை.



யார்  ஒருவர் அன்பால் பைரவபெருமானை பைரவ காயத்ரி ஸ்லோகத்தால் வழிபாடு செய்கிறார்களோ அவர் இருக்கும் இடம் நோக்கி இந்த பைரவ சூட்சும வாகனமாகிய நாய் வந்துவிடுகிறது என்பதை எம்மால் யூகிக்க முடிகிறது,அங்கு இருக்கும் நடக்கும் அனைத்தையும் மிக அழகாக கவனித்து ,தம் இறை பணி ஆற்றுகிறது.எம்பெருமானின் அலைகள் தாங்கி,எம்பெருமானே அருகில் அமர்ந்து இருந்தது போல அனுபவம் தருகிறது. சர்வேஸ்வரனே பைரவர் எனும் தோற்றம் எடுத்தார்.பைரவம் என்றால் ஆனந்தம் .ஆனந்தம் என்றால் எம்பெருமானின் அருள் அலைகள் சூழ்ந்துள்ளது என்று அர்த்தம்.ஆனந்தமாகிய அன்பு மிகுதி அலைகளை நினைத்த நேரத்தில் கிடைக்க செய்பவர். ஸ்ரீபைரவரை வழிபடும் அன்பர்களுக்கு இந்த பைரவவாகனம் ஒரு அசைக்கமுடியா நம்பிக்கையை அளித்து ,எம்பெருமான் அருள் ஆசிகள் அலைகள் சுமந்து ,ஒரு நிறைவுதந்து ,பெருமானே நேரில் வரும்  காலம் வெகு விரைவில் கிட்டும் என்பதையே சொல்லாமல் சொல்கிறது.பைரவபெருமானை அன்பால் நெஞ்சம் நிறைந்து ,ஆழ்ந்து , வணங்கி ,அழைத்து ,பைரவ அதிர்வுஅலைகள் உணர்வோம்.எதிர்வரும் கர்மவினை இன்னல்கள் எல்லாம் பைரவ அதிர்வு அலைகள் எதிர்கொண்டு நமைகாக்கட்டும் ..!!! என அகத்திய உள்ளங்களை வேறு ஒரு நிகழ்வில் சந்திக்கின்றோம்


ஸ்ரீ பைரவர் காயத்ரி மந்திரங்கள்:

ஒம் ஷ்வானத் வஜாய வித்மஹே !
சூல ஹஸ்தாய தீமஹி !
தன்னோ பைரவ : ப்ரசோதயாத் !!  

ஓம் சூல ஹஸ்தாய வித்மஹே
ஸ்வாந வாஹாய தீமஹி
தந்நோ பைரவ: ப்ரசோதயாத்  

ஓம் திகம்பராய வித்மஹே
தீர்கதிஷணாய தீமஹி 
தந்நோ பைரவ: ப்ரசோதயாத்


ஒம் அகத்தீஸ்வராய நமஹா !!!
ஒம் அகத்தீஸ்வராய நமஹா !!!
ஒம் அகத்தீஸ்வராய நமஹா !!!



Monday, May 8, 2017

சிவாய எனும் அட்சரம்..!!!




ஆயிரம் கோடி சூரிய ஜோதி, எங்கும் நிறைந்து ,எங்கெங்கும் நிறைந்து ,ஆதியாய் அனாதியாய் நிற்கும் அற்புதம்.இதுவே  கூனி குறுகி , எல்லோர் உள்ளங்களிலும் நான் எனும் அகந்தையாய் நின்று,இதன் தன்மை யாதென ஆழ்ந்து செல்ல,இந்த அகந்தையை உடைத்தெறிந்து ,எங்கெங்கும் நீண்டு விரிந்து,அடர்ந்து படர்ந்து, நீக்கமற நிறைந்து,யாவற்றையும் சூழ்ந்து அன்பால் அரவணைக்கும் எம்பெருமானின் நம் பெருமானின் அலைகள் நிறைந்த இருப்பிடம் நோக்கி ஈர்த்துச்செல்கிறது.எம்மால் எதுவும் இல்லை எல்லாம் அந்த எல்லைஇல்லா பேரொளியின் கருணையே என , உடம்பு ,மனம், இவற்றை கடந்து சென்றாலே,இறை அலைகள் முழுவதும் நிறைந்துகொள்ளும் அற்புதம் நிகழ்கிறது.

