Tuesday, December 29, 2015

தென்கைலாயம் ஸ்ரீ அகஸ்திய மகரிஷி -ஜெயந்தி விழா -2015

அகத்திய உள்ளங்களே ஸ்ரீ அகஸ்திய மகரிஷி அய்யா அவர்களின் ஜெயந்தி விழா இந்த வருடம் 29.12.2015 செவ்வாய்கிழமை அன்று திண்டுக்கல் அருகே உள்ளே சிறுமலை ஸ்ரீ அகஸ்தியர் கோவிலில்  கோ பூஜையுடன் 1008 அஷ்ட அதிக சஹஸ்ர  கும்ப கலசாபிஷேகம் வெகு சிறப்பாக நடைபெற்றது .பல்வேறு மூலிகை யாகமும் ஐயாவுக்கு அபிஷேக ஆராதனைகளும் நடைபெற்றது.அதன் ஒரு சில தொகுப்புகளை இங்கே கொடுத்துள்ளோம்.(Exclusive to Agathieyam Viewers).

மலை மிக அழகாக  தோற்றத்தில் கைலாயம் போல  சிவன் வாழும் மலையாக காட்சியளிக்கிறது.மலை உச்சியில் எங்கும் நல்ல அதிர்வு ஆற்றல் உணரமுடிகிறது.தூயவெண்பனி போன்ற மின்னிடும் நுண் ஆற்றல்மிக்க இறை அலைதுகள்கள் மலையெங்கும் வியாபித்துள்ளது.இங்கு வந்து தவம் செய்யவேண்டிய அவசியமில்லை.சற்றே  அதன் ஆற்றல் அலையை உள்வாங்கி  அப்படியே அனுபவிக்க ஒரு இனம் புரியாத பாச அலைகள் நம்மை சூழ்ந்துகொள்கிறது,அதனை அவ்வாறே பிடித்து மேலும் தொடர நேரம் செல்வதே தெரியாமல் நம்மை ஆனந்தத்தில் ஆழ்த்துகிறது.நகர வாழ்வில் தம்மை இணைத்துகொண்ட அன்பர்கள் ஒரு முறையாவது இங்கு வந்து, இது போன்ற சூழலில் உலாவும் மூலிகை காற்றையும்,இங்கே கொட்டிகுவிக்கவைக்கப்பட்டுள்ள அதிர்வு அலைகளையும் நன்கு உள்வாங்க ,தேகத்தில்,சூட்சும சரீரத்தில் உள்ள இடர்கள் களையப்பட்டு புத்துணர்வு பெரும் என்பது அசைக்க முடியாத நம்பிக்கையாக உள்ளது.700 ஆண்டுகளுக்கு முன்னர் ஒரு மகான் தம் தோளிலேயே ஒரு சிவலிங்கத்தை தூக்கிவந்து மலையின் உச்சியிலே பிரதிஸ்டை செய்துள்ளார்கள்.மிக அற்புதமாக உள்ளது.சக்திமிகுந்து பார்க்கவே மிக ரம்மியமாக உள்ளது.மேலும் அகஸ்தியர் சிவலிங்கத்திற்கு பூஜை செய்யும் காட்சியும் சிலையாக வடிக்கப்பட்டு உச்சிமலையில் கருநெல்லிமரத்தின் கீழ் சிவனுக்கு அருகிலேயே பிரதிஷ்டை செய்யபட்டுள்ளது.



















Wednesday, December 9, 2015

பிரார்த்தனை - ஒரு வேண்டுகோள் !

அகத்திய உள்ளங்களே !!
மிகப்பெரும் மழை வெள்ளத்தால் சென்னை மற்றும் அதன் சுற்று வட்டாரமும் மிக கடினமாக பாதிக்கப்பட்டது என்பது தாம் அனைவருக்கும் தெரிந்திருக்கும் என நம்புகிறோம்.இன்னும் சில பகுதிகள் வெள்ள நீர் வடியாமல் தொழில்துறைகள் ,அதில் வேலைபார்க்கும் அன்பர்கள் ,தங்கள் உடைமைகள்,உறைவிடங்கள், யாவும் இழந்து,மிகுந்த பாதிப்புக்குஉள்ளாகி,கொஞ்சம் கொஞ்சமாக மீண்டுவருகிறார்கள்.அகத்திய உள்ளங்கள் அனைவரும் தங்களால் முடிந்தவரை எவ்விதமேனும் பொருளோ,உடையோ அல்லது ஏதேனும் ஒரு வகையில்  உதவி செய்யுங்கள் என  உள்ளன்போடு வேண்டுகோள் வைக்கிறோம்.அகத்திய உள்ளங்கள் அனைவரும் எங்கெங்கு இருந்தாலும் மனதால் ஆழ்ந்து அய்யாவை வணங்கி ,பாதிக்கப்பட்ட பகுதிகளையும் மக்களையும்  உள்ளத்தால் நெஞ்சம் நிறைந்து வாழ்த்தி ,அவர்கள் இயல்பு வாழ்கை விரைவில் மீண்டெழுந்து மக்கள் யாவரும் சுபிட்சமாக வாழவேண்டும் என்று பிராத்தனை செய்யவேண்டும் என பணிவன்புடன் கேட்டுக்கொள்கிறோம்.
ஆதவனின் காந்த அலைக்கதிர்களும்,,சனிகிரகத்தின் காந்த அலைக்கதிர்களும் ,பாதிக்கபட்ட  சென்னைக்கும்,மக்கள் அனைவருக்கும் நன்மை பயக்குமாறும்,துயரத்தால் வாடும் மக்களுக்கு, அசைக்க முடியா நம்பிக்கையும் ,மன தைரியத்தையும் இறைவன் அவர்களுக்கு வழங்கவேண்டுமென பிரார்த்தனை செய்யவேண்டுமாறு பணிவோடுகேட்டுக்கொள்கிறோம்.

ஒம் அகத்தீஸ்வராய நமஹ !!!
ஒம் அகத்தீஸ்வராய நமஹ !!!
ஒம் அகத்தீஸ்வராய நமஹ !!!


Thursday, November 12, 2015

மெய்கண்ட சித்தர் குகை - கன்னிவாடி

உள்ளம்  இறைவன் வாழும் ஆலயம்.சிவன் வாழும் ஆலயம். எதுவும் இங்கே சாத்தியம்.அனைவரையும் வாழ்த்தவும் முடியும் இல்லை வேறொரு வழியில் சபிக்கவும் முடியும்.அந்த அளவுக்கு இறைவனால் ஆசிர்வதிக்கப்பட்டது.கர்மவினை அதன் தன்மைக்கேற்ப ஆட்டிபடைக்கும் கோள்கள் ,அதன் காரணமாக வேலைபளு,அதனால்  நாட்போக்கில் உண்டான  மனகசப்பு,ஒரு இறுக்கம் ,இவை யாவும் உள்ளத்தை இறைவன் வாழும் ஆலயத்தை கலங்கப்படுத்திவிடுகிறது.இந்த கலங்கத்தை சரிபடுத்த தூய்மை இங்கே அவசியமாகிறது.இதற்கு நிறைய வழிகள் உள்ளது.ஏதேனும் ஒரு வகையில் சிவதொண்டில் ஈடுபடுவது,சிவதரிசனம் காண்பது, தவம் செய்து இறைவன் ஆசிகளை பெறுவது, ஜீவ சமாதி சென்று சித்தர் ஆசிகளை பெறுவது,அன்பால் உள்ளம் உருகி ஆழ்ந்து அனைவரையும் வாழ்த்துவது என நிறையவழிகள் உள்ளது.ஏதேனும் ஒரு வகையில் இறைநிலையை உணர்தல் அவசியமாகிறது. இல்லை எனில் ஆன்மீக வாழ்வில் இருந்துகொண்டு இந்த பொருள் தேடும் வாழ்கை வாழ்வது என்பது கடினமாகிவிடுகிறது.

வாருங்கள் கன்னிவாடி எனும் ஒரு இயற்கை எழில் சூழ்ந்த மலைக்கு செல்வோம்.இங்கே செல்வதற்கு நிறைய வழி  இருக்கிறது.ஓட்டன்சத்திரத்திலிருந்தும்,திண்டுக்கல்லிருந்தும் வரலாம்.யாம் சென்ற வழி ,மதுரை to திண்டுக்கல் NH7 Bye-pass Road வழியே டோல்கேட் தாண்டி    ரொம்ப தூரம் சென்று இடது புறம் திரும்பி SH 37 road ஜ பிடித்து செம்பட்டி வழியே சென்றால் கன்னிவாடி வரும்.,பிறகு அங்கிருந்து  ஒரு இரண்டு கிலோமீட்டர் சென்றால் கன்னிவாடி ஊர் எல்லை தாண்டி,   பிறகு அங்கிருந்து ஒரு இரண்டு km சென்றால் இடது புறமாக (சோமலிங்கேஸ்வரர் கோவில் செல்லும் வழி என்று ஒரு அறிவிப்பு பலகை வரும் அதன் வழியே அவ்வாறு செல்ல சோமலிங்கேஸ்வரர் கோவில் மற்றும் மெய் கண்ட சித்தர் குகைக்கு  நேரடியாக அழைத்து செல்லும்.குகை மற்றும் சோமலிங்கேஸ்வரர் கோவில் அனைவரும் தரிசிக்கலாம் நீண்ட  நெடியமலை ஏற வேண்டிய அவசியம் இல்லை.மலையின் அடிவாரத்தில் இயற்கை எழில் சூழ அமைந்துள்ளது.




ஒரு முறை சிவபெருமானும் பார்வதி தேவியும் ஆகாய மார்க்கமாக செல்லும் போது ,தேவியார் இங்குள்ள மலையின் அழகை பார்த்து வியந்து நின்றுவிட்டார்களாம்.பிறகு சிவபெருமான் , இம் மலையின் அழகில் சொக்கிபோய்நிற்கும் தேவியாரை பார்த்து, கன்னி வாடி என்றழைக்க ,இந்த ஊர்  கன்னிவாடி என்று பெயர் பெற்றது என்கிறார்கள் . சிவபெருமான் நின்ற வடிவிலும் மகாவிஷ்ணு சயன கோலத்திலும் இருந்ததை கண்டு, கோரக்க  சித்தர்  திருவாய் மலர்ந்து அருளிய அரிகேசவ பருவத மலை என்கிறார்கள் (கோரக்கர் மலை வாகடம்). மெய்கண்ட சித்தர் ,குண்டலினி சித்தர் ,வாலையானந்தர்,முத்தானந்தர் மடாதிபதிகளும்இன்றும் இங்கே வணங்கிக்கொண்டிருக்கும் அற்புத திருத்தலம் இந்தமலை என்கிறார்கள் (போகர்  மலை வாகடம்).
போகர் சித்தர் சாபம்நீக்கப்பட்டு, தவம் செய்துகொண்டிருக்கும் தருவாயில் தமது சீடர்களான கொங்கணர்,புலிப்பாணி ,கருவூரர்  சித்தர்களை
 அழைத்து நவபாசானங்களை அறைப்பதற்கு பத்மினி ரக பெண் தேவை என கூற,சீடர்கள் அனைவரும் எங்கெங்கு தேடியும் பத்மினி ரக பெண் கிடைக்காத காரணத்தால் ,ஒரு கல் மண்டபவத்தில் உள்ள கற்சிலையை உயிர் கொடுத்து அழைத்துவர, போகர் தம்  தவபலத்தால் வந்தது பத்மினி ரக பெண் அல்ல இது ஒரு கற் சிலை என உணர்ந்து "கல் நீ வாடி "என அழைத்தாராம் (கருவூரார் ஜாலத்திரட்டு) இதுவே மருவி  நாளடைவில் கன்னிவாடிஎன அழைக்கப்பட்டது என்கிறார்கள்.
 