எந்த தெய்வவழி சென்றாலும், அதன் முடிவு எல்லையில்லா பெருமானிடமே அழைத்துச்செல்கிறது.எம் பெருமானே வெவ்வேறு தோற்றங்களில் வெவ்வேறு தெய்வங்களாக கோடி கோடி உயிர்களின் உள்ளம் கவர்ந்த தெய்வமாக ஏதேனும் ஒரு வடிவில் பொருளாகவோ,வடிவமாகவோ ,நம்பிக்கையாகவோ ஏதும் அற்ற சூட்சுமமாகவோ இருந்துகொண்டு அருள்ஆட்சி நடத்தும் அற்புதம் நிகழ்ந்துகொண்டிருக்கிறது,எளிதில் நம் மீது உரசிச்செல்லும் காற்றே மிக சிறந்த உதாரணம் .காற்று அனைத்திற்கும் பொது,எந்த ஒரு சன்மானமும் கொடுக்கவேண்டாம்.காற்று இருக்கிறது.பார்க்க முடியவில்லை .உரசிச்செல்லும் போது உணரமுடிகிறது.இதன் மூலம் எப்படி எப்படி ...எப்படி இருக்கும் இவை எங்கேயிருந்து வருகிறது.. என ஆழ்ந்து செல்ல செல்ல எம்பெருமானின் ஈர்ப்பு அலைகள் ,கொஞ்சம் கொஞ்சமாக தொட்டும் தொடாமலும் பட்டும் படாமலும் உள்ளத்தை சிறிது சிறிதாய் ஆக்கிரமிக்கும் அற்புதம்  நிகழ்கிறது.பாச அலைகள் கொண்ட காரிருள் நாயகன் ,ஆயிரம் கோடி சூரிய ஜோதிக்கு சொந்தக்காரன்.பிரபஞ்சத்தின் எந்த மூலையில் இருந்தாலும் ,இதோ உன் கண்முன்னே யாம் இருக்கிறோம் என,அனைத்தும் யாமே .சற்றே உள்நோக்கி ஆழ்ந்து,ஒரே ஒரு இமை பொழுது ,இருப்பது நான் அல்ல ,எல்லாம் யாமே எனும் தன்மை ததும்பி அன்பால் நெஞ்சுறுகி எம்பெருமானை உணர முற்பட ,வாகைசூடிய பெருமானின் ஆர்ப்பரிக்கும் அலைகள் உள்ளத்துள் நிரம்பும் அதிசயம் நிகழ்கிறது.



பல ஆயிரம் ஆயிரம் கோடி உயிர்களின் ஆத்ம நாயகனே..!! ஆயிரம் ஆயிரம் கோடி கோடி ஜடத்திற்கும் ஜடமற்ற உயிருக்கும் உள்ளே அன்பாய் இருந்து அருள் ஆட்சிசெய்யும் ஈசனே ..!! சர்வேஸ்வரனே.நினது கருணையும் அன்பையும் எண்ண இயலவில்லை ,ஒரே ஒரு துளி உயிராய் எம்முள் இருப்பதால் ,யாமும் நினது படைப்பின் ஒரு சிறு தூசியென உணர்ந்தோம்,நின் பேராற்றல் எண்ணி எண்ணி நெஞ்சம் அன்பால் நிறைந்து ஆனந்தம் அடைந்தோம்.நின்னை நினைந்து நினைந்து, நின் பெருமை எண்ணி எண்ணி, ஆனந்தம் அடைகிறோம்.எத்தனை கோடி நுட்ப அதி நுட்ப திறம் எம்முள் வைத்தாய் இறைவா .!! அன்பால் விரிந்து,உள்ளம் நிறைந்து, எமது ஆயிரம் ஆயிரம் கற்பனை கைகளால் நின்னை கட்டி அரவணைத்து நன்றி கூறவியல்கிறேன் இயலவில்லை.எம் நாயகனே !!எம்பெருமானே !! சரணாகதி !!! சரணாகதி !!