உண்மையிலேயே மலை அவ்வளவு அழகாக உள்ளது.நீண்ட சிவலிங்கம் போல் இருக்கும் இந்த மலையின் அழகை பார்த்து ரசிக்க நேரம் போவதே தெரியவில்லை.அவ்வளவு அழகாக உள்ளது.லிங்கம் போல் உயர்ந்து நீண்டு நெடிய மலையாகவும் அதில்ஆங்காங்கே உள்ள  பசுமையான மரமும் செடியும்  அதன் அழகும் பார்க்கும் யாவரையும் கவர்ந்திலுக்கிறது.நீண்டு நெடியஉச்சி அந்த உச்சிக்கு எவ்வாறு செல்வது என எண்ணிக்கொண்டிருக்க ஒருவர் எமக்கு தெரியும் ,அங்கே சென்று வர இரண்டு நாட்கள் ஆகும் ,ஆங்கே போகர் தவம் செய்தகுகை ,கோரக்கர் தவம் செய்த குகை இன்னும் பல அரிய் மூலிகை உள்ளது எனவும் சொன்னார்.கண்டிப்பாக இரண்டு முழு நாட்கள் ஒதுக்கி தக்க பாதுகாப்புடன் அனுமதி பெற்று செல்வது உசிதம்.









இங்கே ஒருபழமையான வில்வமரம் ஒன்று உள்ளது.நீண்டு தவண்டு விநாயகருக்கும் ,சோமலிங்ககேஸ்வரருக்கும் நிழல் பரப்பி, சேவை செய்துவருகிறது.எட்டி பிடித்து ஒருகை நிறைய வில்வஇலைகளை பறித்து சிவனின் பாதங்களில் வைத்தோம்.இது போல ஒரு வாய்ப்பு கிடைத்தால் சிரமம் பாராது முழுவதும் திறம்பட பயன்படுத்திக்கொள்ளுங்கள்.ஏனெனில் வில்வஇலைகளால் சிவனுக்கு நாமே அர்ச்சனை செய்வது  நமது கர்மவினைபதிவுகளை  வேரறுக்கும் .சிவ அதிர்வோடுள்ள வில்வஇலைகள் நம் உடலோடு ஒன்றுகலக்க ,உடலில் உள்ள செல்களுக்கு அமிர்தங்களை ஊட்டும் பணி ,அதாவது சிதைவடைந்த செல்களை புதுப்பிப்பது செல்களை நன்றாக இயங்கவைப்பது  என்பது ஒரு புறம் இருக்க ,மறுபுறம் கோடிகோடி புண்ணியம்,சிவலயம் ,சிவத்தில் ஒன்றுகலந்து நம்மை சிவனின் அருகில் அழைத்துச்செல்லும்பாக்கியம் கிட்டும் விரைவில்.



அதன் அருகே குகை .குகைக்கு அருகிலே ஒரு சிறிய நீர்வீழ்ச்சி , நீர்பருகி,பிறகு மீண்டும் குகை வந்தோம்.குகை மிக அழகாக உள்ளது.தீபஒளி சுடர் போல அமைப்பு உள்ளே  முற்றிலும் லிங்க வடிவில் hollow space ,மெய்கண்ட சித்தர் தவம் செய்த குகை என்கிறார்கள்.மிக அதீத சக்தி நிறைந்துள்ளது இக்குகையில் .உள்ளே செல்ல அனுமதி இல்லை .அருகிலே கொஞ்ச நேரம் நின்று கவனிக்க ,உள்ளே லிங்க வடிவில் நிறமற்ற கண்களுக்கு தெரியாத  நிரம்பி வழியும் அரூப சக்தியின் ஆற்றல் உணரமுடிகிறது. ஒரு மூச்சில் நன்கு ஆழ்ந்து முடிந்தவரை எவ்வளவு சுவாசம் இழுக்க முடியுமோ அதுபோல அவ்வளவு சக்திஅலைகளை  நன்கு உணரமுற்படும் போது ,உடல் ,உள்ளம் யாவும் முழுவதும் நிறைந்துவிடுகிறது .அதற்கு மேல் அங்கே நிற்க இயலவில்லை எனவே  அருகிலே வந்து அமர்ந்துவிட்டோம் . கண்கள் மூடி  அமர்ந்து ,இவை என்ன என சிந்திக்க ஆழ்ந்து உள்நோக்க ,எம்முள் இதற்கு முன் நின்ற முறையில் பெறப்பட்ட சக்தியே , உடல் முழுவதும் நிரம்பி இருக்கிறது.அதே மீண்டும் மீண்டும் சக்திஅலைகளை உண்டால் எப்படி இருக்கும் அதுபோலவே இருந்தது.ஆழ்ந்து உட்செல்ல கல்நெஞ்சமும் கரைகிறது.அன்பின் அலைகளை உணர முடிகிறது.இக்குகையில் சிவலிங்கம் தெரிகிறது ,ஒரு சித்தரும் தெரிகிறார் ,சிவலிங்க வடிவில் சித்தரா அல்லது  சித்தர் வடிவில் சிவ லிங்கமாக எனும் காட்சி  எம் எண்ணத்துள் மருவுகிறது .எல்லாம் ஓரிரு நொடித்துளிகளே .அன்பின் அலைகளை பிடிக்க தெரிந்தவர்கள்  கொஞ்சம்,  ஆழ்ந்து இங்கே இந்த படத்தில் உள்ள குகையை நன்கு ஆழ்ந்து உட்சென்று ,பிறகு கண்களை மூடி இது எப்படி இருக்கும்  என கண்களை மூடி தியானித்து பாருங்கள்.இங்குள்ள சித்தனின் அருள் ஆசிகள் உங்கள் உள்ளங்களை  நொடிப்பொழுதில் நீங்கள் இருக்கும் இடம் வந்து அரவணைக்கும் . நேரே இங்கு வந்து தரிசனம் செய்வது  போல ஒரு  சூட்சும அருள் தரிசனம் இந்த லிங்க வடிவ குகையில் இருக்கிறது. இந்த அற்புத குகை சித்தர் மற்றும் இங்குள்ள சிவ தரிசனம் கண்டிப்பாக ஆத்மாவை அதன்   கர்மவினை களைந்து புனிதப்படுத்தும் என்பது உண்மை.

இக்குகைக்கு அருகிலே கீழேஇறங்கி சென்றால் ஒரு வில்வமரம் உள்ளது .அதன் சிறப்பு என்னவெனில் அதில் பதிமூன்று இதழ்கள் உள்ளது.மிக விஷேமானது என்கிறார்கள்.முதலில் ஒரு வித்தியாசமான சுவையும் பிறகுகொஞ்சம் கசப்பு தன்மையும் நிறைந்துள்ளது.யாம் இதுவரை பார்த்தது இல்லை .இதற்கு முன் பார்த்ததெல்லாம் மூன்று இதழ்கள் கொண்ட வில்வம் .இறைவன் அன்பால் தம் கருணையால் மனிதர்களுக்கு அளித்த வரப்பிரசாதங்களில் இந்த வில்வமும் ஒன்று.



 


அகத்திய உள்ளங்களை  மீண்டும் வேறொரு நிகழ்வில் விரைவில் சந்திக்கிறோம்

ஒம் அகத்தீஸ்வராய நமஹ!!
ஒம் அகத்தீஸ்வராய நமஹ!!
ஒம் அகத்தீஸ்வராய நமஹ!!

Friday, October 23, 2015

ஒம் நம சிவாய !!!



 மனிதனின் மனோ நிலை எந்த அளவுக்கு பக்குவம் அடைகிறதோ,எந்த அளவுக்கு ஞானம் பெறுகிறதோ அந்த அளவிற்குதான் அவனை  பொறுத்தவரை இந்த உலகமும் வாழ்கையும் உயர்வாக தெரியும். மனம் தான் வாழ்க்கை மனம் தான் உலகம்  என்பதை மனிதன் புரிந்துகொள்ளவேண்டும்  என்பது தந்தையின் வேதவாக்கு .பலகீனமான மனம் எதற்கும் ஒத்துவராது.அதை வைத்துகொண்டு எதையும் சாதிக்க இயலாது.ஆக மனம் வலுப்பெறவேண்டும்,மனதின் ஆற்றல் நன்கு தெரிந்து உணரவேண்டும்.எது வரினும் அதனை முதலில் எதிர்கொள்ளுதல், தாங்குதல் இந்த மனம்.இது ஒரு நிலையில் இல்லை எனில் எதையும் எதிர்கொள்ளல் இயலாது. இந்த' மனம் நமது உடலில் உண்டான ஜீவகாந்த ஆற்றலின் அடுத்த நிலை அடுத்த கட்டம்.இவை செலவாகிகொண்டேயிருக்கும் ,அவ்வாறு இது வரை பழக்கப்டுத்திக்கொண்டுவிட்டோம்.அது வந்தவழி திரும்பி உள்நோக்கி பார்க்க அமைதிபெற்று ஆற்றல் தம்முள் சேர்த்துக்கொள்கிறது.

எந்த ஒன்று கிடைத்தால் அல்லது அதை உணர்ந்தால் இந்த மனம்  அது நிம்மதி பெரும்,அமைதி பெரும்,இன்றைய காலகட்டங்களுக்கு தகுந்தார் போல நமது வாழ்வியல் நிகழ்வுகள் சீராக இயங்க  ஒத்துழைப்பும் ,யாருமே தர இயலாத ஒரு தீர்வும் தரும்? பிரம்மத்தில் மனதினை வைத்தல் ஆனந்தம்.பிரம்மமாகவே இருத்தல் அதைவிட ஆனந்தம். இருக்கும் வேலை,செய்யவேண்டிய வேலை,கமிட்மென்ட்,வாட்ஸ்அப் ,கைபேசி அழைப்பு etc ,இவை எல்லாவற்றையும் சற்றே நிறுத்திவிட்டு ,இவைகளின் தொடர்புகள் சற்றும் நம்மை சீண்டாமல் துண்டித்துவிட்டு, ஒரே ஒரு ஒரு மணிநேரம் கண்களை மூடி ,உள்நோக்கி மனதை அதன் சாதரணஅலை ஓட்டத்திலிருந்து சற்று கீழ் இறங்கி,மனதை அதன் வழியே ,மெல்ல மெல்ல அதன் அலைசுழல் குறைத்து ,சிவத்தைநோக்கி ,அன்பின் அலைகளை நோக்கி செலுத்த, ஒரு சிறிய அமைதி தென்படும்.அவ்வாறே அதன் மூலம் நோக்கி செல்ல செல்ல ஒரு காட்டாறு வெள்ளம் போல் உருத்திரண்ட சக்தி ஒன்று அழைத்துச்செல்லும்.அந்த உருத்திரண்ட சக்தியை நன்கு உள்வாங்கி ,அப்படியே நம்முள் நிலைத்திருக்க பழக பேரானந்தம் கவ்விக்கொள்ளும்.

எங்கெங்கும் விரியும் பிரபஞ்ச நாயகனின் ஆற்றல்,அன்பின் அலைகள் நிறைந்த செறிவு,ஈர்ப்பு எனும் ஆற்றல் ,காரிருள் கட்டுக்கடங்கா ஆற்றல்,இவனுள் உள்ள அன்பே இத்தனை ஈர்ப்பிற்கும் காரணம்.இந்த ஈர்ப்பு அலைகளை தினந்தோறும் உணரவில்லையெனில் ஏதோ ஒன்றை இழந்தது போன்ற ஒரு ஏக்கம் ,ஏனெனில் அந்த அளவுக்கு இவன் நம்முள்  பிண்ணிப்பிணைந்துள்ளான் இவன் இல்லை எனில் பஞ்ச பூதங்கள் இல்லை,பஞ்ச பூதங்கள் இல்லை எனில் நாம் இல்லை. சூட்சுமமாகிய சிவத்தில்   மூழ்க,மூழ்க தம் நிலை கரைந்து ஒன்றுமில்லாமல் போகிறது.


அன்பின் அலைகளை தேடித்தேடி, நாள் தோறும், நொடி தோறும், உணர ,பழக பழக, நம்மை அதனோடு இணைக்கும் ஒரு ஜீவ அன்புஅலை  தொடர்பு உருவாகிறது.வெட்டவெளி ஒன்றுமிலா ஒன்று அதற்குதான் எத்தனை மாபெரும் ஆற்றல்,கொஞ்சநேரம் இந்த ஒன்றுமிலா ஒன்றைபற்றி அது என்ன தான் என அறியமுற்படும்போதே ,ஒரு விதசக்தி ஈர்க்கிறதே ...! இவனைபற்றி எண்ண நினைக்கும்போதே இத்தனை அன்புஅலைகளா  ! யாம்பரிசிப்பது ..எத்தனை சுகம் இறைவா...!!எம்முள் நிந்தன்அன்பு கலந்தஅலைகள் ..மெல்லமெல்ல  கரைந்து எம்மைஆட்கொள்கிறதே... இறைவா .!!மாபெரும் பிரபஞ்ச ஆற்றலே ..!! அணுவிலும் சிறியோனே...!!!  கற்பனைக்கும் அப்பாலும் விரிந்துகொண்டேஇருக்கும் ஆழ்ந்து அகண்ட பிரபஞ்சமே!!!காரிருள்  சூழ்ந்த பேரருளே...!! ..வெட்டவெளியே !! சங்கினும் தூய வெண்மைநிறமுடையோனே..!!பேரொளியே!!!எங்கும் நீக்கமறநிறைந்தோனே..!!எம்நாயகனே !!எம்முள் என்றும் உம் திவ்ய தரிசனம் காண வழிவகை செய்யுங்கள் இறைவனே !!!