நமஸ்தே அஸ்து பகவன் விஸ்வேஸ்வராய மஹாதேவாய  த்ரயம்பகாய  த்ரிபுராந்தகாய த்ரிகாக்னி காலாய காலாக்னீ ருத்ராய  நீலகண்டாய ம்ருத்யுஞ்ஜாய ஸர்வேஸ்வராய ஸதா சிவாய  ஸ்ரீமன் மஹாதேவாய நம:








 உள்நோக்கி சிவமாக இருக்கும் நினது காற்றும் யாமே!.உள்ளும் வெளியும் யாமே !! சிவமாகிய  காற்றே..!! நீ வாழ்க !! எம் உள்ளத்துள் நெஞ்சத்துள் நீக்கமற நிறைந்திருக்கும் நின் திருவடி வாழ்க !!நின் பொற்பாதம் வீழ்ந்து வணங்குகிறோம். !!  காற்றே நம்முள்ளே உள்ளும் புறமும் தச வாயுவாக  சொல்ல இயலா விந்தை புரிகிறது.இந்த தசவாயுவில் நமது வாழ்கையே அடங்கி போகிறது.இதில் சிவ வாக்கிய சித்தரின் ஒரு அற்புதமான பாடல் .உண்மையில் சாதாரணமாக இதில் இருக்கும் சூட்சும இரகசியம் தெரிந்து கொள்ளல் மிக மிக கடினம்.அகத்திய உள்ளங்கள் முயற்சிசெய்து பாருங்கள் !!

சிவாய என்ற அட்சரம் சிவனிருக்கும் அட்சரம்
உபாயமென்று நம்புவதற்கு உண்மையான அட்சரம்
கபாடஅற்ற வாசலை கடந்துபோன வாயுவை
உபாயம்இட் டழைக்குமே சிவாய அஞ்செழுத்துமே


சிவாய என்ற அட்சரம் சிவன் இருக்கிற அட்சரம் .உபாயம் தரும் உண்மையான அட்சரம்.உடலில் இருக்கும் தச வாயு ஒவ்வொன்றும் ஒவ்வொரு வேலைசெய்கிறது.
உயிர் வாயு (பிராணன்)
 மல வாயு (அபானன்)
தொழில் வாயு (வியானன்)
ஒலி வாயு. (உதானன்)
சத்துகளை உடல் முழுவதும் பரவும் வாயு( சமானன்)
தும்மல் வாயு(நாகன்)
விழிவாயு (கூர்மன்)
கொட்டாவிவாயு(கிருகரன்)
இமை வாயு (தேவதத்தன்)
உடலை வீங்கசெய்யும் வாயு ( தனசெயன்)

இதில் இந்த தனஞ்செயன் எனும் வாயு  ஒருவர்  இறந்தவுடன் அந்த உடலை சுற்றி மூன்று நாட்கள் இருக்குமாம் .அதாவது ஒவ்வொரு செல்களையும்  அதன் இயக்கங்களை நிறுத்தி உடலை வீங்க செய்து பிறகு தான் கிளம்புமாம்.
தனஞ்செயன் கிளம்பியாச்சுன்னா அவ்வளவு தான்.எல்லாம் முடிந்துவிட்டது என்று அர்த்தம்.அப்படி அந்த கபாடம் அற்று கடந்து போகும் வாயுவாகிய தனஞ்செயனை  அழைத்து ,உபாயம் அருளுமாம் இந்த சிவாய_ _ என்ற அஞ்செழுத்துமே என்கிறார் சிவவாக்கியர் ஐயா.சிவாய என்ற மூன்று எழுத்தும் பிறகு வரும்  டேஸ் டேஸ்  _ _  என்ற இரண்டும் சேர்ந்து மொத்தம் இந்த ஜந்தெழுத்தும்.மூன்று எழுத்தை மட்டும் சொல்லிவிட்டு இரண்டு எழுத்தை நீயே கண்டுபிடித்துக்கொள் என்று பாடல் எழுதிவைத்துள்ளார் சிவவாக்கியர் அய்யா. இந்த சிவனிருக்கும் அட்சரத்தை கண்டுபிடித்து நாள் தோறும் சொல்ல.அடுத்த நொடியே அவனுக்கு உள்ளம் உறைந்து  இறைநிலை கிட்டிவிடுமாம்.அப்படி சொல்லும் அவனுக்கு மரணமே இல்லை என்கிறார்.மரணம் தரும் தனஞ்செயன் எனும் வாயுவை இந்த சிவாய _ _ என்ற அட்சரம் ,நமக்கு உதவிசெய்து மரணமே இல்லாத பெருவாழ்வை அளிக்கும் என்கிறார் சிவவாக்கிய சித்தர் அய்யா.