ஒம் நமசிவாய சொன்னால் சித்தர் தரிசனம் கிடைக்கும்.காலை மாலை இருவேளை ஒம் நமசிவாய சொல்ல  சொல்ல சொல்ல  நாற்றுக்கிடையே களை பறித்து எரியப்படுவது போல் ,தூய ஆத்மாவின் உன்னத தன்மையை மாசுபடுத்தும் கர்மவினை பதிவுகள்  ஒவ்வொன்றாக பிடுங்கி  ஏறியப்படுகின்றன இந்த சிவ மந்திரத்தால், என்பது முற்றிலும் உண்மை.ஒம் நமசிவாய எனும் எழுத்துக்கள் ஒரு சாதரண எழுத்துக்கள் அல்ல.ஈடுபாடு கொண்டு தொடர்ந்து உச்சரிக்க நல்ல அதிர்வுள்ள அலைகளை உச்சரிப்பவர் உடல் முழுவதும், உள்ளம் முழுவதும் சுழலசெய்கிறது.முதலில் ஒரு ஆர்வம்  ஒரு ஈடுபாடு  வரவேண்டும் இது  நாம் செய்யும் எந்த ஒரு செயலுக்கும் பொருந்தும் .ஆர்வம் ஈடுபாடு இல்லைஎனில் எல்லாவற்றையும் மூடிவைத்துவிடவேண்டியதுதான்.யாரொருவர் தொடர்ந்து ஈடுபாடுடன் சிவ மந்திரத்தை உச்சரிகிறார்களோ அவர்கள் கர்மவினை பதிவுகள்  அன்றுமுதல் வேரறுக்கப்படுகின்றன .இதனை கூறுவதற்கு முதலில் நம்மில் எத்தனை பேர் ஆயத்தமாக இருப்பீர்கள் என்றால் கண்டிப்பாக விரல்விட்டு எண்ணிவிடாலம்.ஏனெனில் நம்மைசுற்றி எப்பொழுதும் இந்த மந்திரம் ஒரு அதிர்வுஅலைகளை தந்துகொண்டேயிருக்கும்,இது போல் நல்ல அதிர்வுள்ள அலைகள் இருக்கும் மனிதர்கள் வெகுஅரிது.



ஒம் நம சிவாய எனும் சிவ மந்திரம் யாம் அறிந்தோ அறியாமலோ எம்முள் ஒரு நாள் முழுவதும் சுழன்றுகொண்டிருந்தது,அப்போது ஒரு ஜீவ சமாதிக்கு செல்லும் வழிதென்பட்டது.இறைஅலைகள் சூழ்ந்தவுடன் மாயை அலைகள் விலகுவது போல்,தடை அகன்று ஜீவசமாதி செல்லும் வழியை மிக அழகாக எம்முள் உணர்த்தியது.இங்குள்ள மகான் எம்மை அழைத்தாரோ அல்லது சிவ மந்திரம் எம்மை இங்கு அழைத்துவந்ததா ? ! இரண்டும் ஒன்றோடு ஒன்று தொடர்புடையது போல்,அங்கே எவர் அந்த அலைஇயக்கத்தில் வருகிறார்களோ அவர்கள் எல்லாம் இந்த தரிசனம் பெறுகிறார்கள். மனதின் அதிர்வு அலை குறைந்தவுடன் அதற்கு ஒத்த அலைநீளத்தில் உள்ள அத்தனையும் தொடர்புகொள்ளும் அதிசயம்.நிகழ்கிறது. மிக அமைதியாக சிவ மந்திர நாம ஒலியோடு இருந்தது மகானின் ஜீவசமாதி.மகானின் ஆற்றல் அந்த இடம் முழுவதும் நிரம்பியிருக்கிறது.




அங்குள்ள அமைதியில் ஆழ்ந்து தவத்தில் செல்ல ,அமைதி நம்மை சூழ்கிறது.அமைதிவிரிகிறது.மகான் எமது சூட்சும தேகத்தோடு சும்மா புகுந்து விளையாடுகிறார்கள்.சூட்சும  தேகம் வா என்றால்  வருவதும்,செல் என்றால் செல்வதும் பிரமிப்பாக உள்ளது. எமது முற்பிறவி நிகழ்வுகளை எமக்குள் விளக்குகிறார்கள்.தலையணையை விட்டு அதன் உறையை கழட்டுவதுபோல ,எம்முள்ளிருந்து சூட்சும தேகத்தை பிரித்து ,எம்முள்  ஏற்கனவே பதிந்துள்ள முற்கால நிகழ்வுகளை  விரித்து காண்பிக்கிறார்கள், என்றோ யாம் வாழ்ந்த வீடு,அங்குள்ள உறவினர்,அவருக்கும் எமக்கும் உள்ள தொடர்பு,நிகழ்வுகள் எல்லாம் விரிகிறது.எல்லாம் பாச அலைகள் பிண்ணி பிணைந்துள்ளது ,அவற்றிற்கும் எமக்கும் உள்ள தொடர்பு இன்னும் தொடர்கிறது,அதை விட்டு சட்டென வரஇயலவில்லை பிறகு மீண்டும் எம்முள்ளே எம்மை சூட்சும தேகத்தை சேர்க்கிறார்கள்.இது தான் நீ என்றும் இது போன்ற பதிவுகள் தாம் இன்று நீ தாங்கிவந்துகொண்டிருக்கிறாய்,இவையின் சாராம்சமே இன்று உமது தன்மை,உமது மனதின், உயிரின் சாராம்சம், என்றும் ,இந்த பிறவிப்பற்றுநீங்க சிவத்தை தொடர்ந்து சொல் என சொல்லாமல் எம்முள் நிகழ்த்தி காண்பித்துவிட்டார்கள்  அய்யா அவர்கள். இந்த நிகழ்வோ ஒரு இனம் புரியாத பாச நிகழ்வாக தெரிகிறது.அப்பப்பா போதும் எடுத்த பிறவிகள் என்றே தோன்றுகிறது.இறையோடு மீண்டும் மீண்டும் உழன்று ,அதன் தன்மையிலேயே ஊறி,அதுவாகவே மெல்ல மெல்ல உணர்ந்து,எப்படியாவது இந்த ஜென்ம கர்மவினை கழித்து,இந்த பிறவியை இனிமேலும் தொடரவேண்டாம்  என்றே  எண்ணத்தோண்றுகிறது.இங்குள்ள மகான் பெயர் தாடிகார சுவாமிகள். சென்னையில் உள்ள ஆலந்தூரில்  உள்ளது.வாய்ப்பு கிட்டும்போது ஐயாவின் ஜீவசமாதி சென்று அருள்ஆசிகளை பெற்றுவாருங்கள்.எந்த ஒரு ஜீவசமாதி சென்றாலும் அங்கேயுள்ள மகான்கள் யாவரும் அன்பின் கருணையால் அருள் அலைகளை அள்ளித்தந்த வண்ணம் உள்ளார்கள்.விரும்பி ஏற்றுக்கொள்ளும் பக்குவம் ,உணர்ந்து கொள்ளும் பக்குவம், கண்டிப்பாக நம்மை நமக்குள் அவைகளை உணரும் தன்மையை எற்படுத்திக்கொள்ளுதல் மிக அவசியமாகிறது.இந்த அலை உணரும்  பக்குவத்தை  மனதிற்கு வாரி வழங்கும்  யாம்  அனுபவத்தில் கண்ட இரு மந்திரங்கள் ஒன்று ஸ்ரீ பைரவர் காயத்ரி மற்றொன்று இந்த சிவ மந்திரம் . அதன் தாத்பரியத்தை நன்கு உணர்ந்து வாழ்வில் எல்லாநன்மைகளையும் பெறவேண்டும் என அகத்திய உள்ளங்களை வாழ்த்தி  வணங்கி ,மீண்டும் வேறொரு நிகழ்வில் விரைவில் சந்திக்கிறோம்


ஒம் அகத்தீஸ்வராய நமஹ !!!

Saturday, September 12, 2015

சிவமும் சிவயோகியும் .!!


இந்த உலகத்தில்  எழுதிவைக்கப்பட்ட வரலாறு தொடங்கிய காலம் முதல் இன்று நாம் கண்ணால் காணும் காலம் வரை  எத்தனை ,எத்தனை, சிவயோகிகள் ...!! ஒம் நமசிவாய எனும் தாரகமந்திரம் ஒன்றை மட்டும் வைத்துக்கொண்டு  சிவத்துள் தம்மை மறந்த எத்தனை எத்தனை  ஆயிரமாயிரம் மகான்கள் ..!!!  அவர் தம் ஜீவசமாதிகள்..!!,இவை தமக்குபிறகும் தொடரவேண்டும் ,சிவமே இறைநிலை ,இறைநிலையே சிவம், என மக்கள் சிவத்தை உணரவழிவகை செய்ய, இவர்கள் சூட்சுமாய் அரூபமாய் இன்றும் ....இன்றும்....இப்பொழுதும் .... இந்த காலகட்டத்திலும்  அன்புள்ளம் கொண்ட ஆத்மாக்களுக்கு வழிநடத்தும், சிவலயத்தில் ஈடுபடுத்தும் ,இவர்கள் கட்டிவைத்த ,எத்தனை எத்தனை  பெருமைமிகு சிவஆலயங்கள்  !!.இம்மண்ணில் பிறப்பெடுத்ததற்கே பெருமை அல்லவா கொள்ளவேண்டும் ..!! அதுவும் புண்ணியவான்கள் அருள்சூழ்ந்த இடத்தில் வசிப்பது,சுவாசிப்பது, இருப்பது ,நடப்பது,என அனைத்தும் ஒரு சுகமான அனுபவமே...அதுவும் அவர்கள் அரவணைப்பில் வாழ்வது இறை அருகே நம்மை தாமாகவே அழைத்துசென்றுவிடும் !!

இன்றும் நம்மால் உணரஇயலாத ,சிவலயத்தில் இருக்கும் மகான்கள், இன்றும்.... என்றும்... இவர்கள் யாவரும் சிவத்துள் மூழ்கும் காரணம் தான் என்ன ? புரிய இயலா சிவனின் ஆற்றலா !? எதற்கும் மூலமான சிவத்தின் ஈர்ப்புஅலைகளா !? ஆதி அந்தம் இல்லாத இவன் நடத்தும் லீலைகளின் ,ஓர் அங்கமாக இன்று இருக்கும் இந்த ஆத்மாவின் பெருமைஉணர்ந்து ,இந்த நீர்க்குமுளி வாழ்விற்கு முற்றுப்புள்ளிவைக்கும் ஒரு நாடகமா !? யாவற்றையும் ஒன்றாக சமநேர் நோக்கான பார்வையுடன் பார்த்து ,கோடான கோடிஆத்மாக்களையும் அன்பால் அரவணைக்கும் ,என்றும் வற்றாமல் ததும்பி வழியும் அன்பு அலைகளின் அதிநுட்ப திறத்தை காண்பிக்க நினைக்கும் ஒரு பயணமா !?  எம்முள் இருந்து தானே இந்த ஜடம் முதல் இதழ் வாசிக்கும் அன்பர் வரை ....இறையாகிய எம் பயணத்தில் ,எம்மை யாமே அறியும் பயணத்தில், இடைப்பட்ட ஒரு நிலைதானடா தூசிக்கும் கீழுள்ள  உமது கர்மவினை, அதனால் உண்டான பாவ புண்ணியங்கள் யாவும் ,எதுவும் உமதல்ல ,எதுவும் நிரந்தரம் அல்ல, யாம் ஒருவனே நிரந்தரமானவன், என்பதை உணர்த்த இவன் செய்யும் புரிய இயலா விந்தையா ....!? இவனின் அன்பை தான் அளவிட முடியுமா ? கற்பனைக்கு எட்டாத சப்தமாய், நிசப்தமாய் விரிந்துகொண்டேயிருக்கும் பிரபஞ்சத்தை படைத்து,அதில் ஆயிரம்  ஆயிரம்கோடி ஜீவராசிகளை உருவாக்கி,அனைத்திற்கும் அமுது படைத்து, செயலுக்கேற்ற விளைவு தந்து, அரவணைத்து ,காத்து, என்றும் அன்பு அலைகளை ஊடுருவ செய்து, எவனும் தம் நிலைஅறிய இயலாத ஆற்றல் எம்முள் உள்ளது  என்பதை விளக்கும், யாரும் அறியமுடியாத தத்துவமா ?!

யார் அறிவார் சிவனின் திருஉள்ளம்....!! அடர்ந்தும் ,படர்ந்தும், ஆழ்ந்தும் அகன்றும், விரிந்தும் ,எங்கும் எங்கெங்கும் யாவற்றையும் சூழ்ந்துள்ள இவன் தன்மை இவன் பெருமை யார் அறிவார் ...!!! இவனை உணர ஆரம்பித்தவர் இவனுள்ளே மூழ்கினர் ...மூழ்கியவர் அவர் தம் பயணத்தை தொடர்ந்தவண்ணம் உள்ளனர்.!!


எதற்கும் ஒரு மூலம் சிவம், எந்த ஒரு மந்திரத்திற்கும் மூலம் .."ஒம் நமசிவாய" எனும் மந்திரம்.சர்வமும் இதில் அடக்கம்.ஒம் நம சிவாய எனும் சிவ மந்திரத்தில் ஒளிந்துள்ளது ஒரு நாயோட்டு மந்திரம். அது என்ன நாயோட்டு மந்திரம் ? சிவனுக்கும் இதற்கும் என்ன தொடர்பு? சிவனுக்கும் நமக்கும் என்ன தொடர்பு ? சிவ யோகியருக்கும் இந்த நாயோட்டு மந்திரத்திற்கும் என்ன தொடர்பு ? இந்த நாயோட்டு மந்திரத்தை சரியாக புரிந்துகொண்டால் ,சிவலயம் கிட்டிவிடுமா? இங்குள்ள சரியான சூட்சுமத்தை புரிந்துகொண்ட சிவயோகியர்  தம்மை இதில் இழந்து,ஒரு சிவ பழமாக,  சிவத்தின் சாரமாக , இந்த சிவத்தில் மூழ்கிகொண்டேயிருக்கும்  இரகசியம் தான் என்ன...!?

பின் வரும் மந்திரத்தை இங்கு உள்ளது போலே இடைவெளிவிட்டு தொடர்ந்து சொல்லி வாருங்கள்..

சிவாய சிவாய சிவாய நம ஒம் !!!சிவாய சிவாய சிவாய நம ஒம் !!!
சிவாய சிவாய சிவாய நம ஒம் !!!சிவாய சிவாய சிவாய நம ஒம் !!!
சிவாய சிவாய சிவாய நம ஒம் !!!சிவாய சிவாய சிவாய நம ஒம் !!!
சிவாய சிவாய சிவாய நம ஒம் !!!சிவாய சிவாய சிவாய நம ஒம் !!!

சிவாய சிவாய சிவாய நம ஒம் !!!சிவாய சிவாய சிவாய நம ஒம் !!!
சிவாய சிவாய சிவாய நம ஒம் !!!சிவாய சிவாய சிவாய நம ஒம் !!!
சிவாய சிவாய சிவாய நம ஒம் !!!சிவாய சிவாய சிவாய நம ஒம் !!!
சிவாய சிவாய சிவாய நம ஒம் !!!சிவாய சிவாய சிவாய நம ஒம் !!!


தொடர்ந்து சொல்லி உடலில் மனதில் வரும் அதிர்வலைகளை நன்கு உள்வாங்கிபாருங்கள்,சிவம், சிவ அதிர்வு ,வேரறுக்கும் கர்மவினையை.



சிவயோகி தனக்கென எதையும் வைத்துக்கொள்ளமாட்டான்,எல்லா மருத்துவமும் தெரிந்தவன் ,அத்தனை வர்மபுள்ளிகளும் இவனுக்கு அத்துபடி, தாம் செய்யும் எந்த மருத்துவத்திற்கும் அதற்கான மருந்திற்கும் சன்மானம் வாங்கமாட்டான். ஏனெனில் இவன் வந்த வழி சிவன் வழி,சிவனுக்கென எந்த சொத்தும் கிடையாது .ஏனெனில் எல்லாம் சிவன்  சொத்து ,எல்லாத்தையும் சிவமாகவே பார்க்க பழகியவன் .இவன் திருவாய் திறந்து பேசினாலே அது ஒரு  சிவகீதை ,அது சிவ ஞானம், அது சிவ தீட்சை ,அது சிவ விளக்கம் ,அது ஒரு சித்தன் அருள் வாக்கு,இப்படி சொல்லிக்கொண்டே போகலாம்,,அந்த அளவிற்கு சிவத்தில் ஆழ்ந்து மூழ்கியவன் சிவயோகி.எளிமையே இவன் சிறப்பு.இப்படி ஒரு சிவயோகி இந்த காலகட்டத்தில் வாழஇயலுமா ? இவை எல்லாம் இந்த கலியுகத்தில் சாத்தியம் தானா ? .ஒரு நல்லவர் உண்மையை சொன்னாலும் அதை ஓராயிரம் முறை பதம் பார்த்து ,ஏண்டா இந்த உண்மையை அவர் சொன்னார் என ,அவரை துவம்சம் செய்துவிடும் அளவுக்கு , பழக்கபடுத்தி வாழ்ந்துகொண்டிருக்கும் காலம் இது.

இளம் சிவயோகி ஒருவர் மெல்லிய தேகம் ,கருமையான நிறம், நீண்டதலை முடி,கருமையான தாடி,ஆங்காங்கே அழுக்கு நிறைந்த ஒரு வெள்ளை நிற பைஜாமா உடை,கண்களில் ஒருவித கருணை ,எப்படி எனில் இவர் பார்க்கும் எவரையும் ,அவர் உள்சென்று அவருள்ளே ஆழ்ந்து அங்குள்ள இறைநிலையை பார்க்கும் திறம்.எதை பற்றியும் ஒரூ கவலை இல்லை இந்த யோகிக்கு,இருக்கும் இந்த நிமிடத்திலும் அவருக்கு ஒரு பெரியவர் இட்ட கட்டளையில் தம் சிரம் மேற்கொண்டு பணிசெய்துகொண்டிருந்தார் .இப்படிப்பட்ட ஒரு சிவயோகி நீண்டு நெடிய மலைகள் சூழ்ந்த ,இயற்கை எழில் மற்றும் மூலிகைகள் நிறைந்த ,அமைதி ஆழ்ந்து குடிகொண்டிருக்கும்  ஒரு மிக பிரசித்தி பெற்ற சதுரகிரி சுந்தரமகாலிங்கத்திற்கு அருகில் எமக்கு தரிசனம் தருகிறார் .இவரோடு எமக்கு ஏற்பட்ட அனுபவம் " இது அன்பின் ஆழம்..." கட்டுரையில் ஏற்கனவே எழுதியுள்ளோம்,மீண்டும் படித்து தெரிந்துகொள்ளவும்"


ஒரு சிறிய மேடை  அங்கே அமர்ந்து  பேசுகிறார்.எம்மைபோல் மற்றவர்கள் எல்லாம் அந்த சிறிய இடத்திலே அமர்ந்து சிவயோகியை, அவர் பேசும் வார்த்தை ,அவர் செய்கை இவைகளை கவனித்துக்கொண்டேஇருந்தோம்.

"...இங்குள்ள ஒரு பெரிய ஐயாவை பார்த்தேன்.அவர் வழக்கம் போல என்னிடம் கேட்டார்,இன்றைக்கு எத்தனை முட்டாள்களை பார்த்தாய் ,இன்னும் எத்தனை முட்டாள்களை பார்க்கப்போகிறாய் என்றார்..... என்று ஆரம்பிக்கும் போதே சூசமகாக எங்களை எல்லாம் பார்த்து தம் பேச்சை தொடர்கிறார் ......எல்லாரும் சுப நிகழ்ச்சிக்கு தான் முன்கூட்டியே பத்திரிக்கை அடிப்பர்.ஆனால் நானோ எனது தந்தையாரின், அவர் உயிர்உடன் இருக்கும் போதே, அவர் ஈமசடங்கு  எப்போது நடக்கும் என துல்லியமாக கணித்து, அதற்கு பத்திரிக்கை அடித்தேன்.....". சென்னையில் உள்ள ஒரு பல்கலைகழகத்திற்கு ஒரு விளக்கவுரை பேராசிரியாக ஒரு சில பாடங்களை எடுப்பதாகவும்,அதற்கு கிடைக்கும் சன்மானத்தை சிவகாரியத்திற்கு பயன்படுத்துவதாகவும்,ஒரு பிரபல இயக்குனர்   இவரை சந்தித்து ,எதை வைத்து படம் எடுக்க சாமி என கேட்க ,  நான் கடவுள் நான் கடவுள் (சரியாக புரிந்துகொள்ள முடியவில்லை) வைத்து படம் எடு என்று  சொன்னதாகவும் .(இயக்குனர்  அவர்கள்  எடுத்த படம் , அதில் வரும் அந்த சிவயோகியின் ,நடை,உயரம்,தாடி,நீண்டமுடி, எல்லாம் இந்த மகானை கிட்டதட்ட ஒத்துள்ளது.ஆனால்  இந்த மகான் மெல்லிய தேகம் ,கருணை நிறைந்த கண்கள் ,மிக சாதுவான தோற்றம்,) .அரசியல் பெரும் தலைவர் ஒருவர் இவரை பத்தொன்பதாவது சித்தன் என உரைத்தது என இது போன்ற  நிறைய சொன்னார்.

இவை எல்லாம் physical interatcion தானே.இந்த ஸ்தூல உடம்பால் ,இந்த மனதை வைத்துகொண்டு கேட்டது.ஆனால் எமக்கும் இந்த சிவயோகிக்கும் ஏற்பட்ட அனுபவம்  முற்றிலும் வேறுபட்டது இது போன்ற physical அனுபவம் அல்ல.இது ஒரு வேறொரு உலகம்.சத்திய உலகம்,உண்மை மட்டுமே மிளிரும் உலகம்,இது போல உலகம் இன்னும் இருக்கிறதா !?இவை எல்லாம் சாத்தியமா ...?!  இந்த மகான் கையை அசைத்து தட்டினால் எப்படி அருகில் இருப்பவரின் சூட்சும தேகம் பயணம் செய்யஆரம்பிக்கிறது...?இவை உண்மை தானா ...? என பல வினாக்கள் எழும்.இவை உண்மை எனில் இதில் திணித்துவைக்கப்பட்டுள்ள,இந்த அலை இதழ் வாசிக்கும் உள்ளங்களை தம் மனஅதிர்வுநிலையை கண்டிப்பாக குறைக்கும் என்பதும் உண்மை ,சிவ பயணத்தில் இப்படி ஒரு கண்ணோட்டமா ? என ஆழ்ந்து சிந்தனை செல்லும் என்பதும் உண்மை. கண்டிப்பாக ஒரு சிறு மாற்றம் உணரமுடியும்.