இந்த எழுத்தை கண்டுபிடித்து உணர்ந்துவிட்டால் ,அவனுக்கு அடுத்த நொடியே மனம் அற்று இறை தன்மை வந்துவிடுமாம்.ஞானி ஆகிவிடுவானாம்.இப்படி உணர்ந்த ஒருவனுக்கு எல்லாம் கைவந்த கலைஆகிவிடுமாம்.எதை பற்றியும் அறியும்  ஞானம் வந்துவிடுமாம்.ஒரு ஞானி என்பவன் இறைநிலையோடு நொடிப்பொழுதும் இறையை விட்டுவிலகுவதில்லை.இப்படி ஆகவில்லை எனில் கண்டுபிடித்த எழுத்து தவறு என்பதே ஆகும். சிவவாக்கியர் அய்யாவை அன்பால் நிறைந்து அவர் பொற்பாதம் பணிய கண்டிப்பாக அய்யா உபாயம் செய்வார் என நம்புகிறோம்.
அகத்திய உள்ளங்களை விரைவில் அடுத்த கட்டுரையில் சந்திக்கின்றோம்.

ஒம் அகத்தீஸ்வராய நமஹா !!!
ஒம் அகத்தீஸ்வராய நமஹா !!!
ஒம் அகத்தீஸ்வராய நமஹா !!!




Wednesday, March 29, 2017

சிவமெனும் அற்புதம் !!!


சிவமென்னும் அற்புதம்.சிவம் எப்படி இருக்கும் என்று நினைத்தாலே,கண்களை மூடிக்கொண்டு சிந்தித்தாலே  மனதின் அலை ஓட்டத்தை சற்றே குறைத்து ,குளுமை அலைகளால் சூழ்ந்து ,கவ்வி இழுக்கும் ஒரு அற்புதம் நிகழ்கிறது.எல்லாவற்றையும் சுருக்கி அணுவாக ,இன்னும் உள்ளே செல்ல அதன் மிக சிறிய அலைவடிவாக ,இன்னும் இன்னும் உள்ளே செல்லச்செல்ல எதுவுமே இல்லாத, ஆனால் எல்லாம் ஆன, ஒன்றும் இல்லாத ஒன்றாக இருக்கும் அற்புதம்.அலை பாயும் மனதிற்கு ஒரு சம்மட்டி அடி கொடுத்து ,அதன் ஆதிமூலம் உணரவைக்கும் உண்மையின் உறைவிடம் சிவம்.சிவத்தை உணர்ந்தால் ஞானம்.சிவத்தை மறந்தால் ஊனம்.சிவமே எல்லாம் .சிவமே எங்கும் .சிவமே எங்கெங்கும்.சிவம் அறிய இப்பிறவி முயற்சி தோற்றாலும்  இனிவரும் ஒரு பிறவியில் சிவத்தோடு சிவமாக ஆகும் ஒரு பொன்னான காலம் வரும் என்பது உண்மை.நாள் தோறும் அழிந்துகொண்டிருக்கும் இந்த பூதஉடலுள்ளே ஒரு தற்காலிக பயணம் செய்துகொண்டிருக்கும் பேராற்றல் நாயகனின் இந்த உயிர் என்ற தூசியும் ஒரு சிவமே. ஒன்றை மற்றொண்டாய் மாற்றுவதும் சிவமே.அப்படி ஒன்றை மற்றொண்டாய் மாற்றிக்கொண்டே முழுவீச்சில் இயங்கிகொண்டிருக்கும்  நிலை சக்தி எனும் நிலை.சக்தி அலைகளை உணர்ந்துகொண்டு இவற்றை கடந்து உட்செல்ல மெல்ல மெல்ல இயக்கம் குறைந்து ஆழ்ந்து உட்செல்ல  இயக்கமற்ற சிவத்தோடு சிவமாய் கலக்கும் அற்புதம்.பிரபஞ்சத்தின் எந்த மூலையில் இருந்து அழைத்தாலும் எங்கும் எங்கெங்குமாய் பரந்து விரிந்துள்ள மாபெரும் பேராற்றல் அழைத்தநொடியிலேயே வந்து அரவணைக்கும் அற்புதம்.