சதுரகிரியில் யாம் சந்தித்த அந்த இளம் சாது,சிவயோகி  (அகத்தியரிடம் அடிக்கடி பேசும் சீடர்) எம்மை  ஒரு சிறிய சிவ ஆலயத்திற்கு அழைத்து செல்கிறார்.ஒரு சிறிய சன்னதி அங்கே ஒரு அழகான சிவலிங்கம் ,மிகவும் சிறியது .அந்த சன்னதிக்கு வெளியில் இந்த இளம் சாது இருக்கிறார்.அவருக்கு அருகிலே ,பக்கத்தில் ஒரு நல்ல இளமையான மனிதர்,மிகவும் ஒரு தேஜஸ்வுடன் ,அருள்ஒளி நிறைந்த முகம் ,கருமையான தாடி, தூய ஒளி வீசும் வெண்ணிற வேஷ்டி அணிந்து  தெய்வசக்தியும் ,கருணையே வடிவான கண்களும்,இறைஅருள் நிறைந்த அன்பால் அனைத்தையும் ஈர்த்துகொண்டேஇருக்கிறார்.வேதங்கள் யாவற்றையும் அதன் நுனிமுதல் அடி வரை பயின்று ,கற்பதால் அதற்கே உரித்தான ஒரு தோரணையும் ஆனால் எந்த கர்வமும் அற்று ,வேதத்தின் சாரமாக ,அன்புள்ளம் கொண்ட மகாமனிதராக ,சதா சர்வகாலமும் என்றும்  ஈசனே தம் நினைவாக ,இருக்கிறார்கள் இந்த பெரியவர்.இவர் யார் ? எப்படி உடலில் இந்த அளவுக்கு ஒரு தேஜஸ் ? இவர் அணிந்திருக்கும் இந்த வெண்ணிற உடையே எம்மை தூக்கிவெளியே எறிகிறதே !?.இந்த வெண்மை எம்மை பார்த்து ,"இங்கு நிற்கும் அளவுக்கு உமக்கு  தகுதி உள்ளதா ?" என கேட்பது போல ஒரு பிரம்மை வருகிறதே..?! யாராக இருக்கும் என எம்மால் கணிக்க முடியவில்லை.சாதுவாகவும் தென்படுகிறார்,அதே சமயம் சர்வவல்லமை நிறைந்து அன்பும் கருணையும் நிறைந்த மாமனிதராகவும் தென்படுகிறார்.


சிவயோகி எம்மை அந்த வேதமனிதரை நோக்கி வணங்க சொல்கிறார் .யாமும் சாஸ்டாங்க நமஸ்காரம் செய்தோம் .ஏன் எதற்கு என்ற கேள்விகளெல்லாம்  இப்பொழுது எழவில்லை. ஏனென்றால் சதுரகிரி சாதுவுடன் (சிவயோகியுடன்) எமக்கு மிக நிறைந்த அனுபவம் ஏற்கனவே இருக்கிறது ("அகத்தியம்  இது அன்பின் ஆழம் "..படிக்கவும்). எமக்கும் இந்த பெரியவருக்கும் ஒரு ஈர்ப்பு அலைகள் இருப்பதை உணர்கிறோம்.  ஏதோ ஒரு இனம் புரியா ஈர்ப்பு அலைகள்.அன்பினால்  உண்டான ஒருவித தெய்வீகம் எமக்கும்  அவருக்கும் அல்லது அவருடன் அவர் பார்க்கும் யாவருக்குமே இது பொருந்தும்.இவர் பார்த்தால் எந்த ஒரு உயிருக்கும் அன்பு அலைகள் துள்ளி எழுந்துவந்து அணைத்துக்கொள்ளும்.அந்த அளவுக்கு இறைசக்தி நிறைந்த ஒரு மகான் அவர். இப்படி இருப்பவரின் கண்களின் கருணையை எதிர்கொள்ள முடியுமா ?  சொல்ல வார்த்தை இல்லை,எம் கண்கள் அவர் தம் கருணை பார்த்து ,அன்பின் வெளிப்பாடாகிய கண்ணீரை மல்கிறது.

எனவே எம்மை அழைத்துசென்ற சிவயோகி எது சொன்னாலும் செய்வதற்கு தயாராக இருந்தது எம் மனம். எம் மீது மிகுந்த அக்கறை கொண்டு, எனக்காக அவர் செய்த செயல்களுக்கெல்லாம் எம்மால் எப்போதும் ஈடு இணை செய்ய முடியாது ..!!எனவே அவர்சொல்படி அந்த இளமையான வேத மனிதரின்  முன் சென்று சாஷ்டாங்க நமஸ்காரம் செய்தோம் .பிறகு எழுந்து வணங்கினோம் .பிறகு யாம் சிவயோகியின் அடுத்த கட்டளைக்காக அவரை பார்த்தோம்

அப்போது யாம்  நமஸ்காரம் செய்த அந்த வேதமனிதர்சொல்கிறார், "உனது மூன்று கர்ம வினை பதிவுகள் அழிக்கப்பட்டன.."உடம்பெல்லாம் எமக்கு சிலிர்க்கிறது.இருகரம் கூப்பி தாமாகவே வணங்குகிறோம் அந்த வேத மனிதரை.


பிறகு அங்கிருந்து அருகில் உள்ள ஒரு கோவிலுக்கு அழைத்து செல்லுகிறார்.அதுவும் ஒரு சிவாலயம் .இது கொஞ்சம் பெரிய கோவில் முன்பு பார்த்ததை விட.அங்கு உள்ள அனைவருமே வெண்ணிற வேஷ்டி மற்றும் சட்டையுடன் அமர்ந்து சிவ மந்திரம் சொல்லி சிவ பூஜையில் லயித்து உள்ளனர். அனைவருமே நல்ல தேஜஸ்வுடன் உள்ளனர்.பிறகு அந்த சிவ யோகி இவர்களுடன் ஒரு மண்டபத்தில் அமர்ந்திருக்கிறார்.அவர் அங்கு உள்ளவருடன் நிறைய வேலைகள் செய்கிறார் என்பது தெரிகிறது .அவர் அருகில் ஒரு இடம் காலியாக உள்ளது .ஆனால் யாமோ வேறொரு இடத்தில நிற்கிறோம் .உடனே அவர்  எம்மை நோக்கி கையை அசைத்து "ங்கு வந்து அமர்...  "என்று சொல்லுகிறார்.உடனே யாம் சென்று அவர் அருகே அமர்கிறோம். அவர் அருகில் அமர்ந்ததால் ,அனைவரும் பார்க்கின்றனர் .ஒருசிலர் எம்மருகே வந்து நீங்களும் இந்த சிவ பூஜையில் முன்னரே வந்துவிட்டீர்களா ? என்கிறார்கள் .

ஒருசிலர் எனது நாடி பார்த்து,எமது மூச்சு ஓட்டத்தினை பார்த்து  .."ஒ பிங்கலை நாடி தான் ஓடுகிறது ..நல்லதே ..!"சிவ பூஜைக்கு உகந்த நாடி  ..சரியான நேரம் .. என்கிறார்கள் .


அது ஒரு சிவ ராத்திரி போல, விடிந்தால் சிவனின் ஒரு மிக பெரிய விழா இருப்பது போல தெரிகிறது .அனைவரும் அந்த நிகழ்வுக்காக மந்திரம்சொல்லி காத்துக்கொண்டிருகின்றனர்.எங்கெங்கும்சிவம் ..சிவமயம் ..சிவனின் நாம மந்திரம்.....வேதமந்திரங்களின் கணீர்கணீரென்ற ஒலி ,அந்தசிவமண்டபம் முழுவதும் நிரம்பிவழிகிறது.உடலில், மனதில்,உயிரில், சூட்சும தேகத்தில் உள்ள ஒவ்வொரு செல்களிலும் சுரீரென்று ஒலிக்கிறது. அடிக்கடி எம்மை சிக்கலில் மாட்டவைத்து ,தம் வினை தீர்க்கும்  பதிவுகள் எங்கே என கேட்கும் அளவிற்கு , கூனி குறுகி கேட்பாறற்று ,தாக்கமற்று துரும்பாய் துவண்டே போய்விட்டென எமது கர்மவினை பதிவுகள் .இங்கே சிவம், சிவ ஒளி ,சிவ நாமம் ,சிவ மந்திரம்,சிவ அதிர்வு,சிவ தரிசனம்,எல்லாம் சிவமே அனைத்தும் சிவமே !!..சிவனின் வேத மந்திரம்,முழங்க முழங்க ,அதிர்வு அலைகளின் அடர்த்தி (density) மெருகேறி மெருகேறி,சிவத்தையே நேரில் கொண்டுவருவது போல்,சொர்க்கலோகம் போல் ,என்றும் ஆனந்தம் தரும் அன்பு அலைகள் சூழ்ந்த உலகம் போல் ஜோதியாய் ஒளிர்கிறது.வேத மந்திர சிவ நாம ஒளி ,இங்கே சதா சர்வ காலமும் ஒலித்துக்கொண்டேயிருக்கிறது..!! எவர் இங்கு நுழைந்தாலும் அவர் தம் சூட்சும உடல் இங்கே புடம்போடப்படுகிறது.ஆக எந்த மந்திரமும் இன்றி,எந்த செயலும் இன்றி,இங்கே ஆன்மா தூய்மை பெறுகிறது,ஒளி பெறுகிறது.சிவனின் தார்மீக அலைகள் ஆட்சிசெய்யும் இடம். சிவயோகியின்  அருளால் கிடைத்த இந்த சூட்சும தேக பயணம் ,பயணத்தில் கிடைத்த அனுபம்  ,ஒருமுறை இங்கு சென்றுவந்தது  ,எம்மை முற்றிலும் அமைதிபெற செய்துவிட்டது ,மேலும் இப்பயணம் மீண்டும் தொடரும் என அந்த இளம் சாது சிவ யோகி, உரைத்த வார்த்தைகளும் ,எம்முள் மீண்டும் மீண்டும் ஒரு தெவிட்டாத ஆனந்தத்தை அள்ளி அள்ளி வாரி வழங்கிக்கொண்டிருக்கிறது.

மூன்று கர்ம வினை பதிவுகள் அழிக்கப்பட்டன ...என்று சொன்னாரே ஒரு வேத மனிதர்... அவர்  இன்று  வரை  எமக்கு வைக்கும் சோதனைகளில் எல்லாம்,தோற்றுக்கொண்டேயிருக்கிறோம்...
யாம் கற்ற அறிவு ,எமது  விழிப்புநிலை எல்லாம் பயனற்று போய்விடுகின்றன இவர் முன்  ....தோற்றுகொண்டேஇருக்கிறோம்,  பலமுறை ..!!
அன்புள்ளம் கொண்ட  ஆத்மாக்களுக்கு என்றும் கருணை மழை பொழியும்  வேதத்தின்சாரமே..!!.எம்வேந்தனே...!!! ..ஞானத்தின்வடிவமே ..!!.தவஞானியே !!தவபுதல்வனே !!மகாமுனிவனே ...மகாஞானியே ..!! ஈர்த்தெம்மை ஆட்கொண்ட  எந்தை பெருமானே !! நின்பொற்பாதம் பட்ட மண்ணின் திருவடிகளை கூட தொட அருகதைஅற்றவன் யாம்....!! யாம் செய்தபிழைபொருத்து எம்மை மன்னியுங்கள் இறைவனே !! எம் தந்தையே
என்றும் உமது தரிசனம் எம்முள் காணவழிவகைசெய்யுங்கள் இறைவனே !!!


மீண்டும்  அகத்திய உள்ளங்களை வேறு ஒரு நிகழ்வில் சந்திப்போம்.!!!

ஒம் அகத்தீஸ்வராய நமஹ !!!
ஒம் அகத்தீஸ்வராய நமஹ !!!
ஒம் அகத்தீஸ்வராய நமஹ !!!



Saturday, August 22, 2015

ஸ்ரீ ஸ்வர்ணஆகர்ஷன பைரவர் - இலுப்பைக்குடி





பைரவசக்தி என்பது காலம் காலமாய் தொடர்ந்து இம்மண்ணுலகில் வாழும் உயிர்களை காத்துக்கொண்டிருக்கிறது.இந்த சக்தியின் வேகம் ,இதன் மயிர்கூச்செறியும் ஆற்றல்,அதனால் உடலில்,உள்ளத்தில் ஏற்படும் மாற்றம் பிரமிக்கவைக்கிறது.எவர் தம்மை அழைத்தாலும் பாரபட்சமின்றி நொடிப்பொழுதில் தம் தன்மையை காண்பிக்கும் இதன் வல்லமை ,நினைக்கவே பிரம்மாண்டமாய் உள்ளது.பைரவரை வழிபாடு செய்பவர்கள் கண்டிப்பாக  பைரவர் தரும் பலன்களை அனுபவித்தே ஆகவேண்டும்.இது யாம் எமது அனுபவத்தில் கண்டஉண்மை.பைரவரின் சக்தியை உணர்ந்தே ஆவர்கள்.பைரவரின் அருள் ஆசிஇருந்தால் மட்டுமே மூலிகை பற்றிய ரகசியங்கள் புரியும்.இல்லை எனில் ஏட்டுசுரைக்காய் கறிக்கு உதவாது என்பது போல ஆகிவிடுகிறது.அதுமட்டுமல்ல பொருள் வளத்திற்கும் பைரவசக்தி மிக சிறந்தமுறையில் உதவுகிறது.