 காற்றோடு கலந்திருக்கிறது ஆனால் காற்றல்ல. காற்றின் மூலமாக உள்இழுத்து இறையை மற்றும் விழுங்கிக்கொண்டு அதாவது உள்வைத்துகொண்டு பிறகு வெறும் காற்றை மட்டும் வெளியிடவேண்டும்.தாமரை இலையும் நீரும் ஒன்றோடு ஒன்று ஒட்டிக்கொண்டுள்ளது போல ,காற்றின் மீது ஓட்டிக்கொண்டேஇருக்கும்  இருக்கும்  இறையை உள் இழுத்து ,நம்மோடு உள்வைத்துகொள்ளல் இது போன்ற ஒரு கலையை கற்றுக்கொண்டால் தேகத்தில் பிணி என்பதே கிடையாது.மூப்பு என்பதே வராது.என்றும் இளமையே .முகத்தில் ஒரு பொலிவு ,ஒரு தேஜஸ் உருவாகும்.ஒரு சிவபழம் போல ஜொலிக்கலாம்.


நமது உடலியே  சுரக்கும் ஒரே ஒரு அமிர்தத்தை ஒரே ஒரு முறை வாழ்வில் உணர்ந்தால் ,நமது உடலில் உள்ள எந்தவித நோயினையும் ஒரு நொடிப்பொழுதில் நீக்கிவிடலாம்.சர்க்கரை நோய் ,இரத்தஅழுத்தம்,கேன்சர்,மூட்டுவலி,முழங்கால் வலி, etc ,என நம் ஒவ்வோர்வருக்கும் நீண்டுகொண்டு செல்லும் நோய்களின் பட்டியல் ,இவை எதுவாகினும் அதனை முற்றிலும் நீக்கிவிடலாம் ,அப்படி ஒரு மருந்து உங்கள் தேகத்துள்ளே இருக்கிறது .முடிந்தால் கண்டுபிடித்துக்கொள்ளுங்கள்
 என சவால் விடுவது போலவும் ,அதை எவ்வாறு உணர்ந்துகொள்ளவேண்டும் என்பதற்கு தேவையான குறிப்புகளையும்,அது தீயோர் கையில் சிக்ககூடாது என்பதற்காக அவற்றை பரிபாஷைகளில் போற்றுதலுக்குரிய பாடலாக என்றோ எழுதிவைத்துசென்றுள்ளனர்  சித்தர் பெருமக்கள் .சித்தன் வாக்கு என்றுமே சிவவாக்காகும்.இதோ இப்படி ஒரு வழி இருக்கிறது ,இதை உணர்ந்தால் உடலில் உள்ள உபாதைகள் நீங்குவது மட்டும் அல்லாமல் ,இறை நிலையை அடையவைக்கும் ஒரு அற்புத மார்கத்தையும் தந்துவிட்டு சென்றிருக்கிறார்கள்.அன்பும் கருணையும் நிறைந்த உள்ளங்களுக்கு விரைவில் இதன் முழுபலனும் கிடைக்கும் என்பதில்கொஞ்சம்கூட சந்தேகம் இல்லை.