வாழ்வின் தேவைகள் நிறைவேற்றிக்கொள்ள ஸ்வர்ணம் மிக அவசியமாகிறது. ஸ்வர்ணம் இல்லாமல் அதுவும் இன்றைய காலகட்டத்தில் வாழ்வது மிக கடினமாகிறது.கடின உழைப்பின் மூலம் இதனை பெறவேண்டிய நிர்பந்தம் உள்ளது .எல்லாம் கர்மவினையும் கோள்கள் ஆட்சிபுலமும் மிக முக்கியபங்கு வகிக்கிறது.இருந்தாலும் இவை எளிதில் பெற ,தடைகள் எளிதாய் அகன்று வேண்டியவை வேண்டியவாறு பெற ஒரு சக்தி தேவைப்படுகிறதல்லவா ..? பைரவர் அருள் இதற்கு சிறந்த முறையில் வழிகாட்டுகிறது.ஸ்ரீ ஸ்வர்ணஆகர்ஷன பைரவர் ,வாழ்வின் மிக முக்கிய தேவையான ஸ்வர்ணங்களை அள்ளிதரும் ஒரு அற்புத சக்தி.

ஸ்ரீ ஸ்வர்ணஆகர்ஷன  பைரவ மந்திரம்

ஓம் ஏம் க்லாம் க்லீம் க்லூம் ஹ்ராம் ஹ்ரீம்
ஹ்ரூம்ஸக: வம் ஆபத்துத்தாரணாய
அஜாமிலா பத்தாய லோகேஸ்வராய
ஸ்வர்ணாகர்ஷண பைரவாய
மம தாரித்தர்ய வித்வேஷணாய
ஓம் ஸ்ரீம் மஹா பைரவாய நம:








கொங்கணசித்தர் தமது கடும் முயற்சிக்கு பிறகு தமக்கு  கிடைத்த மூலிகையை பயன்படுத்தி இரும்பை தங்கமாக மாற்றுகிறார்.அப்படி அவர் செய்த தங்கம் 500( Touch) மாற்றுக்கள் தரம் உடையது.இன்று நாம் பெரும்பாலும் பயன்படுத்துவது 91.6 (touch ).ஆனால் கொங்கணரோ அன்றே 500( Touch)க்கு சென்றுவிட்டார்.அதோடு அவர் தம் ஆய்வை நிறுத்தவில்லை.மேலும் இன்னும் தகதகவென மேலும் அதிக தூய்மையான டச் வேண்டுமென்று சிவபெருமானை நோக்கி தவம் இயற்றுகிறார்.சித்தர் அல்லவா எதிலும் அதன் நுனிவரை சென்று, செய்யும் செயல்களை ,வேலைகளை மிக அதிநுட்பமாக  செய்து, அதன் உச்ச எல்லைவரை செல்லும் தகுதி பெற்ற மாபெரும் புண்ணியவான்கள்.சிவனும் மனமிறங்கி அதோ அங்கே  இலுப்பை மரமும் வில்வ மரமும் நிறைந்த அந்த இடத்தில் பைரவரை நினைத்து 1000 ( Touch) மாற்றுக்கள் உள்ள தங்கத்தை தயாரிக்க அருள்செய்கிறார்.கொங்கணரும் மிக சரியாக இந்த  வில்வமரம் மற்றும் இலுப்பைமரங்கள் நிறைந்த இடத்தில் ஸ்வர்ணாகர்ஷன பைரவர் ஆசியுடன் 1000 ( Touch) மாற்றுக்கள் உள்ள தங்கத்தை தயாரித்துவிட்டார்.அந்த தங்கமோ தகதகவென ஜோதியாக மின்னுகிறதாம் .பிறகுஅவர் அதை எடுக்க முற்படும்போது அதுஅப்படியே பூமிக்குள் சென்று ஜோதியாக சிவலிங்கமாக காட்சியளித்ததாம்.இப்படி பிரகாசமாக ஜோதியிலிருந்து தோன்றியதால் ஸ்வாமிக்கு சுயம்பிரகாசேஸ்வரர் ,தான்தோன்றிஸ்வரர் என்று அழைக்கிறார்கள்.மிக பழமையான பைரவர் தலங்களுள் இதுவும் ஒன்று.ஒரு புறம் இரும்பு மறு புறம் அதன் உச்சம் ஜோதியாகிய இறைநிலை.இதற்குமேல் தூய்மை கிடையாதல்லவா ? ஆக சித்தன் ஒரு புறம் அவன் எண்ணம் செயல் எல்லாம் மருபுறமாகிய இறைவன் எனும் ஜோதிவரைசென்றுவிட்டான்.

காரைக்குடியிலிருந்து மாத்தூர் செல்லும் வழியில் உள்ளது.கிட்டதட்ட ஒரு 6 km (from new busstand) தொலைவில் உள்ளது ஸ்ரீ ஸ்வர்ணஆகர்ஷன பைரவர் கோவில்.கோவிலின் அம்பாள் சன்னதிக்கு எதிரே ஒரு மிகப்பெரிய குளம் உள்ளது.



ஒரு காலத்தில் மிக அதிக எண்ணிக்கையில் இலுப்பைமரங்கள் இருந்ததாம்.அதனால் தான் இந்த ஊருக்கு இலுப்பைக்குடி என்று பெயர்வந்ததாம்.இப்பொழுது இந்த குளத்தின் அருகே ஒரே ஒரு இலுப்பை மரம் உள்ளது.பைரவருக்கு பிடித்த ஒருமரம் இந்த இலுப்பைமரம் .மேலும் இதில்இருந்துஎடுக்கப்படும் இலுப்ப எண்ணெய்.இலுப்பஎண்ணெய்யில் விளக்கேற்றி  பைரவரை வழிபட வாழ்வில் இன்னல் அகன்று எண்ணியவை நிறைவேறும் என்பது நிதர்சனமான  உண்மை.




பைரவர் இங்கே ஜொலிக்கிறார்.ஒரு கையில் தங்க அட்சயபாத்திரம் ஏந்திஉள்ளார்.இங்கே வேண்டிக்கொள்ள வீட்டில் ஸ்வர்ணம் பெருகும் என்கிறார்கள்.இரண்டு நாய்களுடன் காட்சிதருகிறார்.பைரவர் சன்னதியில் எந்திரபிரதிஷ்டை செய்துள்ளார்கள்.கொஞ்சம் தவத்தில் ஆழ்ந்து சொல்ல சுழலும் ஒரு அலையினை உணரலாம்.பைரவருக்கு அருகே ஒரு சிறிய பலகையில் நாய் உருவம் உள்ளது,நாய்கடி பெற்றவர்கள் இங்கு வந்து இந்த தூணை வளம் வந்து ,இங்குள்ள குளத்தில் நீராடி பைரவரை வேண்ட,பைரவர் விஷதன்மையை முறிப்பதாக சொல்கிறார்கள்.



சுயம்பிரகாசேஸ்வரர், சிவன் மிக சிறியவடிவில் உள்ளார்.தெய்வீகம் நிறைந்த அலைகள் சூழ்ந்துள்ளது.கொஞ்சம் ஆழ்ந்து செல்லசெல்ல சென்றுகொண்டேஇருக்கிறது.அமைதி பரவுகிறது.ஆழ்ந்து கொஞ்சநேரம் இன்னும் கொஞ்சகாலம் பின்னோக்கி சென்றால் இந்த இடம் எப்படிஇருந்திருக்கும் என எண்ண ,ஒரு இனம் புரியாத அமைதி நோக்கிதான் செல்கிறது.காலம் சுழல்வதோ மிக மெதுவாக சுழல்வதுபோல தோணுகிறது.எந்த ஒரு டென்ஷனுமின்றி ,உடல் செல்கள் எல்லாம் நல்ல ஆற்றல் அலைகளை ஈர்த்துக்கொண்டு ,எந்த இழப்புமின்றி அது தம் வேலையை செய்கிறது.இப்படியே இருத்தல் சுகம் என்பதை உணர்த்துகிறது.இங்கே இன்றும் கொங்கண சித்தரின் ஆசிகள் கிடைக்கிறது .பிரம்மிக்க வைக்கிறது.முதலில் பைரவரின் அருள் வேண்டும் ,பிறகு கொங்கணரின் ஆசிவேண்டும்.இவை இரண்டும் இருந்தால் ஒரு உலோகத்தை தங்கமாக மாற்றும் தத்துவத்தின் ஒரு சிறுமுதல் படி விளங்குகிறது.நோக்கம் சிறந்ததாக இருத்தல் அவசியமாகிறது.எமது எண்ணம் நோக்கம் பைரவரின் அருள்அலைகளை நோக்கியே இருந்தது.

இங்குள்ள ஒருஇடத்தில் கொங்கணர் சிவனுக்குபூஜை செய்வது போன்று ஒருஅழகியசிற்ப வேலைபாடுஉள்ளதாம்.பொதுவாக இது போன்ற சிலைவேலைப்பாடுகள் எல்லாம்,அதிலும் இது போன்ற 500 வருடம் மிக பழமையான கோவிலில் இருக்கிறதென்றால் அதற்கொரு காரணம் கண்டிப்பாக இருக்கவேண்டுமல்லவா ? .அந்த இடத்தில அதிர்வுகள் அதிகமாக இருக்கவேண்டும் அல்லது ஏதோ ஒன்றை அதன் தாத்பரியத்தை சித்தர் பெருமகனார் மக்களுக்கு உணர்த்த உதவும் ஒரு அடையாளமாகவே யாம் கருதுகிறோம்.ஆக அதனை காணும் பொருட்டு கொஞ்சம் ஒவ்வொரு தூண்களாக பார்த்துக்கொண்டுவந்தோம் .அப்படி பார்த்துகொண்டிருந்தபோது , ஒரு என்பது வயது மதிக்கத்தக்க ஒரு அய்யாவை கண்டேன்.மிக சாதாரணமான ஒரு வெள்ளைவேஷ்டி வெள்ளை சட்டையுடன் அவர் உண்டு அவர் வேலையுண்டு என அமைதியாக இருந்தார்.அவரிடம் சென்று அய்யா இங்கே கொங்கணர் சித்தர் சிவனுக்கு பூஜை செய்வது போல சிற்பம் , எங்குள்ளது என்று கேட்டேன்.அவரோ அதை காதிலே வாங்கவில்லை .இரண்டுமுறை சொல்லிப்பார்த்தேன்,அவர் அதைபற்றி கொஞ்சம் கூட பொருட்படுத்தவில்லை.சரி யாமே தேடுவோம்,என்று ஒவ்வொரு தூண்களில் உள்ள சிற்பங்களை பார்த்துக்கொண்டே வந்தோம்.யாமும் முயற்சிசெய்து தேடினாலும் கிடைத்தபாடில்லை.சரி கிளம்பலாம் என வெளிவந்து சாஷ்டாங்க நமஸ்காரம் செய்து  வெளியே செல்லலாம் என நினைக்க ,சட்டென அந்த பெரியவர் அவராகவே  எம்மிடம் வந்து இங்கே பாரு ,இங்கே வா வா என ஒரு குறுக்குபாதையில் அழைத்துசென்று ஒரு இடத்தினை காட்டினார் ,நல்ல உற்று கவனித்துபார் அங்கே கொங்கணர் சிவனுக்கு பூஜைசெய்கிறார் என காண்பிக்க ,மிக அழகாக இருந்தது .ஒரு லிங்கத்தில் கொங்கணர் சிவனுக்கு பூஜை செய்கிறார்.கொஞ்சநேரம் அங்கேயே ஆழ்ந்துவிட்டேன்.


மேலும் வேகமாக விறுவிறுவென்று அழகிய புருவம்,வேலைபாடுயைட கண்ணிமை,நகங்கள் போன்ற நுண்ணிய வேலைப்பாடுடைய ஒரு சிறிய விநாயகர் சிற்பம்,ஹயக்ரீவர் சிலை,கொங்கணர் தங்கத்தால் ஒரு முருகன் சிலை வடிக்க எண்ணுவது  போன்ற சிற்பம்,நாய்கடி பலகை என நிறைய சிற்பங்களை இங்குமங்கும் ஒரு இரண்டுநிமிடத்தில் காட்டிவிட்டு சென்றுவிட்டார்.காட்டினார் என்பது எமக்கு கிட்டத்தட்ட ஒரு பறப்பது போன்ற உணர்வுதான் ஆனால் பாதங்களில் நடந்துதான் அவரோடு சென்றோம்,சும்மா .....,மனிதர், சற்று நேரத்தில் படபடவென  குறுக்கும் நெருக்குமாக இங்கும் அங்கும் காட்டிவிட்டு பறந்துவிட்டார் .யாமோ சுத்தமாக அவர் என்னசொல்கிறாரோ அதனை அவ்வாறே ஏற்றுக்கொள்ளும் மனபக்குவத்திற்கு தள்ளப்பட்டோம்.எந்த ஒரு வினாவும் எழவில்லை.அப்பப்பா.....என்ன ஒருவேகம் !!வேறு ஏதேதோ சொன்னார் ஒன்றும் விளங்கவில்லை.இந்த சிலை மிக அருமையாக உள்ளது என்றேன் அதையும் அவர் காதில் வாங்கிகொள்ளவிள்ளை


பசு ஒன்று சிவலிங்கத்திற்கு பால் சுரக்கும் காட்சியை விளக்கும் சிற்பம்


பிறகு ஒருவாறு கோவில்வெளியேவந்து ,காரில் ஏறி கொஞ்சதூரம் செல்ல,அப்பொழுதுதான் எமது சிந்தனை இந்த பெரியவரின் பிடியில் இருந்து வெளிவந்து சிந்திக்க ஆரம்பிக்கிறது என்பதை உணர்கிறோம்.இந்த பெரியவரிடம் யாம்கேட்கும்போது இவர் ஏன் அதனை பொருட்படுத்தவில்லை ?! .கிட்டதட்ட காதுகேட்காதவர்போல இருந்துவிட்டு,பிறகு நீண்டநேரத்திற்கு பிறகு அவரே ஏன் எம்மிடம் வந்து யாவற்றையும் விளக்கவேண்டும் ?!இவை போன்ற அனுபவம் எமக்கு சதுரகிரியில் உள்ள இளம்சித்தரோடு ஏற்பட்டதை நினைவுகூர்கிறோம்!!


சித்தனின் அருள் வேண்டுபவர்கள்அதற்கு முன் பைரவரை வணங்கினால் பைரவர் அதனை எளிதாக்கிவிடுகிறார்.சித்தர்கள் மகான்கள் இன்றும் நல்ல உள்ளங்களுக்கு தரிசனம் ஏதேனும் ஒரு விதத்தில் தந்த வண்ணத்தில் இருக்கிறார்கள்.எண்ணமும் நோக்கமும் சரியாய் இருந்தால் தரிசனம் விரைவில் கிட்டுகிறது.இல்லையெனில் பக்குவம் வரும் வரை காத்திருக்கவேண்டியதாகிறது.


ஆலய தரிசனம் கோடி கோடி புண்ணியம் .வாய்ப்புகிடைப்பவர்கள் காரைக்குடி வரும் பொழுது இங்குவந்து பைரவர் ஆசிபெற்று செல்லுங்கள் .பார்க்கவேண்டிய பைரவர் ஸ்தலங்களுள் இதுவும் ஒன்று.நகரத்தார் பெருமக்கள் இந்த கோவிலை நிர்வகித்துவருகிறார்கள் .மிக சிறந்த தொண்டு
அதுவும் காலம் காலமாக ஆலயபணிகளை செவ்வனே செய்பவர்கள், அவர்களுக்கு எமது நன்றியைதெரிவித்து,அகத்திய உள்ளங்களுக்கும் ஸ்வர்ண ஆகர்ஷன பைரவ அலைகளை இக்கட்டுரைவழியாக பகிர்ந்துகொண்டு, வேறு ஒரு நிகழ்வில் விரைவில் சந்திக்கின்றோம்.!


ஒம் அகத்தீஸ்வராய நமக !
ஒம் அகத்தீஸ்வராய நமக !
ஒம் அகத்தீஸ்வராய நமக !

Sunday, June 21, 2015

ஸ்ரீ பைரவம்...!!!


காலம் என்றும் சுழன்றுகொண்டே இருக்கும் ஒரு முடிவற்ற நிகழ்வு.ஆயிரமாயிரம் யுகங்களாய் இந்த காலம் சுழன்று கொண்டேஇருக்கிறது,இன்னும் சுழன்றுகொண்டேதான் இருக்கப்போகிறது.ஜனனம் எடுத்தவர் மரணம் ஆகுவதும்,மரணம் எடுத்தவர் மீண்டும் ஜனனம் ஆவதும்  சென்றுகொண்டேஇருக்கிறது.இந்த சுழற்சிகளுக்கெல்லாம் அப்பாற்பட்டு ஒரு சக்தி இவை அனைத்தையும் கவனித்துக்கொண்டு,யுகம் யுகமாய் ,கம்பீரமாய்,பிரம்மாண்டமாய் ,ஒளிப்பிளம்பாய் வலம் வந்துகொண்டிருக்கிறது.அந்த சக்தியின் அதிர்வு மிகமிக அதிகம் .தாம் பார்க்கும் எத்தனை ஆயிரம் உயிர்களுக்கும் நொடிப்பொழுதில் இருக்கும் அலையியக்கத்தை  மாற்றி அமைத்து,இறைவெளிப்பாதையில் உட்செலுத்தி ,பேரொளியினை நிரப்பி,ஜீவமுக்தி அளித்துவிடும் சக்திபெற்றது.அப்படிப்பட்ட ஒரு மாபெரும்  மிக அதீத அதிர்வு உணர்வு கொண்ட சக்தி, ஒருபேராற்றல்,ஒரு கரிய நிறமுள்ள ,கட்டுகடங்காத அலைகளின்ஆற்றல் கொண்டுள்ள சக்திதான் பைரவம் , பைரவர் ,வயிரவர் ,காலபைரவர்  என பல பெயர்களில் அழைக்கப்படுகிறார்.இவர் காலத்தையும் வெல்வார்.காலனையும் வெல்வார்.தொடக்கம் முடிவு  ஆகிய எதுவும் அறிய இயலாத  சிவத்திலிருந்து பிறந்து சிவத்தின் ஒரு அங்கமாக இன்றும் என்றும் சுழன்றுகொண்டு காவல்காக்கும் தொழில்புரியும்  ஒரு மகாதெய்வம்  காலபைரவர்.

மகாபைரவர்  தாள் பணிந்து ,வணங்கி இவர் அருள் பெற அது பல்வேறு நிலைகளை தாண்டி வெகு விரைவில் ,வணங்குபவர் தம்மின் நிலையை தூக்கிவிடுகிறது.எமது அனுபவம் எல்லாம் இங்கு ஒன்றுமில்லை,தூசியைவிட மிக மிக சிறியது.ஏனெனில் யாம் உணர்ந்த அந்த சக்தி நினைக்கும் போதே,உடல் செல் மயிர்கூச்சம் பெற்று,சொல்வதறியாது ,விளக்க இயலாதாய் உள்ளது .மிகபிரம்மிப்பாய் உள்ளது.ஒவ்வொருவருக்கும் கர்மவினை என்பது தனித்தனி.நமது கர்மவினையை, நாமே ,நாம் மட்டுமே அனுபவித்து அதற்கேற்ப பலன்களை பெறமுடியும்.இதை எண்ணி செயல்ஆற்றும் போதே , இந்த அடுத்தவரை பார்த்து பொறாமை படுதல்,தகுதிக்குமீறிய ஒரு சில எண்ணங்கள் எல்லாம் அடியோடு ,அந்த எண்ணம் செயலற்றுவிடும்.ஒவ்வொருவரும் அவர் தாமே பல நல்ல செயல்கள் செய்து புண்ணியம் செய்து,இறை உணர்ந்தே அவர் தம் கர்மவினையை குறைக்க இயலும்.கர்மவினை  தாக்கம் குறைய ஒரு மிகப்பெரிய இறைசக்திதுணை தேவைப்படுகிறதல்லவா ?! .இல்லையெனில் இதன் தாக்கம் தாங்கஇயலாமல் தாம் இருந்த நிலையிலேயே சுழன்றுகொண்டு மீழ்வதறியாமல் ,இன்னலில் அகப்பட்டு, மீண்டும் மீண்டும் பிறப்பெடுக்கவேண்டியதாகிறது.

கர்மவினையின் தாக்கத்தை அதன் அடி வேர்நுனி வரை சென்று ,அதன் வேரறுத்து ,வெகுவிரைவில் இறைநோக்கிய பயணத்தை ,அதன் தடைகளை உடைத்தெறிந்து ,இறை அருகில் அழைத்துசெல்லும் ஒரு உன்னத சக்தி,இந்த பைரவ சக்தி மற்றும் அதன் அற்புதமான அலைகள்.இப்பிறவியில் பைரவரை தொடர்ந்து வழிபாடுசெய்பவர்கள்   எல்லாம்,போன பிறவியில் சித்தர்களின் தொடர்புடையவர்கள் எனவும் ,சித்தர்களின் சீடர்கள் எனவும் சொல்கிறார்கள்.எந்த பைரவ மந்திரங்களாயினும் சரி ,ஸ்லோகங்கலாயினும் சரி ,அவை சொல்லும் அன்பர் தம் சூட்சுமதேகத்துள் சென்று, அவரை படிப்படியாக உயர்த்துகிறது .அங்குள்ள மாசுகளை நீக்கி,மாயையைஅழித்து,நல்ல வளமுள்ள ஒரு அற்புதமான ஆத்மாவாக மாற்றுகிறது.வாழ்வில் எப்படியாவது ஒரு சித்தரை பார்த்து,அவர் தம் ஆசி பெற்று,தமது நிலையை எவ்விதமேனும் உயர்வுபடுத்திக்கொள்ளவேண்டும் என்ற எண்ணம் நம்மில் பலருக்கும் உண்டு அல்லவா ?.இவை நிறைவுபெற ஒன்று புண்ணியம் வைத்திருக்கவேண்டும் இல்லையெனில் இப்பொழுதாவது அதற்குரிய தகுதியை வளர்த்துக்கொள்ளவேண்டும்,இதற்குரிய தகுதிபெற கடின உழைப்பு ஆன்மீகத்தில் தேவைப்படுகிறது.இப்பிறவியில் இயலவில்லை எனில் கண்டிப்பாக வரும் பிறவி ,இன்னும் தெளிவுபெற்று அதற்குரிய தகுதிவந்துவிடும்.ஒவ்வொரு வினாடியும் செலவழிந்துகொண்டே போய்க்கொண்டிருகிறது,இங்கே எவ்வாறு அதனை, இனிவரும் காலங்களுக்கும்,இனிவரும் பிறவிகளுக்கும் , நன்மை தரும் விதமாக இந்த சூட்சுமதேகத்துள் சேர்த்துவைப்பது ,அதன் தாத்பரியத்தை எவ்வாறு புரிந்து பயன்படுத்திக்கொள்வது, என்பதெற்கெல்லாம் அருள் புரியும்  ஒரு அற்புதசக்தி தான் இந்த பைரவமந்திரம் ,பைரவ சக்தி.