அகத்தியர் மெய்ஞானத்தில் வரும் ஒரு அற்புதமான பாடல்

உண்ணும்போ துயிரெழுத்தை வுயர வாங்கி 
உறங்குகின்ற போதெல்லா மதுவே யாகும்; 
பெண்ணின்பா லிந்திரியம் விடும்போ தெல்லாம் 
பேணிவலம் மேல்நோக்கி அவத்தில் நில்லு

திண்ணுங்கா யிலைமருந்து மதுவே யாகும் 
தினந்தோறும் அப்படியே செலுத்த வல்லார் 
மண்ணூழி காலமட்டும் வாழ்வார் பாரு 
மறலிகையில் அகப்படவு மாட்டார் தாமே.


இந்த பாடலில் சூட்சுமாக நிறைய கருத்துக்கள் நிறைந்துள்ளது.அன்பால் உள்ளம் உருகி ஸ்ரீ அகத்தியர் அய்யாவை வணங்கி ,அவர் பொற்பாதம் பணிந்து இதன் பொருளை நன்கு புரிந்துகொள்ளவேண்டும்.இதற்கு நிறைய அன்பர்கள் நிறைய விளக்கங்கள் சொல்லிஇருக்கிறார்கள்.இங்கே எமக்கு எமது சிற்றறிவிற்கு கிடைத்த ஒரு வழியில் விளக்கம் தர முயற்சிசெய்கின்றோம்.உண்மையில் அய்யா, இது யாருக்கு இதன் முழுமையான பலன் கிடைக்கவேண்டுமோ அவருக்கு அவர் தாமே முன்வந்து முற்றிலும் புரிந்துகொள்ளவைப்பார் என்றே யாம் உணர்கிறோம்.


 நன்கு வாசியோகம் சித்திபெற்ற குருவிடமிருந்து வாசி பயிற்சிமுறைகளை கற்றுகொள்ளவேண்டும். இங்கே பொருள்  பரிபாஷையில் சொல்லப்பட்டுள்ளது.இதற்கு நேராக பொருள்கொள்ளல் சுத்தமாக குழப்பிவிடும்.உதாரணமாக உண்ணும் போது உயிர் எழுத்தை உயர வாங்கு ,என்றால் சாப்பாடு சாப்பிடும் போது உயிர் எழுத்தை உயர வாங்கு என்று பொருள்கொள்ளுதல் தவறு. மூச்சை உள்இழுக்கும் போது (பூரகம்) ,அ என்ற உயிர் எழுத்தை உயர வாங்கி,அப்படி உள்ளே வாங்கும் போது இது உடலில் சுரக்கும் அமிர்தத்தை புசிக்கவைப்பது ,உணரவைப்பது ,இந்த அமிர்தத்தை புசித்தால் பிறப்பு,இறப்பு கிடையாது ,என்றும் இளமையே,இதுவே அனைத்திற்கும் அனைத்து பிரச்சனைகளுக்கும் மருந்து,ஒரு குறிப்பிட்ட அதிர்வில் இந்த அகாரத்தை உள்வாங்க அது நமது உடலில் உள்ள ஒரு அமிர்தத்தை சிவ அமிர்தத்தை ,உணர்ந்துகொள்ளும் நிலையை உருவாக்கும்) உறங்கும் போது (கும்பகம்)  (உறங்காமல், தூங்கியும் தூங்காமல் இருக்கும் நிலை)அதுவே ஆகும் ,அப்படியே  நிலை நிறுத்தி, பெண்ணின் பால் இந்திரியம் விடும் போதெல்லாம் என்றால் மூச்சை வெளியிடும் போது (ரேசகம்) ,சிவமாகிய அந்த அமிர்தம் (அ), நமது இந்த ஸ்தூலமாகிய சக்தி என்பது இங்கே பெண் ,ஆக அ என்ற சிவ அமிர்தத்தை, அந்த சிவத்தை,நமது ஸ்தூல சக்தியுள் இறக்கினால், திண்ணும் காய் இலை மருந்து எல்லாம் அந்த  அமிர்தமே ஆகும் .இந்த அமிர்தமே அனைத்தும் .இப்படி தினந்தோறும் இந்த அமிர்தத்தை புசிப்பவருக்கு இந்த மண் உலகம் உள்ளவரை வாழ்வார்கள், அவர்கள் எமன் கைகளில் (மறலிகையில் )அகப்படமாட்டார் என்று ஒரு மிக அற்புதமான மருந்தினை, சிவத்தை அடையும் ஒரு ஞானத்தை அய்யா மிக அற்புதமாக சொல்லிவைத்திருக்கிறார்கள் இந்த பாடலில்.