(இதற்குரிய யாகம் எவ்வாறு செய்வது என்பதை ஏற்கனவே ஸ்ரீமஹாபைரவர் கட்டுரையில் எழுதிஉள்ளோம் ,மீண்டும் படிக்கவும்)
பைரவ காயத்ரி ஒரு நல்ல அலையியக்கத்தை உருவாக்கி ,கர்மவினை தாக்கத்தை வேரறுத்து,சூட்சும தேகம் பற்றியஅனைத்து விழிப்புணர்களையும் வரவழைத்து,சூட்சும தேகம் வலுப்பெற நன்கு உதவும் ஒரு அற்புத மந்திரம்.ஒரு சில நிபந்தனை என்னவெனில் ,சுத்தமாக இருக்கவேண்டும், எந்தவகையிலும் சுத்தம் இல்லையெனில் சும்மா இருப்பது நல்லது.இல்லையெனில் விளைவு தாறுமாறாக வந்துவிடும்.அவ்வளவு சக்திவாய்ந்த அட்சரங்களின் தொகுப்பு இவை. முடிந்தவரை  நன்கு தெளிவாக உச்சரித்து இதில் உள்ள அதிர்வு உணரவேண்டும் (vibrations).அவ்வாறு கொஞ்சம்கொஞ்சமாக உணரஉணர ,சூட்சுமதேகம் நன்கு வலுப்பெறும்.இவை வலுப்பெற,வலுப்பெற பிறகு அதற்குரிய தன்மைகள் வந்துவிடும்.உதாரணமாக ஒரு ஜீவசமாதி சென்றால் அங்குள்ள மகானின் சூட்சும அலைகளை மெல்ல மெல்ல உணரும் தகுதிவரும்.ஒரு கோவிலுக்கு சென்றால் அங்குள்ள அதீத ஆற்றல் கொஞ்சம்கொஞ்சமாக புலப்படும்.இன்னும் பைரவசக்தி உணர உணர ,அவர் தம் அன்றாட வேலைகள் எளிதாய் நடந்தேறும்.இப்படி இன்னும் சொல்லிக்கொண்டே போகலாம்.இவை எல்லாம் எடுத்த எடுப்பிலேயே வராது.கொஞ்சம் சாதனை பண்ணவேண்டும்.இதன்பிறகு அன்றாட நடக்கும் அவர் தாம்  செய்யும்  செயல்கள் ,நிகழ்வுகள் ஆழ்ந்துகவனிக்க வேறுபாடு நன்கு புலப்படும்.நன்கு பயன்படுத்தி தங்களுக்கு தெரிந்த அனைத்து உள்ளங்களுக்கும் சொல்லிக்கொடுங்கள் அவர் தம் வாழ்வு இனிமையாகும்.

பைரவ காயத்ரி: 
ஸ்வாநத்வஜாய வித்மஹே சூலஹஸ்தாய
தீமஹி தன்னோ பைரவ ப்ரசோதயாத் ஸ்வாஹா





நாள் தவறாது பைரவமந்திரத்தைசொல்வதும் நன்மையே.உடலது ஒரு மெல்லிய வெதுவெதுப்பான உஷ்ணத்துடன்,ஒருவித விழிப்புநிலையும் சேர்ந்து ,வேறு எந்தசெயல்களிலும்,நாட்டமில்லாது ,பைரவஅதிர்வு அலைகளை  மட்டுமே மனதில் நன்கு உள்வாங்கிய வண்ணம் இருக்கும்.இப்படி இருப்பதும் மிக நன்மையே.வெளியில் எங்கும் செல்லாமல் இருக்கும் போது ,இதன்  ஆற்றல் அதீதமாக இருக்கும் போதும் ,மேலும் செலவு செய்யாமல் இருப்பதாலும் ,உயிர்சக்தி நன்கு வலுப்படும்,ஒரு ஸ்திரத்தன்மை கிடைக்கும்.மேலும் இது தொடர ஏதாவது  அசாதாரணமான ஒன்றை செய்யத்தோன்றும் .ஒரு சிலநாட்களில் கனவில் தம்கட்டிதாவுவது போலவும்,இங்கிருந்து இன்னொரு இடத்திற்குசெல்ல ,மெதுவாக நடந்து சென்று அடையாமல், ஒரேமூச்சில் சிறிது நீண்டு தாவுவது போலவும்,,பறந்துசென்று இடத்தை அடைவது போலவும்,பறப்பதுபோலவும்,   வருவதெல்லாம் ,உடலில்தேங்கியுள்ள மிகஅதீத ஆற்றலால்தான்.ஆக இவ்வாறு கிடைக்கும் ஆற்றலை ,கனவில் வீனடிக்காமல் ,நன்கு இந்த உலகத்தையோ,நமக்கு தெரிந்த உற்றார் உறவினர்,நண்பர் ,அன்றாட நம்முடைய வாழ்வில் பங்குகொள்பவர்கள் இவர்களை ,முடிந்த வரை போதும் போதும் என்று சொல்லும் அளவுக்கு , வாழ்கவளமுடன் என்று வாழ்த்தியோ அல்லது அன்பால் கருணையால் இறையருள் அவர் தம் துயர் நீக்கி எல்லா வளங்களையும் அளிக்கட்டும் என அந்த அதீத ஆற்றலை பயன்படுத்திக்கொள்ளவேண்டும்.இப்படி செய்தால் ஆற்றல் சேமிப்பு இரு வகையில் பயன்அளித்து அது மீண்டும் இரட்டிப்பாக நம்மிடமே வந்துசேரும்.



பைரவ அதிர்வு அலை என்பது ,நேரடியாக சூட்சுமத்தோடு தொடர்புடையது .சூட்சும உடலோடு தொடர்புடையது.நாம் தூங்கினாலும் இந்த சூட்சும உடல் என்றும் தூங்குவதில்லை.காலகாலத்திற்கும்  தூங்காமல் விழிப்புநிலையில் என்றும் நம்மோடு வரும்.இந்த உடலில் ஒரு சிறு பைரவ அதிர்வு அல்லது ஏதேனும் ஒரு நல்ல அதிர்வு அலைகளை ஏற்றிவிட்டால் அவை நாள் முழுவதும் தொடர்ந்துகொண்டேயிருக்கிறது.ஒரு சிறு துளி பைரவ அதிர்வு உணர்தல் என்பது அது சூட்சும உடலில் வெகு நேரம் தொடர்கிறது.இப்படி இருப்பது ஒரு சுகமே.இப்படி இருக்கும் காலமெல்லாம்  அது வாழ்வில் ஒரு பொன்னான காலமாகும்,பொன்னான நாளாகும்.மீண்டும் இது போல் வருமா என்றெல்லாம் தெரியாது.ஆக வாய்ப்பு கிடைக்கும் போது எவ்வளவு முடியுமோ அவ்வளவு இந்த அதீத சக்தியோடு இருக்க பழகிக்கொள்ளுதல் மிக நன்மை பயக்கும்.ஒருவரின் ஆளுமைதிறம், அந்த  உடம்பில் உயிரில் ,மனதில் உள்ள ஒரு சக்தியை சார்ந்தது ,அந்த சக்தி என்பது சூட்சுமதிலிருந்து பெறுவது ,ஆக சூட்சுமம் திடம் பெற,அங்கு ஸ்திரம்பெற மனிதனை அடுத்த கட்டத்திற்கு எடுத்துசெல்கிறது.



ஒரு முறை  தேய்பிறை அஷ்டமியில் பைரவர் யாகம் செய்துகொண்டிருந்த பொழுது ,கிட்டத்தட்ட  யாகம் முடிவடையும் நேரம், ஆயிரம் முறைக்குமேல் உச்சரித்து ,கிட்டதட்ட  எமது உடல் கருவிகளெல்லாம் தளர்வடையும் நேரம், எண்ணம் உச்சரிக்கும் மந்திரம் எல்லாம் இந்த பைரவசக்தியில் திளைத்திருந்தது,வீரியமிக்க அதிர்வலைகள் கொண்ட சக்தி,இவை எம் உள்ளத்தோடு பிண்ணிப்பிணைந்திருந்தது.ஒரு கண்ணிமைக்கும் நேரத்தில் ஒரு கரியநிறமுள்ள ஒரு உருவம் ,கரிய நிறமென்றால் ஒரு அதிர்வுள்ள,காந்ததன்மையுள்ள , ஈர்க்கும் தன்மையுள்ள,உடலெங்கும் கட்டுகடங்கா அதிர்வுஅலைகள் சுழன்றுகொண்டிருக்கும், கரிய தேகம் ஒன்று யாககுண்டத்திலிருந்து முன்னோக்கி  ஜல் ஜல் ஜல் என ராஜகம்பீரநடையுடன் முன்புறமாக சென்றுகொண்டிருந்தது,யாமோ அதனை பின்புறமாகவே பார்க்கமுடிந்தது.எல்லாம் நொடிக்கும் குறைவான நேரம்.நடை என்றால் அப்பப்பா என்ன ஒரு நடை ,ஒரு இரண்டடி எடுத்துவைத்தது மட்டுமே யாம் உணரமுடிந்தது.பிரமிக்கவைக்கிறது,சிலிர்க்கவைக்கிறது.எதற்கும் அஞ்சாத நடை,எந்த  ஒரு சக்தியையும் எதிர்கொள்ளும் திறம்,கோடிஉயிர்களின் ஆத்மாக்களை அரவணைக்கும் தகுதி,பாரபட்சமே இல்லாத எல்லாவற்றையும் சமமாக பார்க்கும் கருணையும் உக்கிரஅதிர்வும் கொண்ட தன்மை நிரம்பிய நடை,இன்னும் வர்ணிக்க இயலாத ,உணரமட்டுமே முடிந்த அலைகள் நிரம்பியிருந்தது. எம்மை எவர் அழைத்தாலும் வருவோம் என்றும்
இன்றைய நிகழ்வு அதிஉத்தமம் என்றும் எம்முள் சொல்லாமல் சொல்லி கம்பீரமாக சென்றுவிட்டது.


எமது குருவின் வாக்கிற்கிணங்க  ஒரு நாள் இரவு பதினோரு மணிக்கு மேல் அன்பின் அலைகொண்டு ,தூய அன்பால் பைரவர் படத்தின் முன் ,உள்ள அன்போடு பைரவனை அழைத்துபார் என்றார் ,யாமும் அவ்வாறு ஒரு நாள் அழைக்க ,யாம் வைத்திருந்த பைரவ படத்தினை சுற்றி ஒரு ஒளி பளிச்சிடும் ஒளி ஒன்று வட்டமாக சுற்றிவந்தது.அன்று யாம் உணர்ந்த அந்தஒளி,எம்முள் பைரவம் பற்றி  பைரவசக்தி பற்றி இன்னும் ஆர்வம் அதிகமாக ஈர்ப்புகொள்ள செய்தது,அந்த சக்தி பின்னர்கொஞ்சம் கொஞ்சமாக வளர்ந்து ,ஒரு குறிப்பிட்ட  வருடங்களுக்கு பிறகு கரிய உருவமாய் வந்தது.இன்னும் இவை எம்முள் தொடரும் என்றே உணர்கிறோம்.



மதுரையில் தெப்பக்குளம் அருகே ஒரு மாரியம்மன் கோவில் உள்ளது.அதன் அருகே ஒருகாலபைரவர் கோவில் உள்ளது .மிகுந்த சக்திவாய்ந்த கோவில்.இங்குள்ள பைரவர் அதிக உக்கிரம் வாய்ந்தவர்.எப்பொழுதும் அதீதசக்தி ஒன்று சரியாக ராகுகாலத்தில் இந்தகோவிலில் வந்துசெல்கிறது.
ஒரு கருப்புவெள்ளை நிறம்கொண்ட நாய் ஒன்று இங்கு இருக்கும்.அது அங்குள்ள பைரவ சக்தியோடு தொடர்புடையது.மதுரையை சுற்றிபார்க்க செல்பவர்கள் இங்குள்ள  காலபைரவர் கோவிலையும் ,ராகுகாலத்தில் வந்து தரிசித்து செல்லுங்கள்.உடம்பில் உள்ள துஷ்டசக்தியை விரட்டியடியுங்கள்

காலபைரவர் எவர் அழைத்தாலும் வருவார்.இவர் எங்குவந்தாலும் அந்த இடம் மிகுந்தபாதுகாப்பாக திகழும் .தீயசக்திகள் இருக்கும் இடம்தெரியாமல் சென்றுவிடும்.தீயவை அகன்றுவிடின் செய்யும் செயல்யாவும் முழுமையான விளைவுகளை ஈட்டும்.வாழ்வில் நன்மை பயக்கும்,இந்த பைரவ அலைகளோடு அகத்திய உள்ளங்களை வாழ்த்தி வேறு ஒரு நிகழ்வில் சந்திக்கிறோம் !

ஒம் அகத்தீஸ்வராய நமக !!!
ஒம் அகத்தீஸ்வராய நமக !!!
ஒம் அகத்தீஸ்வராய நமக !!!