இந்த ஒரு பாடலுக்கு உண்மையான விளக்கம் கொடுத்து,நம்முள் இருக்கும் இந்த அமிர்தத்தை உணரவைப்போர்,கண்டிப்பாக ஒரு சாதரண மனிதராக இருக்க முடியாது ,அவர் ஒரு போற்றுதலுக்குரிய மகானாகவோ அல்லது ஒரு மாபெரும் சித்தபுருஷராகவோ தான் அவர் இருக்கவேண்டும்.அவர் பொற்பாதம் பணிந்து வணங்கவேண்டும்.ஏனெனில் வாழ்வில் ஒருமுறை இதை உணர்ந்துவிட்டால் ,இந்த உயிர் என்றென்றும் சிவத்தோடு சிவமாக ஆழ்ந்து செல்லும் நிலை கிட்டிவிடும்.



 இதை எப்படி உணர்வது  ?இந்த அமிர்தத்தை எப்படி புசிப்பது ? அய்யாவின் அருள் அலைகளை உணரும்  வாய்ப்பே ஏதோ பட்டும் படாமல் சூட்சுமாக என்றோ ஒரு நாள் இந்த சிற்றறிவிற்கு கிடைக்கிறது .இதில் எப்படி இந்த அமிர்தத்தை உணர்ந்துகொள்ளும் வழியினை யாம் உணர்ந்துகொள்ளுமாறு கேட்பது ? உண்மையில் அடையும் வழியாது என எண்ணிக்கொண்டே ஒரு கோவிலுக்கு சென்று வெளிவந்தேன்.வெளிவந்து காலனியை தேடி அதனை மாட்டும் பொழுது ,ஒரு பெரியவர் பிச்சைகார தோற்றத்துடன் அங்கே மற்ற பிச்சைஎடுப்பவர்களுடன் அமர்ந்து இருந்திருந்தார்.
 "....தறிகெட்டு ஓடுது மனது ,இதுலே அகத்தியரை பார்க்கணுமா ? அகாஹ்.ஹ்ஹா... அகாஹ்.ஹ்ஹா ..."
என சிரிப்புடன் அந்த பிச்சைக்கார பெரியவர் சிரித்தார். இதை கொஞ்சம் கூட கவனிக்காமல் வெளிவந்துவிட்டேன்.பிறகு சிறிது தூரம் சென்றவுடன் தான் ஞாபகம் வருகிறது .ஆகா அந்த பெரியவர் என்னைத் தானே சொல்லியிருக்கிறார் ,கண்டிப்பாக அவர் எமது வேண்டுகோளை ஏற்று இதனை மேலும் உணர அவர் தெளிவு படுத்துவார் என எண்ணி ,வேகமாக  தேடி சென்றேன் அவர் அங்கே  இல்லை.


சிவ அமிர்தம் எனும் அற்புதத்தை  அகத்திய உள்ளங்களுக்கு ஞாபகபடுத்தல் மட்டுமே எமது முயற்சி ,இப்படியும் ஒரு வழி இருக்கிறது என்பதை ஞாபகபடுத்த எடுத்த ஒரு சிறு முயற்சியே இது.தக்க குரு பெற்று இதனை உணர்தலே அதி உத்தமம்.அகத்திய உள்ளங்களை மீண்டும் வேறு நிகழ்வில் சந்திக்கிறோம் விரைவில்.

ஒம் அகத்தீஸ்வராய நமஹா !!!
ஒம் அகத்தீஸ்வராய நமஹா !!!
ஒம் அகத்தீஸ்வராய நமஹா !!!